धरानः अन्तर्राष्ट्रिय बुढासुब्बा गोल्डकपको प्रबद्र्धनको लागि आयोजना गरिँदै आएको बुढासुब्बा प्रमोसन कप चौथो संस्करणको फाइनलमा धरान फुटबल क्लब र धरान उपमहानगरपालिका भिड्ने भएका छन् ।

बिहीबार धरान–१७ स्थित एन्फा एकेडेमीको खेल मैदानमा भएको खेलमा धरान फुटबल क्लबले उद्योग वाणिज्य सङ्घ सुनसरीलाई ५–३ गोल अन्तरले पराजित गर्दै फाइनलमा प्रवेश गरेको हो । यसअघि नै धरान उमपहानगरपालिका वराह ज्वेलरी धरानलाई पराजित गर्दै फाइनलमा प्रवेश गरिसकेको थियो ।

बिहीबार भएको खेलमा धरान फुटबल क्लबका तर्फबाट जनक सुनुवार एक्लैले ४ गोल गरे भने लक्ष्मण राईले थप एक गोल गरेका थिए । उद्योग वाणिज्य सङ्घको तर्फबाट सन्तोष लिम्बूले २ गोल गरे भने अमर राईले १ गोल गरेका थिए । खेलको म्यान अफ द म्याच उद्योग वाणिज्य सङ्घका सन्तोष लिम्बू घोषित हुँदै मेडल र नगद ५ सय पुरस्कार जिते ।

प्रबद्र्धन कप विजेता टिमले ३० हजार नगद र उपविजेता टिमले १५ हजार नगद पुरस्कार जित्ने आयोजक धरान फुटबल क्लबका अध्यक्ष किशोर राईले बताए । उनका अनुसार प्रतियोगिताको सर्वाेत्कृष्ट खेलाडीलाई नगद रु ५ हजार र विधागत उत्कृट खेलाडीलाई जनही २ हजारका दरले पुरस्कृत गरिनेछ । प्रतियोगितामा बेष्ट स्ट्राइकर, बेष्ट डिफेन्डर, बेष्ट किपर, बेष्ट मिडफिल्डलाई पुरस्कृत गरिनेछ ।

अखिल नेपाल फुटबल सङ्घ (एन्फा)ले यस वर्षदेखि मोफसलमा आयोजना हुने प्रतियोगिताको लागि नियमावली बनाएर प्रतियोगिता अयोजना गर्ने मिति तोकिदिएपछि बुढासुब्बा गोल्डकप मंसिर १९ गतेदेखि हुन लागेको छ । एन्फाले क्यालेण्डर सार्वजनिक गरेसँगै गोल्डकपको आयोजनाको तयारीमा धरान फुटबल क्लब लागिसकेको क्लबका महासचिव प्रताप तामाङले बताएका छन् ।