धरानः सामाजिक सञ्जालको दुरुपयोग गरेर भ्रामक, चरित्रहत्या गर्ने प्रयासले एमालेहरुले पराजित मानसिकता प्रदर्शन गर्न थालेको नेपाली कांग्रेसका धरान उपमहानगर सभापति श्याम पोखरेलले बताएका छन् ।
मेयरका उम्मेदवारहरुसँग कुराकानी गर्न भएको टेलिभिजन कार्यक्रममा सुनियोजित रुपमा युवा संघका कार्यकर्ताले गठबन्धनका मेयरको उम्मेदवार किशोर राईसंग अनावश्यक प्रश्न गरेको उनको भनाइ थियो । गठबन्धनबाट मेयर पदका उम्मेदवार किशोर राईले दिएले जवाफको सबै भाग काटेर सानो अंश मात्र राखी जनतामा भ्रम छर्ने र वर्तमान मेयर तिलक राई समेतको चरित्रहत्या गर्न खोजिएको देखिएको उनले बताए । यस्तो प्रचार एमालेको पराजित मानसिकताको उदाहरण भएको उनले आरोप लगाए ।
पाँच दलीय गठबन्धनको चुनावी प्रचार समिति गठनका लागि बुधबार होटल सेछमा बसेको संयुक्त बैठकमा उनले सो कुरा बताएका हुन् । सभापति पोखरेलले स्वर्गीय मेयर तारा सुब्बाको निधनपछि कार्यवाहक मेयर बनेकी मञ्जु भण्डारीबाट भएका गल्तीलाई ढाकछोप गरी ओझेलमा पार्न एमालेले गलत हतकण्डा अपनाउन थालेको उनको भनाइ थियो ।
बैठकमा नेकपा मओवादी केन्द्रका युवा नेता अशोक राईले एमालेको प्रतिगामी प्रवृत्ति विरुद्ध पाँच दलीय गठबन्धन भएको बताउँदै चुनावको परिणामले यस्को दरो जवाफ दिने बताए ।
बैठकले सभापति पोखरेल संयोजक, प्रेस सेन्टरका केन्द्रीय सदस्य केशव घिमिरे सहसंयोजक रहेको ३६ सदस्यीय गठबन्धन चुनावी प्रचार समिति गठन गरेको छ । समितिलाई जनता समाजवादी पार्टी र नेकपा एकीकृत समाजवादी पार्टीका पदाधिकारी, सदस्य थप गरी पूर्णता दिने निर्णय गरिएको छ ।
You must be logged in to post a comment Login