सभाखोला (संखुवासभा)ः असार २ गते राति संखुवासभाको हेंवा खोलामा आएको बाढीले बगाएका २० जनाको अवस्था अझै अज्ञात छ । चैनपुर र पाँचखपन नगरपालिकाको सिमाना छुट्याउने हेंवा खोलो कोशी राजमार्गमा रहेको पक्की पुलभन्दा करीब १ किलोमिटर मास्तिर सभा खोलामा मिसिन्छ ।

सो बाढीले बगाएर ल्याएको ढुङ्गा, माटो, रुख र बालुवालगायतका वस्तुले सभा खोलाको सतह १० फुटभन्दा बढी पुरेको स्थानीय बताउँछन् । सभा खोलाको पुलमुनि खाँदबारी नगरपालिकातर्फको भागमा बालुवा थुप्रिएर खोलाको पानी चैनपुर नगरपालिकातर्फको भागमा एकोहोरिएर बगेपछि पुललाई जोखिम हुन सक्ने स्थानीयको अनुमान छ । पुललाई कसरी संरक्षण गर्न सकिन्छ भनेर शुक्रबार प्रदेश सांसद विदुरकुमार लिङ्थेप, प्रमुख जिल्ला अधिकारी शिवबहादुर कार्की, नेपाली सेना, नेपाल प्रहरी र अन्य सरोकारवालालगायतको टोलीले सभा खोलाको निरीक्षण गरेको छ ।

समस्याको रुपमा रहेको बालुवा हटाउन पनि समस्या
फिँजारिएर बगेको सभा खोलाको ठूलो क्षेत्रफल अहिले बाढीले बगाएर ल्याएको माटोका कारण पुरिएको छ । पहिले तीव्र गतिमा बग्ने गरेको सभा खोलाको सतह बाढीले पुरेका कारण अहिले खोलाको पानी मन्द गतिमा बग्ने गरेको छ । जसका कारण पानीको सतह बढे पनि खोलाको सतहमा थुप्रिएको बालुवा पानीले बगाउन नसक्दा अब सानो बाढी आउँदा नै पुल थप जोखिममा पर्न सक्ने टोलीले अनुमान गरेको छ ।

‘यो बालुवा नगरपालिकाले मात्रै उठाउन सक्दैन’, प्रदेश सांसद लिङ्थेपले प्रजिअ कार्कीतर्फ फर्केर भने, ‘यो बालुवालाई जसले सक्छ उसले लगेर थुपार्नको लागि नगरवासीलाई अनुरोध गरौँ । अहिले बालुवा उठाउन दिऔँ, नगरले पछि उनीहरुसँग न्यूनतम राजस्व सङ्कलन गर्छ ।’ कार्कीले लिङ्थेपको प्रस्तावमा मौन समर्थन गरे । तर टोलीमा रहेका इन्जिनियरहरुले बालुवा कमसल गुणस्तरको भएको र भरौटमा मात्रै काम दिने हुनाले व्यवसायीले बालुवा सङ्कलन गर्न सक्ने सम्भावना नरहेको बताए । खोलाको बालुवा पानीले बगाउन पनि नसकेको हुँदा अन्य कुन उपाय गर्ने भनी कुनै निक्र्योल अनुगमन टोलीले निकाल्न सकेन ।

खोलाको पानी २ भङ्गालामा बाँड्ने प्रयास
खोलाले चैनपुर नगरपालिकातर्फ कटान गरेर पुल जोखिममा पार्न सक्ने भएकाले एकोहोरिएर बगेको पानीलाई दुई भङ्गालामा बाँडेर जोखिम घटाउने काम गर्न टोलीले निर्देशन दिएको छ । तत्कालका लागि सोही विकल्प केही हदसम्म उचित हुने देखेर जेसीबी लगाएर पानीको बहावलाई २ धारमा बाँड्ने प्रयास गरिएको प्रजिअ कार्कीले बताए । खोलामा २ वटा जेसीबीले पानीलाई २ धारमा बाँड्ने प्रयास शुक्रबारदेखि गरेका छन् ।

बेपत्ताको खोजी जारी
बाढीमा बेपत्ता भएका व्यक्तिको खोजीका लागि तालीमप्राप्त कुकुरको प्रयोग गरिने पनि प्रजिअ कार्कीले जानकारी दिए ।

बाढीपहिरोका कारण जिल्लाका विभिन्न स्थानका २१ घरपरिवार विस्थापित भएका छन् । तीमध्ये १२ घर पूर्ण क्षति भएका छन् ।