बेलबारीः मोरङको क्षेत्र नम्बर ३ को प्रदेश सभा (ख) मा नेकपा एकीकृत समाजवादीको तर्फबाट उम्मेद्वार रहेका लक्ष्मीकुमार श्रेष्ठले मरेको बाख्रालाई जुम्राले छोडेजस्तै नेकपा एमालेका मतदाताले छोड्न थालेको बताएका छन् ।

‘मतदाताले भोट नदिने बुझेपछि एमालेका उम्मेद्वार नुन खाएको कुखुराजस्तै हुनुभएको छ’, मोरङको बेलबारीस्थित नक्सलबारीमा आयोजित चुनावी कोणसभालाई सम्बोधन गर्दै श्रेष्ठले भने, ‘एमालेलाई बहुमत दिँदा सनक चढेर झण्डै संसद विघटन भएको थियो । अब फेरि किन एमालेलाई मत दिने ?’

नेकपा एमाले केपी ओलीको प्राइभेट कम्पनीजस्तै भइसकेको भन्दै ओलीले भनेको नमाने फेरि पनि संसद विघटन हुने हुनाले एमालेलाई मत नदिन मतदातालाई उनले अनुरोध गरे ।

नक्सलबारीमा लोहन्द्रा खोलको कटानको समस्या रहेकाले गठबन्धनका उम्मेद्वार विजयी भएपछि तटबन्धनको काम गर्ने बताए । नक्सालबारीमा झोलुङ्गे पुल निर्माण, त्यहाँको शिक्षालयमा गुणस्तरीय शिक्षाको व्यवस्थालगायतका काम पनि आफूले गर्ने उनले उद्घोष गरे ।

कोणसभालाई क्षेत्र नम्बर ३ का प्रतिनिधि सभाका उम्मेद्वार नेपाली कांग्रेसका डा. सुनिल शर्मा तथा सुन्दरहरैंचाका निवर्तमान मेयर शिवप्रसाद ढकाललगायतले सम्बोधन गरेका थिए ।