विराटनगरः खेलमार्फत् देशको गरिमा बढाउने खेलाडीको जिम्मा राज्यले लिने प्रदेश नम्बर १ का प्रमुख सोमनाथ अधिकारी प्यासीले बताएका छन् ।

विराटनगरमा प्रदेश नं १ आइटिएफ तेक्वान्दो सङ्घद्वारा आयोजित कार्यक्रममा उनले यस्तो बताएका हुन् । रामेछापको खाँडादेवी गाउँपालिका –७ , गाल्पामा सम्पन्न २० औँ राष्ट्रिय सिनियर आइटिएफ तेक्वान्दो प्रतियोगितामा प्रदेश १ बाट सहभागी भई पदक विजेता खेलाडीलाई सम्मान गर्दै उनले यस्तो बताएका हुन् ।

प्रतियोगितामा पदक जित्न सफल २२ खेलाडीलाई माला, खादा र सम्मानपत्रद्वारा सम्मान गरिएको थियो । प्रदेश प्रमुख प्यासीले ग्रुप स्पायरिङको पुरुष विधामा स्वर्णपदक प्राप्त गर्ने भुवन मगर, दिलन राई, वीरबहादुर तामाङ, हीराधन राई र सुरज चौधरीलाई सम्मान गरेका थिए ।
त्यस्तै, पुरुष एकल स्पायरिङको ८० केजी माथिको तौल समूहमा स्वर्ण पदक प्राप्त गर्ने रोशन मगर र ६० देखि ६५ केजी तौल समूहमा स्वर्णपदक प्राप्त गर्ने आशिष मगर तथा महिला एकल प्याटन ब्ल्याक बेल्ट फष्ट डानतर्फ स्वर्णपदक प्राप्त गर्ने केरिसा आचार्यलाई पनि उनले सम्मान गरेका थिए ।

पुरुष ग्रुप प्याटनतर्फ रजत पदक प्राप्त गर्ने सङ्गीत राई, आशिष तामाङ, अभय राई, मिसन श्रेष्ठ र विक्रम श्रेष्ठ तथा पुरुष एकल प्याटन ब्ल्याक बेल्ट तेस्रो डानतर्फ रजत प्राप्त गर्ने अर्जुन चौधरी पनि सो अवसरमा सम्मानित भए । महिला ग्रुप स्पायरिङतर्फ कास्यपदक प्राप्त गर्ने अमिसा तामाङ, भावना तामाङ, विपना राई, श्रद्धा आचार्य र रोमिला राई पनि सम्मानित भएका थिए ।

पुरुष एकल स्पायरिङ विधाको ६५ देखि ७० केजी तौल समूहमा कास्यपदक प्राप्त गर्ने निशान खत्री, ५० देखि ५५ केजी तौल समूहमा कास्यपदक प्राप्त गर्ने लोप्सन शेर्पा र महिला एकल स्पायरिङ विधाको ६५ देखि ७० केजी तौल समूहमा कास्यपदक प्राप्त गर्ने भावना तामाङ पनि सम्मानित भएका थिए । प्रतियोगितामा प्रदेश नं १ बाट २६ जना खेलाडी सहभागी भएका थिए ।