फाइल तस्विर

विराटनगरः प्रदेश नंं.१ का मुख्यमन्त्री शेरधन राईले प्रदेशलाई उत्कृष्ट पर्यटकीयस्थलको रूपमा विकास गरिने बताएका छन् ।

नेपाल भ्रमण वर्ष २०२० को तयारीको विषयमा जानकारी गराउने उद्देश्यले प्रदेशस्तरीय पर्यटन प्रवद्र्धन समितिद्वारा आयोजित कार्यक्रममा उनले यस्तो बतएका हुन् । सरकारले छनोट गरेको १ सय गन्तव्य स्थानमध्ये प्रदेश नं. १ मा १६ स्थान रहेको र यी सबै स्थानलाई पर्यटकीयस्थलको रूपमा विकास गर्न गुरुयोजना बनाउन लागेको उनको भनाइ थियो ।

मुख्यमन्त्री राईले यस प्रदेशमा पाँच लाख पर्यटक भित्र्याउन प्रदेश सरकारले आफ्ना कार्ययोजनासहित अघि बढ्न समितिलाई निर्देशन दिँदै पर्यटन वर्षभरिमा गरिने कार्यको पनि सूची सार्वजनिक गर्न निर्देशन दिए । प्रदेशस्तरीय पर्यटन प्रवद्र्धन समितिका संयोजक एवं उद्योग पर्यटन, वन तथा वातावरणमन्त्री जगदीश कुसियतले पर्यटकीय क्षेत्रको विकासबाट नै देशको अर्थतन्त्र बलियो हुने बताए ।

उद्योग, पर्यटन, वन तथा वातावरण सचिव सञ्जीव राईले पुस १६ गते स्थानीय शहीद रङ्गशालामा पर्यटन वर्ष २०२० को शुभारम्भ हुने जनाए । होटल व्यवसायी सङ्घ विराटनगरका अध्यक्ष राजन श्रेष्ठले एक वर्षमा आउने पर्यटकलाई खानामा १५ प्रतिशत र बासमा २० प्रतिशत छुट दिने निर्णय भएको बताए ।