धनकुटाः धनकुटाको महालक्ष्मी नगरपालिकाले नगरक्षेत्रका ज्येष्ठ नागरिकहरुलाई फाइबर सिरक वितरण गर्न थालेको छ ।

ज्येष्ठ नागरिकहरुलाई जाडो याममा न्यानो प्रदान गर्न नगर क्षेत्रका ८० वर्षमाथिका सबै ज्येष्ठ नागरिकलाई सिरक वितरण गरिने भएको हो । शुक्रबार नगरपालिकाले यो अभियान वडा नं.७ बाट शुरु गरेको छ । पहिलो दिन वडा नं.७ का १० जनालाई सिरक वितरण गरिएको बताइएको छ ।

कार्यक्रममा महालक्ष्मी नगरपालिकाका प्रमुख पर्शुराम नेपाल, प्रमुख प्रशासकीय अधिकृत लीलाराज श्रेष्ठ, सहायक महिला विकास निरीक्षक गीता लुइँटेल लगायतले सिरक वितरण गरेका थिए ।

सिरक वितरण कार्यक्रममा बोल्दै नगर प्रमुख नेपालले जाडो याममा कठ्यांग्रिएर बस्न नपरोस् भनेर ज्येष्ठ नागरिकहरुलाई सिरक वितरण गरिएको बताए । नगरक्षेत्रमा ८० वर्षमाथिका ३ सय ५० ज्येष्ठ नागरिक रहेको नगरपालिकाको तथ्याङ्क छ । उनीहरु सबैलाई सिरक वितरण गरिने नगर प्रमुख नेपालले जानकारी दिए ।

धेरै ज्येष्ठ नागरिकहरु हिँड्न नसक्ने भएकाले उनीहरुको अवस्थाअनुसार घर–घरमै पुगेर वा वडा–वडामा परिवारका सदस्यलाई बोलाएर सिरक वितरण गर्ने तयारी भएको नगरपालिकाले जनाएको छ ।

सिरक वितरणका लागि वडा कार्यालयहरुमार्फत् ८० बर्षमाथिका ज्येष्ठ नागरिकको तथ्यांक संकलन गरिएको थियो । सो तथ्यांकका आधारमा सिरक वितरण गरिने नगरपालिकाले जनाएको छ ।

नगरपालिकाले यसअघि पनि ज्येष्ठ नागरिकलक्षित विभिन्न कार्यक्रम सञ्चालन गर्दै आएको छ ।