विराटचोकः बैंकले ब्याजदर बढाउँदा व्यावसायिक क्षेत्र धराशायी बन्दै गएका छन् । कोभिडका कारण थलिएको व्यावसायिक क्षेत्र अहिले बैंकको ब्याजदरका कारण पलायन हुने अवस्थामा पुगेको व्यवसायी बताउँछन् ।

मोरङको सुन्दरहरैँचा उद्योग वाणिज्य संघले बिहीबार आफ्नो क्षेत्रमा रहेका उद्योगी, व्यवसायीसँग गरेको छलफलमा आफ्ना भनाई राख्दै उनीहरुले व्यवसाय क्षेत्र धराशायी बन्दै गएको बताएका हुन् ।

७ र ८ प्रतिशतदेखि बढीमा १२ प्रतिशतसम्म व्यावसायिक क्षेत्रको ब्याजदर रहेकामा अहिले यो बढेर १७ प्रतिशतसम्म पुगेको भन्दै उनीहरु चिन्तित भएका हुन् । यसले गर्दा व्यवसायी पलायन हुने अवस्थामा पुगेको संघका अध्यक्ष कृष्णप्रसाद रिजालले बताए । अब व्यवसायीका साथै कार्यसमितिका सबै सदस्य बैंक तथा वित्तीय संस्थाको आतङ्कका विरुद्धमा कडा रुपमा प्रस्तुत हुनुपर्ने उनको भनाइ थियो ।

वाणिज्य संघका पूर्व अध्यक्ष उद्योगी भोलेश्वर दुलालले मध्यम वर्गका व्यवसायी धेरै मर्कामा परेको बताए । बैंकले अहिले ब्याज दर दिनानुदिन बढाउँदै जाने तथा १ करोडको कारोबार गरेमा मात्रै २० लाख रुपैँया ऋण दिने योग्य मानिने राष्ट्र बैकको निर्देशनले पहिल्यै ऋण लिनेको ऋण नवीकरण नहुने अवस्था आएको उनले बताए । सोही कारण ९५ प्रतिशत सुन्दरहरैंचाका व्यवसायीको सम्पत्ति लिलामीमा जाने अवस्था देखिएको दुलालले बताए ।

हिजोका दिनमा सामान्य कोठाभाडामा सानो सटर लिएर बसेकालाई जथाभावी ऋण दिएकोमा अहिले दिनानुदिन बिहान बेलुकै पैसा माग्न घरघरमा वित्तीय संस्थाका प्रतिनिधि आउने गरेकाले व्यवसायी मर्कामा परेको उनले बताए ।

सुन्दरहरैंचामा ६०\७० अर्ब लगानी गर्दा ५ प्रतिशत मात्रै प्रतिफल हुने अवस्था रहेकाले बैंकले झन् टाइट गर्ने र अझ भयावह अवस्था आउन लागेकोमा उनले चिन्ता व्यक्त गरे ।

अब बैंकलाई किस्ता तिर्ने समय अवधि बढाउन सके व्यवसायीलाई केही सहज अवस्था आउने उनको भनाइ थियो । सेवा शुल्कका नाममा साना व्यवसायीलाई मनोमानी रुपमा ऋण दिने गरेको उनले दाबी गरेका छन् । अब बैंक नसच्चिए कडाभन्दा कडा आन्दोलन गर्नुपर्ने अवस्था आएको समेत दुलालको भनाइ थियो ।

‘हिजो बाटोमा हिँड्ने व्यवसायीलाई बोलाइबोलाई पैसा दिने बैंकले आज १ दिन ढिला हुँदा कालो सूचीमा राख्ने हर्कतका विरुद्ध सबैले आवाज उठाउनुपर्ने बताए । २०५३ सालदेखि दुई वर्ष यस्तै अवस्था थेगेर आएकाले अब राज्यले यस विषयमा नसोच्ने हो भने बैंकबाट ऋण लिएर व्यवसाय गर्न कठिन हुने अवस्था आएको उनले बताए ।

यस्तै, उद्योगी ज्ञानप्रसाद ढकालले आफ्नै जग्गा बेचेर ऋण तिर्छु भदा पनि नपाइने भएकाले यो समस्या सरकारका कारण भएको बताए ।

व्यवसायी नगेन्द्र दाहालले ९ प्रतिशतमा लिएको ऋण ३ वर्षभित्र १४ प्रतिशत पुगेको बताए । जग्गाको वर्गीकरण गर्न स्थानीय सरकारको ज्ञानमा कमी हुँदा पनि समस्या आएको उनको भनाइ थियो । आफ्नै पैसा जग्गामा अड्किएकाले धेरै व्यवसायी छटपटीमा रहेको बताए । व्यवसाय देखाएर ऋण लिने र जग्गामा हाल्ने गरेकाले पनि समस्या आएको उनको भनाइ थियो । बैंकको दिनानुदिन ब्याजबाट नाफा बढेको तर व्यवसायी चाहिँ टाट पल्टिने अवस्था आएको उनले बताए ।

सुन्दरहरैंचा उद्योग वाणिज्य संघको पहलमा भएको कार्यक्रममा मनोमानी ढङ्गले ब्याज असुल गर्ने, मानसिक तनाव र टर्चर दिनेजस्ता कार्यको बिरुद्ध आन्दोलनमा जाने निर्णय भएको छ । पहिलो चरणको दबाब कार्यक्रम अन्तर्गत प्रत्येक १ घण्टा बैंक बन्द गर्ने, संघको तर्फबाट छाता सङ्गठनमा ध्यानाकर्षण गराउने जनाएको छ ।

त्यसैगरी, कालो ब्यानरसहित कालोपट्टी बाँधेर शान्ति पदयात्रा गर्ने, व्यवसायीहरुको समस्या प्रत्यक्ष बुझ्ने गरी पुनः सबै व्यवसायीलाई समेटेर छलफल चलाउने लगायत तय गरिएको बताइएको छ । त्यस्तै समस्याको समाधान नगरे चरणबद्ध आन्दोलनलाई थप बृहत ढङ्गले लैजाने समेत बताएको छ ।

कार्यक्रम सुन्दरहरैँचा उद्योग वाणिज्य संघका अध्यक्ष कृष्णप्रसाद रिजालको अध्यक्षतामा भएको थियो । कार्यक्रमको सञ्चालन महासचिव नारायण कार्कीले गरेका थिए । छलफलमा संघका पदाधिकारी, पूर्व अध्यक्ष, उद्योगी व्यवसायी रहेका थिए । कार्यक्रम संघको सभाहलमा भएको थियो ।