विराटचोकः सम्मानजनक गठबन्धन नभएको भन्दै नेकपा एकीकृत समाजवादीले सुन्दरहरैंचा नगरपालिकामा गठबन्धन नगर्ने भएको छ । एकीकृत समाजवादीले सुन्दरहरैंचामा नगर उपप्रमुखसहित केही वडाध्यक्ष आफूले पाउनुपर्ने दाबी गरेको थियो । तर, नेपाली कांग्रेस र नेकपा माओवादी केन्द्रबीच गठबन्धन भएपछि एकीकृत समाजवादी गठबन्धनबाट बाहिरिएको हो ।
‘हामीले पहिलेदेखि नै सम्बन्धित गठबन्धनको पक्षमा छौँ भनेका थियौँ,’ एकीकृत समाजवादीका नगर अध्यक्ष तथा उपप्रमुख पदका उम्मेद्वार महेश आचार्यले भने, ‘तर, गठबन्धनको नाममा हामीलाई पाखा लगाउने काम भयो । तैपनि अन्तिम समयसम्म हामी गठबन्धनको पक्षमा थियौँ । अब त्यो पनि समाप्त भयो । गठबन्धनमा बेइमानी देखियो ।’
गठबन्धनको गृहकार्य औपचारिक रुपमा सकिएको संकेत आचार्यले आज दिउँसो ४ बजे सामाजिक सञ्जाल फेसबुकमा स्टाटस लेखेर गरेका छन् । उनले लेखेका छन्, ‘नेकपा एस सुन्दरहरैंचाका सबै पदका उम्मेद्वारहरु प्रतिबद्ध र कटिबद्ध भई आफ्नु चुनाव चिन्ह र पदमा मत माग्नुहोला । म तपाईँहरुको साथमा छु ।’
कांग्रेसमा आन्तरिक कलह देखियोः माओवादी केन्द्र
यता, नेकपा माओवादी केन्द्रका नगर अध्यक्ष दुष्यान्त भट्टराई नेपाली कांग्रेसमा देखिएको आन्तरिक कलहले गठबन्धनमा समस्या आएको बताउँछन् । नगर प्रमुखमा नेपाली कांग्रेसलाई र उपप्रमुखमा माओवादी केन्द्रलाई जिताउने गरी गठबन्धन भए पनि वडा तहमा भने कांग्रेसको कलहका कारण गठबन्धनमा समस्या आएको उनको भनाइ छ । कांग्रेसको देउवा पक्षधर गठबन्धनमा लचक देखिए पनि कोइराला पक्षधर गठबन्धनको विपक्षमा देखिएको उनले बताए ।
‘एकीकृत समाजवादी, माओवादी केन्द्र र कांग्रेसको भोट नबाँडियोस् भन्ने हाम्रो चाहना हो,’ भट्टराईले भने, ‘तर, कांग्रेसको हठका कारण वडा तहमा गठबन्धन गर्न समस्या देखिएको छ ।’ वडा नम्बर १० का उम्मेद्वार र उपमेयरमा माओवादी केन्द्रलाई सघाउन तयार भएमा अरु केही वडामा एकीकृत समाजवादीलाई सघाउन माओवादी तयार रहेको उनले जानकारी दिए ।
जनता समाजवादी र माओवादी केन्द्रबीच पनि गठबन्धन
सुन्दरहरैंचामा नेकपा माओवादी केन्द्र र जनता समाजवादीबीच पनि गठबन्धन भएको छ । भट्टराईका अनुसार वडा नम्बर ५ र ६ मा जनता समाजवादीलाई सघाउने पार्टीको नीतिअनुरुप ती वडामा नेकपा माओवादी केन्द्रले वडाध्यक्षमा उम्मेद्वारी दिएको छैन ।
‘वडा नम्बर ५ र ६ मा माओवादीले जनता समाजवादीलाई सघाउने निर्णय भएको छ’, नेकपा माओवादीका नगर अध्यक्ष भट्टराईले भने, ‘नगरका बाँकी वडामा जनता समाजवादीले नेकपा माओवादीलाई सघाउने निर्णय भएको छ ।’
यता, नेपाली कांग्रेस र नेकपा माओवादी केन्द्रले पनि नगर प्रमुख र नगर उप प्रमुखमा मात्रै गठबन्धन भएको जनाएको छ । वडा तहमा भने सम्बन्धित वडाकै सभापतिले त्यसको निर्णय गर्ने गरी जिम्मा दिइएको नेपाली कांग्रेस सुन्दरहरैंचाका सचिव होमनाथ पोखरेलले बताए ।
You must be logged in to post a comment Login