काठमाडौंः १३ औं दक्षिण एशियाली खेलकुद (साग) अन्तर्गत एथ्लेटिक्सको दोस्रो दिन ७ स्वर्णका लागि भएको प्रतिस्पर्धामा भारतले ५ स्वर्ण जित्यो । पाकिस्तान र श्रीलंकाको नाममा समान १ स्वर्ण रह्यो ।

पुरुषतर्फ लङजम्प, डिस्कस थ्रो र १० हजार मिटर दौड तथा महिलातर्फ २ सय मिटर र डिस्कस थ्रोमा भारतले स्वर्ण जितेको हो । पुरुष १० हजार मिटर दौडमा भारतका सुरेश कमारले निर्धारित दुरी २९ दशमलव ३३ दशमलव ६१ सेकेण्डमा पूरा गरे । श्रीलंकाका सानमुगेश्वरनले निर्धारित दूरी ३० दशमलव ४९ दशमलव ३० सेकेण्डमा पूरा गरी रजत तथा नेपालका दीपक अधिकारीले कास्य जिते ।

महिला २ सय मिटर दौडमा भारतकी अर्चना सुरिन्थले निर्धारित दूरी २३ दशमलव ६६ सकेण्डमा पूरा गर्दै स्वर्ण जितिन् । ३ सकेण्डले पछि परेकी पाकिस्तानी खेलाडी नज्मा प्रबिनले रजत तथा भारतकै चन्द्रा लेखाएनले निर्धारित कास्य जितिन् । सो विधामा नेपालकी सरवती चौधरी र कृष्णा चौधरी हिट चरणबाटै बाहिरिएका थिए ।

लङ जम्प पुरुषतर्फ भारतका लोकेश सत्यानाले ७ दशमलव ८७ मिटरको दूरीका साथ स्वर्ण पदक जित्दा भारतकै स्वामीनाथन यादवले ७ दशमलव ७७ मिटरको दुरीका साथ रजत र बंगलादेशका अलअमिनले ७ दशमलव ६० मिटरको दूरीका साथ कास्य जिते ।

महिला लङ जम्पमा श्रीलंकाकी लक्क्षिनी सारंगले ६ दशमलव ३८ मिटरको दूरीका साथ स्वर्ण पदक जित्दा श्रीलंकाकै अन्जनी उथ्पालाले ६ दशमलव ११ मिटरको दूरीका साथ रजत र भारतकी सान्द्रा बाबुले ६ दशमलव ०२ मिटर को दूरीका साथ कास्य पदक जिते ।

यता डिस्कस थ्रो महिलामा नबजित कौरले ४९ दशमलव ८५ मिटर फ्याँक्दै स्वर्ण जित्दा भारतकै सुरभी विश्वासले ४७ दशमलव ३१ मिटर फ्याँक्दै रजत र श्रीलंंकाकी इशारा मधुरंगले ४१ दशमलव २९ मिटर फ्याक्दै कास्य जितिन् । नेपालकी अमृता महतोले ४० दशमलव १९ मिटर फ्याक्दै कास्य जितिन् ।

पुरुष डिस्कस थ्रोमा भारतका कृष्ण सिंहले स्वर्ण र गगनदीप सिंहले रजत जिते । पाकिस्तानका साम्स उलहकले कास्य जिते ।