विराटनगरः विराटनगरमा रातो पाटी अनलाइनको प्रदेश कार्यालय उद्घाटन गरिएको छ । प्रदेश १ का सभामुख प्रदीपकुमार भण्डारीले राजनीतिक परिवर्तनमा पत्रकारहरुले महत्वपूर्ण भूमिका खेलेको बताए । उनले अहिले विभिन्न सामाजिक सञ्जाल र युट्युबमा आएको भ्रमपूर्ण प्रचारबाजीले व्यावसायिक पत्रकारहरुमा आक्रमण भइरहेको प्रति सजग हुनुपर्नेमा जोड दिए ।
विराटनगर महानगरपालिकाका प्रमुख भीम पराजुलीले रातोपाटी अनलाइनले पत्रकारितामा छुट्टै पहिचान बनाएको बताए ।
मोरङका प्रमुख जिल्ला अधिकारी काशीराज दाहालले जनसरोकारका विषयमा राज्यलाई घच्घच्याउने काम सञ्चारमाध्यामले गर्नुपर्ने बताए । उनले अत्यावश्यक विधेयकहरु नल्याएर स्वार्थअनुकूल अध्यादेश सरकारले ल्याउने गरेकोतिर पनि संचारमाध्यामले ध्यान दिनुपर्ने बताए । नागरिकताको विषय, विकास निर्माणको विषयमा अझै पनि पत्रकारिताले राज्यलाई दबाब दिनुपर्ने उनको धारणा थियो ।
रातोपाटीका संस्थापक अध्यक्ष ओम शर्माले विराटनगर र प्रदेश १ को सवाललाई सम्बोधन गराउनका लागि राज्यलाई घच्घच्याउने काम आफूले गर्ने प्रतिबद्धता व्यक्त गरे ।
रातोपाटीका प्रधान सम्पादक अरुण बरालले रातोपाटीको प्रदेश १ पोर्टलको रुपमा छुट्टै विकास गर्न लागेको जानकारी दिए । उनले प्रदेश १ को हरेक विषयलाई स्थान दिन र विकास निर्माणमा बहस सिर्जना गर्न आफूहरु लाग्ने बताए ।
कार्यक्रममा नेकपा (एकीकृत समाजवादी)का पोलिटब्युरो सदस्य महेश रेग्मी, पत्रकार महासंघ प्रदेश १ का अध्यक्ष लीलाबल्लभ घिमिरे, जनता समाजवादी पार्टीका केन्द्रीय परिषद् सदस्य उमेश यादव, नेकपा एमाले विराटनगरका अध्यक्ष सागर थापा, नेकपा (माओवादी केन्द्र) विराटनगरकी सचिव नमिता न्यौपानेलगायतले शुभकामना व्यक्त गरेका थिए ।
You must be logged in to post a comment Login