तस्बिरः राष्ट्रिय खेलकुद परिषद
काठमाडौंः प्रधानमन्त्री केपी शर्मा ओलीले १३ औं दक्षिण एशियाली खेलकुद (साग) समापन भएको भोलिपल्ट प्रधानमन्त्री निवास बालुवाटारको सभाहलमा पदक विजेता खेलाडीलाई बोलाई सरकारले दिने पुरस्कारको घोषणा गरेका छन् ।

कार्यक्रममा राष्ट्रपति विद्यादेवी भण्डारी, खेलकुदमन्त्री जगत विश्वकर्मा, राष्ट्रिय खेलकुद परिषदका सदस्य सचिव रमेश सिलवाल, नेपाल ओलम्पिक कमिटीका अध्यक्ष जीवनराम श्रेष्ठ सहभागी थिए । कास्य जित्नेले ३ लाख, रजत जित्नेले ६ लाख र स्वर्ण जित्नेले ९ लाख रुपैयाँ पाउने ओलीले जानकारी दिए । १ भन्दा बढी स्वर्ण जित्नेले ११ लाख रुपैयाँ पाउने उनको भनाइ थियो । टिम इभेन्टमा स्वर्ण जित्नेले जनही ५ लाख रुपैयाँ पाउने उनले जानकारी दिए ।

नेपाली खेलकुदमा राज्यको तर्फबाट घोषणा भएको सर्वाधिक पुरस्कार राशी सुनेर खेलाडी खुशी भए । तर, टिम इभेन्टमा स्वर्ण जित्नेलाई मात्रै पुरस्कार रकम तोकिँदा र रजत तथा कास्य जित्नेलाई दिइने रकम नतोकिँदा खेलाडी असन्तुष्ट बने ।