विराटचोकः सुन्दरहरैँचा नगरपालिकाका विषयमा सामाजिक सञ्जालमा आएका विषय लगायतका बारेमा स्वतन्त्र युवा अभियानले नगरपालिकासँग अन्तरक्रिया गरेको छ । आइतबार युवा अभियन्ता सरोज नेपालसहितको टोलीले नगरप्रमुख केदारप्रसाद गुरागाई र प्रमुख प्रशासकीय अधिकृत विनोद भटराईसँग नगरपालिकामा भइरहेका काम कार्वाहीका बारेमा चासो राखेको थियो ।

टोलीले नागरिकले पाउने सेवा सुविधा र सामाजिक सञ्जालमा आइरहेका विभिन्न विषयमा हुने टिप्पणीका बारेमा समेत नगरपालिकालाई ध्यानाकर्षण गराएको थियो । सेवा प्रवाहमा ढिलासुस्ती भएको भनी नागरिकले गुनासो राखेपछि आफूहरु नगरपालिकामा बुझ्न आएको अभियन्ता सरोज नेपालले बताए ।

छलफलमा चासो व्यक्त गरेका विषयमा जवाफ दिँदै प्रमुख प्रशासकीय अधिकृत भट्टराईले हाजिर सबैले गरेको, ई हाजीरी चलिरहेको र सामाजिक सञ्जालमा आएको विषयका बारेमा प्रमाणसहित आउन आग्रह गरेका थिए । प्रमुख प्रशासकीय अधिकृत भट्टराईले हाजिरी गर्दा कर्मचारीले समयमै गर्नुपर्ने अन्यथा प्रमुख प्रशासकीयले हाजिरी नगराउने कानुनी आधार रहेको समेत बताएका थिए ।

यस्तै, तीन लाख रुपैयाँको रक्सीको बिलका सम्बन्धमा प्रमाणसहित आउन आरोपीलाई उनले आग्रह गरेका छन् । बिना आधार नगरको गरिमासँग जोडिएका विषयमा अभिव्यक्ति दिनु वाञ्छनीय नहुने उनको भनाइ थियो ।

छलफलमा नगरप्रमुख गुरागाईले नगरको विकास र समृद्धि तथा सुशासनलाई कायम राख्न युवाले आवाज उठाउनुपर्ने बताए । स्थानीय सरकारले दिने सेवा प्रवाहका विषयमा आवाज उठाउने सबै पक्षलाई उनले धन्यवाद दिएका थिए । उनले ठोस प्रमाणसहति आए जोसुकैबाट गल्ती भएको भए पनि कार्वाही गर्ने प्रतिबद्धता व्यक्त गरेका थिए ।

पूर्व नगरप्रमुखले आफूलाई बिर्सिएर अभिव्यक्ति दिएको समेत उनले बताए । मेयर गुरागाईले विकास निर्माणका बारेमा जानकारी दिएका थिए ।

यस्तै सिटी सफारी दर्ता प्रक्रिया र उनीहरुका समस्यामा समेत अभियन्ताले आवाज उठाएका थिए ।

शुक्रबार आफूहरुले हाजिरी गर्न नपाएको भनी केही कर्मचारीले गुनासो गरेका थिए ।

शुक्रबार पूर्व नगरप्रमुख शिवप्रसाद ढकालले नगरपालिकाका मेयर केदारप्रसाद गुरागाईँ र प्रमुख प्रशासकीय अधिकृत विनोद भट्टाराईप्रति विभिन्न आरोप लगाउँदै सामाजिक सञ्जालमा यस्तो स्टाटस लेखेका थिए ।

सम्बन्धित समाचारः

निवर्तमान मेयर ढकालले लगाएका आरोप निराधारः प्रमुख प्रशासकीय अधिकृत