काठमाडौंः १३ औं दक्षिण एशियाली खेलकुद (साग) अन्तर्गत बक्सिङका स्वर्ण विजेता खेलाडीलाई बिहीबार पुरस्कृत गरिएको छ ।

बेलायतमा बस्दै आएका पूर्व बक्सिङ खेलाडी कुश बस्नेतको सहयोगमा स्वर्ण विजेता ३ खेलाडीलाई सम्मान गरिएको हो । नेपाल बक्सिङ सङ्घको सहयोगमा भएको कार्यक्रमको संयोजन वरिष्ठ बक्सिङ प्रशिक्षक ओमकुमार मास्केले गरेका थिए । बस्नेतले मास्केमार्फत् नै पुरस्कार रकम पठाएको बताइएको छ ।

बक्सिङमा २ पुरुष र १ महिला खेलाडीले नेपाललाई स्वर्ण दिलाएका थिए । पुरुष ६० केजीमा सनिल शाही र ६४ केजीमा भुपेन्द्र थापाले स्वर्ण जितेका थिए । महिला ५४ केजीमा मिनु गुरुङले स्वर्ण जितेकी थिइन् । खेलाडीलाई जनही २५ हजार रुपैयाँ प्रदान गरियो ।

राष्ट्रिय खेलकुद परिषद् (राखेप) का सदस्य–सचिव रमेशकुमार सिलवाल, राखेपका सदस्य एवं नेपाल बक्सिङ सङ्घका वरिष्ठ उपाध्यक्ष अर्जुन केसी, नेपाल बक्सिङ सङ्घका अध्यक्ष राम अवालेलगायतले खेलाडीलाई पुरस्कृत गरे ।

सो अवसरमा सदस्य–सचिव सिलवालले पुरस्कार राशीलाई सानो÷ठूलो भनेर तुलना गुर्नभन्दा पनि खेलाडीलाई सम्झनु मुख्य कुरा भएको बताए । सदस्य–सचिव सिलवालले खेलाडीले पाउनु पर्ने सागको पुरस्कार चाँडै दिन आफूले पहल गरिरहेको बताए ।