विराटचोकः नेपाली कांग्रेसका केन्द्रीय सदस्य डा. शेखर कोइरालाले रजिष्टार, उपकुलपति र निर्देशकबीच समन्वय नहुँदा पूर्वाञ्चल विश्वविद्यालयले गति लिन नसकेको आफूले पाएको बताएका छन् ।

बिहीबार नेपाल स्कुल अफ अन्ट्रप्रनरसीपले १० थान अक्सिजन कन्सन्ट्रेटर प्रदान गर्न विश्वविद्यालयको केन्द्रीय कार्यालयमा आयोजित कार्यक्रममा प्रमुख अतिथिको आसनबाट बोल्दै उनले यस्तो बताएका हुन् ।

‘कहिले रजिष्टार र भीसीको, कहिले भीसी र निर्देशकबीच समन्वय यहाँ थिएन । अहिले कस्तो छ त्यो म जान्दिनँ तर केही वर्षअघिसम्म यहाँ त्यस्तै थियो’, उनले भने, ‘उपकुलपति बनेपछि ४ वर्षको कार्यकाल हुन्छ । त्यो समयमा कामै गर्न पाइएन भने उपकुलपति हुनुको अर्थ हुन्नँ ।’

ऐनमा संशोधन गरेर भए पनि विश्वविद्यालयको विकासमा सबै लाग्नुपर्नेमा उनले जोड दिए । सरकारलाई यो विश्वविद्यालयको बारेमा कुनै मतलबै नभएको बताए । आफूले २ वर्ष २० करोडका दरले विश्वविद्यालयलाई बजेट छुट्याउनुहोस् भनेर भने पनि पूर्व प्रधानमन्त्री केपी शर्मा ओलीले बजेटै नछुट्याएको उनको भनाइ थियो ।

‘सरकारले कोशी अञ्चल अस्पताललाई विश्वविद्यालयको शिक्षण अस्पतालको रुपमा ४ वर्षको लागि लिन ४ वर्ष अघि नै चिठी पठाएको थियो’, उनले भने, ‘त्यो चिठी मसँग छ । कोशी अञ्चल अस्पतालसँग पनि होला, विश्वविद्यालयसँग पनि होला । तर त्यो काम किन भएन मैले बुझ्न सकेको छैन ।’

बीपी कोइराला स्वास्थ्य विज्ञान प्रतिष्ठान धरानमा आफू उपकुलपति हुँदा आफूले कसरी सो संस्थाको स्तरोन्नति गरेँ भन्ने पनि उनले सो क्रममा सुनाए । ‘पहिले ३० शैय्याबाट शुरु गर्नुहोस् । त्यसपछि फेरि ३० शैय्या अनि अर्काे वर्ष ४० शैय्या थप्नुहोस्’, उनले भने, ‘मैले धरानमा यसरी नै काम गरेँ ।’

पूर्वाञ्चल विश्वविद्यालयमा शिक्षण अस्पताल बनाउन आवश्यक पर्ने भवन अग्रिम भुक्तानी नगरी बनाउन आफूले ठेकेदारलाई अनुरोध गरेर सहमत गराए पनि प्रक्रिया अघि बढ्न नसकेको पनि उनले बताए । स्थानीयवासीको इच्छाशक्ति भएमा विश्वविद्यालयको स्तरोन्नति हुने उनको भनाइ थियो ।

‘सरकारले सहयोग गर्छ र विश्वविद्यालयको अवस्था सुधार्ने, भौतिक संरचना थप्ने भनेर नलाग्नुहोस्’, प्रमुख अतिथि कोइरालाले सुझाव दिए, ‘काम थाल्नुहोस् अनि हामीले काम थाल्यौँ, अब खर्चको व्यवस्थापन कसरी गर्ने हो भनेर भन्नुहोस् । पहिले बजेट विनियोजन हुन्छ अनि काम गरौँला भन्नुभयो भने कहिल्यै हुँदैन । सरकारले बजेट पठाउँदैन ।’