काठमाडौंः सिएम कृष्ण थापा अफिसियल अन्तर्राष्ट्रिय प्रतियोगितामा उपाधि जित्ने पहिलो नेपाली बनेका छन् ।

बिहीबार सम्पन्न मदन भण्डारी मेमोरियल एसियन एमेच्योर चेस च्याम्पियनसीपमा कृष्णले पहिलो स्थान पाएका हुन् । ९ चरणको खेलमा ८ अङ्क जोड्ने क्रममा कृष्णले अन्तिम चरणमा नेपालकै रिजेन्द्रराज भण्डारीलाई हराए । पराजित रिजेन्द्र ६ दशमलव ५ अङ्कसहित पाँचाँै भए । प्रतियोगितामा नेपाली खेलाडीले शीर्ष पाँच स्थान पाए ।

अन्तिम चरणमा भारतका सुमित ग्रोभरलाई हराएका प्रकाश नेपाल ७ दशमलव ५ अङ्कसहित दोस्रो भए । भारतका शुभम् शुक्लालाई हराएका पुरुषोत्तम चौलागाईं ७ अङ्कसहित तेस्रो तथा सुमित आर्नभ कुशहवालाई पराजित गरेका सजिन महर्जन ७ अङ्कसहित चौथो भए ।

महिलातर्फ भारतकी सन्ध्याजी पहिलो भइन् । चीनकी सुन फुरुङ दोस्रो, नेपालकी सुजना लोहनी तेस्रो, जापानकी कोजीमा नात्सुमी चौथो तथा नेपालकी सुशीला गुरुङ पाँचौँ भए ।

नेपाल बुद्धिचाल सङ्घ र मदन भण्डारी स्पोर्ट्स एकेडेमीको संयुक्त आयोजनामा सञ्चालित प्रतियोगितामा १५ देशका ८४ खेलाडी सहभागी थिए ।

पुरुषतर्फ पहिलो भएका थापाले १ हजार ५ सय तथा दोस्रो हुनेले १ हजार तथा तेस्रो स्थान प्राप्त गर्ने खेलाडीले ७ सय ५० अमेरिकी डलर पुरस्कार पाए । यसैगरी, चौथो र पाँचौँले ५ सय, छैटाँैले ४ सय तथा साताँैले ३ सय ५० अमेरिकी डलर पुरस्कार पाए । आठौँदेखि दशौँ हुनेले ३ सय अमेरिकी डलर पुरस्कार पाए ।

महिलातर्फकी विजेताले ७ सय, उपविजेताले ५ सय, तथा तेस्रोदेखि पाँचौँ हुनेले ३ सय अमेरिकी डलर पुरस्कार पाए ।