विराटचोकः नेपाल मुस्लिम युवा समूहको आयोजनामा शनिबारदेखि सुन्दरहरैंचाको विराटचोकमा प्रथम सुन्दरहरैंचा प्रदेशस्तरीय नकआउट फुटबल प्रतियोगिता हुने भएको छ ।

आयोजकले बिहीबार पत्रकार सम्मलेन गरी दिएको जानकारीअनुसार प्रतियोगितामा ८ ओटा टिम सहभागी हुने भएका छन् । पुस ५ गतेसम्म हुने सो प्रतियोगितामा २० लाख ६६ हजार रुपैयाँ खर्च हुने र ४० प्रतिशत रकम स्थानीय स्तरमै जुटाइने आयोजकको भनाइ छ । सुन्दरहरैंचा नगरपालिकाले २ लाख रुपैयाँ तथा वडा नम्बर ९ को कार्यालयले ४० हजार रुपैयाँ सहयोग गर्ने पनि उनले जानकारी दिए ।

आयोजक संस्थाका अध्यक्ष इफ्तर आलमका अनुसार प्रतियोगिताको विजेता टिमले शिल्डको साथमा नगद २ लाख तथा उपविजेताले शिल्डको साथमा नगद १ लाख रुपैयाँ पुरस्कार पाउनेछन् । त्यस्तै, म्यान अफ द म्याच, बेस्ट प्लेयर, बेस्ट फरवार्डलगायतका विभिन्न विधामा पनि पुरस्कार दिइने उनले जानकारी दिए ।

खेल संयोजक तारिक अन्वरका अनुसार पीएलओ लुब्रिकेन्ट्स मुख्य प्रायोजक रहेको प्रतियोगितामा मोरङ जिल्ला फुटबल सङ्घले प्राविधिक सहयोग गर्ने भएको छ । प्रतियोगिताको उद्घाटन खेल डाँगीहाट युथ क्लब मोरङ र वराहक्षेत्र फुटबल क्लब सुनसरीबीच हुने भएको छ । धनकुटा फुटबल क्लब, नेपाल मुस्लिम युवा समूह विराटचोक, गाईघाट फुटबल क्लब उदयपुर, भाङबाडी फुटबल क्लब झापा, सशस्त्र प्रहरी बल पूर्वाञ्चल र ब्राइट स्पोर्टिङ क्लब सिलिगुढी भारत प्रतियोगिताका अन्य फुटबल टिम रहेका छन् ।

पत्रकार सम्मेलन संचालन गर्दै अर्जुन गजुरेलले  पनि प्रथम सुन्दरहरैंचा प्रदेशस्तरीय नकआउट फुटबल प्रतियोगिता सफल पार्न सबै लाग्नुपर्ने बताए ।

प्रतियोगिताको तयारी धमाधम भइरहेको र बिहीबारसम्ममा सबै तयारी पूरा हुने आयोजकको भनाइ छ ।