काठमाडौंः नेपाल अन्तर्राष्ट्रिय नाट्य महोत्सव २०७९ (निटफेस्ट २०२२) को दोस्रो संस्करण शुरु भएको छ । शुक्रबार काठमाडौंस्थित मण्डला थिएटरमा राष्ट्रिय तथा अन्तर्राष्ट्रिय अतिथि तथा सहभागीबीच महोत्सवको उद्घाटन भएको हो ।

सामाजिक रुपान्तरणको लागि रङ्गमञ्चः विविधिताको उत्सव भन्ने नाराका साथ भारतीय रंगकर्मी तथा अभिनेत्री शबाना आजमीको विशेष आतिथ्यतामा संस्कृति, पर्यटन तथा नागरिक उड्ययन मन्त्री जीवनराम श्रेष्ठले महोत्सवको उद्घाटन गरेका हुन् ।

समारोहमा काठमाडौं महानगरपालिकाका प्रमुख बालेन्द्र शाह, नेपाल पर्यटन बोर्डका कार्यकारी प्रमुख धनञ्जय रेग्मी, जिआइजेड नागरिक शान्ति सेवाकी स्टेफिन थेइसलगायतले महोत्सवलाई शुभकामना दिएका थिए ।

मन्त्री श्रेष्ठले नेपालको कला–संस्कृति प्रवद्र्धन र विकासका लागि नाट्य महोत्सवको उल्लेखनीय भूमिका हुने विश्वास व्यक्त गरे ।

मेयर बालेन्द्र शाहले एउटा नगरपालिका समृद्ध हुनका लागि कलाका गतिविधिहरु पनि उत्तिकै हुनुपर्ने महसुस गरेको बताए ।

भारतीय अभिनेत्री शबाना आजमीले नेपालमा आफू नाटकको महोत्सवमा सहभागी हुन पाउनु खुशीको कुरा रहेको बताउँदै नेपालमा कलाकारहरु मिलेर आफै नाटकघर निर्माण गर्नु र नियमित नाटक मञ्चन हुनु तथा महोत्सव गर्ने आँट गर्नु सह्रानीय भएको बताइन् । महोत्सवको निरन्तरताको उनले कामना गरिन् ।

महोत्सवका निर्देशक रंगकर्मी सिर्जना सुब्बाले महोत्सवलाई सबै मिलेर उल्लासमय रुपमा मनाउन आह्वान गर्दै रङ्गमञ्चले पाएको मायाप्रति आभार व्यक्त गरिन् ।

समुद्घाटनका क्रममा मण्डला थिएटरले आयोजना गरेको नाटक लेखन कार्यशालाबाट छानिएका सात नाटकहरुको संग्रह ‘इन्द्रधनुषः यस छिमलका नाटकहरु’ पनि विमोचन भएको थियो । महोत्सवको समुदघाटनको नाटक स्वरुप नयनराज पाण्डेको कथामा आधारित दिया मास्के निर्देशित नेपाली नाटक ‘कथा कस्तुरी’ मञ्चन गरिएको थियो ।

महोत्सवको पहिलो दिन अनिल सुब्बा निर्देशित अर्को नेपाली नाटक ‘बुद्ध र भिकारी पनि मञ्चन भएको छ । पहिलो दिन बिहान ‘डिभाइजिङ अपेरेटिक ड्रामाटर्जी कार्यशाला’ पनि सम्पन्न गरेको महोत्सवले साँझमा ‘ब्रिथ एण्ड बिट’ शीर्षकमा शलिल सुवेदी र नवरा गुरुङको सांगीतिक कार्यक्रम गरेको थियो ।

महोत्सवमा नेपालसहित भारत, भुटान, श्रीलंका, रुस, इटाली, स्पेन, बेलायत, बेलारुस, इजिप्ट, संयुक्त राज्य अमेरिका, उरुग्वे र अर्जेन्टिनाका नाटकहरु समावेश छन् ।

नाटकको दोस्रो दिन आज दिउँसो १२ र ४ बजे भारतको देस्देमोना रुपकम नाटक मञ्चन हुने भएको छ ।

दिउँसो २ र ६ बजे स्पेन र इटालीको मिस्टर एण्ड मिसेस क्राफ्ट मञ्चन हुने भएको छ ।

साँझ साढे ७ बजे सुप्रसिद्ध अभिनेत्री शबाना आजमीसँगको मास्टर क्लास हुने महोत्सव सदस्य तथा नेपाल अन्तर्राष्ट्रिय नाट्य महोत्सव २०७९ का सञ्चार संयोजक केदार श्रेष्ठले जानकारी दिए ।