धरानः नेपाल पत्रकार महासंघ सुनसरीका उपाध्यक्ष सन्तोष काफ्लेमाथि धरान– १२ स्थित सल्लेरी बचत तथा ऋण सहकारी संस्थाको कार्यालयमा आक्रमण भएको छ । सो सहकारीबाट पीडित भनिएकाले गठन गरेको सङ्घर्ष समितिको समाचार सङ्कलन गर्न ढिला आएको भन्दै उनीमाथि आक्रमण भएको थियो । उनको नाक र आँखामा चोट लागेको छ ।

प्रहरीले घटनास्थलबाट २१ जनालाई नियन्त्रणमा लिएको थियो । पछि पत्रकार काफ्लेको बयानको आधारमा ४ जनाबाहेक अरुलाई आफन्तको जिम्मा लगाइएको छ । इलाका प्रहरी कार्यालय धरानका डीएसपी ढुण्डीराज न्यौपानेका अनुसार आफन्तको जिम्मा लगाइएकालाई शुक्रबार प्रहरी कार्यालयमा उपस्थित गराइनेछ । प्रहरीका अनुसार पत्रकार काफ्लेमाथि आक्रमण गर्ने मुख्य व्यक्ति धरान १ का ३६ वर्षीय नरेश शाही हुन् । उनी सल्लेरी सहकारी पीडित सङ्घर्ष समितिका सचिव हुन् । उनीसहित सङ्घर्ष समितिका अध्यक्ष धरान–१५ का ३८ वर्षीय तुलसीप्रसाद बिक र सदस्य धरान ४ का ४२ वर्षीय दीपक राई र ३५ वर्षीया संगीता राई पक्राउ परेका हुन् ।

यसैबीच, सो घटनाको नेपाल पत्रकार महासंघ सुनसरीसहित विभिन्न पेशागत संगठन र राजनीतिक दलले विज्ञप्ती जारी गरी घटनाको घोर भत्र्सना गरेका छन् । नेपाल पत्रकार महासंघ सुनसरीका सचिव हिमाल दाहालले प्रेस विज्ञप्ती जारी गर्दै घटनाप्रति गम्भीर ध्यानाकर्षण भएको जनाएका छन् । घटनाको निन्दा गर्दै दोषीलाई तत्काल पक्राउ गरी कानुनी कारबाही गर्न प्रशासनसँग माग गरिएको छ ।

प्रेस सेन्टर नेपाल सुनसरी र प्रेस चौतारी नेपाल सुनसरीले संयुक्त विज्ञप्ती जारी गरी घटनाको भत्र्सना गर्दै सञ्चारकर्मीले भयरहित वातावरणमा समाचार सङ्कलन गर्न पाउने अवस्था सिर्जना गर्न माग गरिएको छ ।

नेकपा धरानले पनि विज्ञप्ती जारी गर्दै पत्रकार काफ्लेमाथि भएको आक्रमणको भत्र्सना गरेको छ ।