विराटचोकः नेपाल प्रेस युनियनको २९ औँ स्थापना दिवसको अवसर पारेर पूर्व प्रधानमन्त्री शेरबहादुर देउवाले नेपाल प्रेस युनियन सुनसरी शाखाले निर्माण गरेको मोबाइल एप र डिजिटल पात्रो ‘युनियन पात्रो’को शुभारम्भ गरेका छन् ।

भर्चुअल माध्यमबाट भएको कार्यक्रममा बोल्दै उनले वर्तमान सरकारले पत्रकारहरुका लागि स्वास्थ्य तथा सुरक्षा सामग्री उपलब्ध गराउन नसकेको बताउँदै स्वास्थ्य सामग्री उपलब्ध गराउनुपर्नेमा जोड दिएका छन् ।

पात्रोको शुभारम्भ गर्दै देउवाले अहिलेको प्रविधिको युगमा डिजिटल पात्रो निर्माण हुनु सराहनीय भएको बताउँदै युनियनको सुनसरी शाखाको रचनात्मक कामको लागि धन्यवाद दिएका थिए ।

नेपाल प्रेस युनियनको २९ औं स्थापना दिवस मनाउन मंगलबार जुम एपमा आयोजना गरिएको भर्चुल कार्यक्रममा देउवाले पत्रकारहरू समेत कोरोनाबाट संक्रमति हुन थालेकाले सजग रहन अनुरोध गरे ।

कार्यक्रममा युनियनका केन्द्रीय सभापति बद्री सिग्देलले युनियनले प्रेस स्वतन्त्रताको पक्षमा काम गर्दै आएको बताउँदै श्रमजीवि पत्रकारको हकहितमा काम गर्दै जाने बताए । युनियनका सुनसरी अध्यक्ष पवन अधिकारीले लकडाउनको समयमा प्रेस युनियन जिल्ला कार्यसमितिले सुनसरीका क्रियाशील २ सय २० जना पत्रकारहरुको कोरोना बीमा गरेको बताउँदै निःशुल्क रुपमा स्वास्थ्य सामग्री पनि वितरण गरेको पनि सुनाए । उनले भने, ‘विषम् परिस्थितिमा मैले नेतृत्व सम्हाले पनि पत्रकारको हकहितका लागि काम गर्दै आएको छु, हामीले अहिले डिजिटल क्यालेन्डर पनि तयार गरेका छौँ ।’

युनियनको सो पात्रो प्ले स्टोरमा गएर सर्च गरेर डाउनलोड गर्न सकिने उनले जानकारी दिए । पात्रोमा दैनिक राशीफल, न्यूज अपडेट गरिने र सबै जिल्लाका नेतृत्व तहमा बसेकाहरुको नामावली र नम्बर पनि उपलब्ध भएको उनले बताए ।

कार्यक्रममा कांग्रेसका प्रवक्ता विश्वप्रकाश शर्मा, नेविसंघका सभापति राजीव ढुंगाना, पत्रकार महासंघका अध्यक्ष गोविन्द आचार्य, ट्रेड युनियन कांग्रेसका अध्यक्ष पुष्कर आचार्य, प्रेस युनियका वरिष्ठ उपाध्यक्ष दीपक आचार्य, महासचिव अजयबाबु सिवाकोटी, पूर्व अध्यक्ष तथा पूर्व सूचना आयुक्त किरण पोखरेल, युनियनको युरोप शाखाका अध्यक्ष विपिन निरौलालगायतले बोलेका थिए ।

पात्रो निर्माणमा प्राविधिक सहयोग आइटी सोच इटहरीले गरेको छ ।