विराटचोकः चालु आर्थिक बर्षको पहिलो ६ महिनामा ३ हजार ६ सय २७ मुद्दा दर्ता भएको र १९ करोड भन्दा बढी राजस्व संकलन भएको प्रदेश प्रहरी कार्यालय विराटनगरले जनाएको छ ।

सङ्गठन प्रमुख प्रहरी महानिरीक्षक र प्रदेश प्रहरी प्रमुख प्रहरी नायब महानिरीक्षक तथा प्रदेश प्रहरी प्रमुख र प्रदेशका १४ वटै जिल्लाका प्रहरी प्रमुखहरुबीच कार्य सम्पादन सम्झौताको प्रभावकारी कार्यान्वयन हुँदा सो सफलता मिलेको सो कार्यालयले जनाएको छ । समाजमा हुने आपराधिक घटना, फैसला कार्यान्वयन, भन्सार चोरी निकासी, नदीजन्य पदार्थको अवैध दोहन, अवैध काठ चोरी निकासी र ट्राफिक व्यवस्थापनमा प्रभावकारी रुपमा प्रहरी परिचालन भएअनुसार उल्लेख्य मात्रामा सफलता मिलेको सो कार्यालयले जनाएको छ ।

कार्यालयका अनुसार चालु आर्थिक वर्षको ६ महिनामा ३ हजार ६ सय २७ वटा विभिन्न अपराधसम्बन्धी मुद्दा दर्ता भई कारवाही गरिएको छ । फैसला कार्यान्वयनतर्फ विभिन्न अपराधमा सजाय तथा जरिवाना फैसला भई फरार रहँदै आएका १ हजार १ सय ६८ जना फरार प्रतिवादीहरुलाई पक्राउ गरी ६ सय ३२ वर्ष कैद भुक्तान भई ४ करोड २५ लाख ९० हजार ४ सय ५२ रुपैयाँ राजस्व संकलन भएको कार्यालयले जनाएको छ ।

यसैगरी, अवैध रुपमा सामान चोरी निकासी गर्ने ४७ जना पक्राउ गर्नुका साथै ५ करोड ५८ लाख ८० हजार ५ सय ६७ रुपैयाँ राजस्व संकलन भएको कार्यालयले जानकारी दिएको छ ।

नदीजन्य पदार्थको अवैध रुपमा दोहन गर्ने ३२ जना मानिस र नदीजन्य पदार्थ उत्खनन गर्ने र ओसारपसार गर्ने ५ सय १५ वटा सवारी साधनलाई पक्राउ गर्नुका साथै २० लाख १९ हजार २ सय ५० रुपैयाँ राजस्व संकलन गरेको कार्यालयले जनाएको छ ।

अवैध काठ चोरी निकासी गर्ने ४२ जना मानिस पक्राउ गर्नुका साथै १ हजार ९ सय ५२ क्यू.फिट. काठ बरामद गरी ४४ लाख ४ हजार ६ सय ६६ रुपैयाँ राजस्व सङ्कलन भएको कार्यालयले जनाएको छ ।

यसैगरी ट्राफिक नियम उल्लङ्घन गर्ने १ लाख ३१ हजार ५ सय ७६ वटा सवारी साधनलाई कारवाही गर्दा ८ करोड ५९ लाख ६४ हजार ५ सय रुपैयाँ राजस्व सङ्कलन भएको बताइएको छ ।

३ सय ८२ किलो ८ सय ९९ ग्राम गाँजा, १४ ग्राम ५ सय मिलिग्राम चरेस, १ किलो ४ सय २५ मिलिग्राम ब्राउन सुगर, वबभिन्न मनोद्धिपक क्याप्सलु १० हजार ६८ ट्याब्लेट, मनोद्धिपक एम्पुल ३ हजार ८ सय ७५ क्याप्सुल र मनोद्दीपक औषधीहरु ४ सय ७५ क्याप्सुल नियन्त्रणमा लिइएको सो कार्यालयले जनाएको छ ।

१ हजार ६ सय ६१ रोपनी क्षेत्रफलमा लगाइएको ७ लाख ५१ हजार ७ सय ७८ बोट गाँजा नष्ट गरिएको छ । चालु आर्थिक वर्षको ६ महिनामा १९ करोड ८ लाख ५९ हजार ४ सय ३५ रुपैयाँ राजस्व सङ्कलन भएको सो कार्यालयले जनाएको छ ।