विराटचोकः मोरङको सुन्दरहरैँचामा एक महिला माथि सामुहिक बलात्कार भएको छ । सुन्दरहरैँचा नगरपालिका वडा नं. ४ स्थित बलियामा सञ्चालित श्रेष्ठ होटल एण्ड फेमली लजमा ३० वर्षीया महिलामाथि सामुहिक बलात्कार भएको जिल्ला प्रहरी कार्यालय मोरङका प्रमुख मन्जिल मुकारुङले बताए । घटनामा संलग्न होटल सञ्चालक ३६ वर्षीय अर्जुन श्रेष्ठ पक्राउ परेका छन् । त्यस्तै उनका भाइ वर्ष २५ का सुरज श्रेष्ठ पनि पक्राउ परेका छन् । उनीहरु अहिले इलाका प्रहरी कार्यालय बेलबारीको नियन्त्रणमा रहेको प्रहरीले जनाएको छ ।

घटनामा संलग्न झापा घर बताउने गाडी चालक रामबहादुर नेपाली फरार छन ्। उनको खोजी जारी रहेको प्रहरीले बताएको छ । पीडक होटज सञ्चालक अर्जुनले पीडितलाई लिएर उपचार गर्न विराटनगर लगेपछि घटना बाहिरिएको थियो र प्रहरीले उनलाई अस्पतालमै पक्राउ गरेको थियो ।

प्रहरीका अनुसार बेलबारी –४ की ३० वर्षीया महिलाले शुक्रबार इटहरीमा काम गर्न थालेकी थिइन् । काम सकेर साँझमा उनी गछियास्थित बहिनीको घर फर्कदै थिइन् । उनी इटहरीबाट बस चढेर शुक्रबार साँझ करीब ६ बजे गछियासम्म पुगिन् । तर बहिनीको घरसम्म पुग्ने बाटो भुलिन् ।

बाटो सोध्दा प्रदेश २–०१–००१ च २२७ नम्बरको गाडीका चालक रामबहादुर नेपालीले बहिनीको घरसम्म पु¥याइदिने भन्दै गाडीमा चढाए । तर उनले गाडी घुमाउँदै श्रेष्ठ होटल एण्ड फेमिली लजमा लगे । सोही लजमा ती महिलामाथि रातभर सामुहिक बलात्कार भएको प्रहरीले जनाएको छ । बलात्कृत महिलाको अत्यधिक रक्तश्राव भएका कारण अवस्था गम्भीर छ । उनलाई कोशी अस्पताल विराटनगरमा भर्ना गरेर उपचार भइरहेको छ ।

शनिबार बिहान महिलाले गछियमा भएकी बहिनीलाई खबर गरेकी थिइन् । बहिनी होटलमा पुगेपछि अस्पताल लान खोज्दा पीडकले धम्क्याएपछि उनले प्रहरीलाई घटनाबारे बताउने भनेपछि घटनामा संलग्न भई फरार रहेका नेपालीले ल्याएको कारमा राखेर श्रेष्ठले अस्पताल लगेका थिए ।

दुई छोरीलाई गछियास्थित बहिनीको घरमा छाडेर काम गर्न गएकी उनलाई कामबाट फर्कने क्रममा अपहरण शैलीमा लगेर बलात्कार गरिएको प्रहरीले जनाएको छ । प्रारम्भिक अनुसन्धानका क्रममा महिलालाई बेहोस बनाएर करणी गरेको देखिएको प्रहरीले बताएको छ । शुक्रबार रातभर सम्पर्क विहीन भएकी महिलाले शनिबार बिहान साढे ८ बजे बहिनीलाई घटना बारेमा जानकारी गराएकी थिइन् ।

पीडित महिलाका ४ वर्ष र १७ महिनाका दुई जना छोरी छन् । पीडित महिला खोटाङबाट गत असोजमा मोरङको बेलबारीमा बसाइँ सरेर आएकी थिइन् ।