केराबारीः केराबारी गाउँपालिकाको वडा नम्बर २ को सार्वजनिक सुनुवाइ सोमबार सम्पन्न भएको छ । स्वास्थ्य मापदण्डको पालना गर्दै वडा कार्यालयको सभाहलमा सार्वजनिक सुनुवाइ सम्पन्न भएको वडा कार्यालयले जनाएको छ ।

सार्वजनिक सुनुवाइमा वडावासीले राखेका जिज्ञासाको जवाफ दिँदै वडाध्यक्ष प्रेमबहादुर लिम्बूले आफ्नो कार्यकालको शुरुको २ वर्ष महिलाको नाममा राम्रै बजेट विनियोजन भएको बताए । त्यसबेला महिलाहरुले ढाकाको कपडा बुन्ने तालीम लिएका र पहिलो वर्ष तालीम लिएका सबै २० जनालाई दोस्रो वर्ष थप तालीम दिइएको उनले जानकारी दिए । तालीम लिनेहरु सबै जना व्यावसायिक बनेकाले सो तालीम फलदायी भएको उनको भनाइ थियो । त्यसपछि अन्य क्षेत्रमा बढी बजेट विनियोजन हुन थाल्दा महिलालक्षित बजेट विनियोजन नभएको बताउँदै आगामी वर्ष महिलालक्षित बजेट विनियोजन हुने उनले जानकारी गराएका थिए ।

त्यस्तै, छात्रासँग उपाध्यक्ष कार्यक्रममार्फत् यसै वर्षदेखि छात्राका लागि सेनेटरी प्याड उपलब्ध हुने पनि उनले जानकारी दिए । अघिल्लो वर्ष खरीद प्रक्रिया नै अघि नबढेको तर यस पटक खरीद प्रक्रिया अघि बढेकाले चालु आर्थिक वर्षदेखि नै छात्राले सेनेटरी प्याड पाउने उनको भनाइ थियो ।

जेफाले स्वास्थ्य एकाइका स्वास्थ्यकर्मी घरपायक सरुवा भएका र घरपायक सरुवा हुने प्रवृत्तिले सो स्वास्थ्य संस्थामा कम दरबन्दी भएको जानकारी दिँदै अध्यक्ष लिम्बूले आगामी आर्थिक वर्षमा सो कार्यालयमा पूर्ण दरबन्दीमा कर्मचारी कार्यरत रहेको देख्न पाइने बताए ।

त्यस्तै, प्रदेश सरकार र स्थानीय सरकारको आर्थिक सहयोगमा सिंहदेवीमा निर्मित खेलमैदानको स्तरोन्नति भइरहेको पनि उनले जानकारी दिए । सो खेलमैदान क्रिकेटलक्षित खेलमैदान रहेको उनको भनाइ थियो ।

सुनधारा कृषि सहकारीमार्फत् कृषिसम्बन्धी काम भइरहेको उनले जानकारी दिए । चोक्टेमा कफी खेती सफल भएको, एभोकाडो, किबी खेती र तरकारी खेती पनि व्यावसायिक रुपमा भइरहेको तथा ३ वर्षभित्रमा वडालाई अर्गानिक खेती हुने वडाको रुपमा घोषणा गर्ने योजना रहेको उनले बताए ।

२ पटक विज्ञहरुले अनुसन्धान गर्दा पनि अलैँची मर्नुको कारण पत्ता नलाग्दा वडावासी मारमा परेको बताउँदै अलैँची खेतीभन्दा पनि बाख्रापालन र तरकारी खेतीलाई विकल्पको रुपमा अघि सारिएको उनको भनाइ थियो । वडामा कृषि प्राविधिक पनि नभएकाले ससमस्या परेको बताउँदै बाख्रापालनको लागि पकेट क्षेत्र घोषणा गरी काम गर्ने तयारी भइरहेको उनले जानकारी दिए ।

कम बजेटलाई धेरैतिर विनियोजन गर्नुपर्ने बाध्यता वडाको रहेको उनको भनाइ थियो ।

कार्यक्रममा वडा सचिव रत्नबहादुर बुढाथोकीले चालु आर्थिक वर्षको हालसम्मको पञ्जीकरणसम्बन्धी विवरण प्रस्तुत गरेका थिए । वडाले चालु आर्थिक वर्षमा छुट्याएका सबै योजना सम्झौताको लागि सिफारिश गरिसकिएको पनि उनले जानकारी दिए ।

विराट मिडिया एण्ड एड्भरटाइजिङ प्रालिको सहजीकरणमा भएको कार्यक्रममा वडा सदस्यहरु खगेन्द्रप्रसाद जमरकट्टेल, दुर्गामाया राई र बालकुमारी नेपाली, वडा सचिव रत्नबहादुर बुढाथोकी (रञ्जित), प्राविधिक जीवन तिम्सिनालगायत उपस्थित थिए ।

कोभिड १९ को बढ्दो संक्रमणलाई ध्यानमा राखी स्वास्थ्य मापदण्ड अपनाएर भएको कार्यक्रममा विभिन्न विद्यालयका प्रधानाध्यापक, टोल विकास संस्थाका प्रतिनिधि, विभिन्न योजनाका उपभोक्ता समितिका प्रतिनिधि, विभिन्न राजनीतिक दलका प्रतिनिधिलगायतको उपस्थिति थियो ।