नझरेका फूलहरूले आफ्नो ५५औँ शृङ्खलामा कविता कन्सर्ट गर्ने भएको छ। पछिल्लो समय चर्चामा रहेकी कवयित्री डा. अस्मिता विष्टलाई कविता कन्सर्ट मार्फत यही मङ्सिर ५ गते नझरेका फूलहरूले प्रस्तुत गर्ने बताइएको छ। कन्सर्ट दिउॅंसो २:१५ बजेदेखि इटहरीको आँपगाछीमा रहेको सङ्गीत साधना प्रतिष्ठान नेपालको हलमा आयोजना हुनेछ।

केही समयअघि मात्र विष्टको ‘ब्ल्याकहोलमा गीतहरू’ नामक कवितासङ्ग्रह प्रकाशित भएको छ। उनका कवितामा समसामयिक जीवन भोगाइका विभिन्न पाटाहरूका साथै नारी मनका कोमल संवेदनाहरू समेटिएका हुन्छन्।

अंग्रेजी साहित्य प्राध्यापन गर्ने डा. विष्ट कविता, समालोचनाका साथै विचारमूलक लेखरचानहरू पनि लेख्ने गर्छिन्। राष्ट्रिय तथा अन्तर्राष्ट्रिय पत्रपत्रिका र जर्नलहरूमा उनका धेरै लेखरचना प्रकाशित भइसकेका छन्।

कविता कन्सर्टको अन्य आकर्षणमा कवि मनु मन्जिल र गायक कृष्णराजा श्रेष्ठ सहित अन्य सर्प्राइज प्रस्तुति समेत रहने नझरेका फूलहरूका परिकल्पनाकार,व्यवस्थापक एवम् संचालक केपी घिमिरेले जानकारी दिएका छन् । कार्यक्रममा दर्शकलाई निशुल्क प्रवेशको व्यवस्था गरिएको छ।

नेपाल आयल नियमले पेट्रोलियम पदार्थको भाउ बढाएको छ । निगमले पेट्रोलमा प्रतिलिटर दुई र डिजेल/मट्टीतेलमा तीन रुपैयाँका दरले भाउ बढाएको हो । बढेको मूल्य गएराति देखि नै लागू भएको छ ।

भारतीय आयल निगमबाट पेट्रोलमा प्रतिलिटर दुई रुपैयाँ ४५ पैसा र डिजेलमा छ रुपैयाँ ५३ पैसा बढेको मूल्यसूची आएको निगमले जनाएको छ । तर, उपभोक्ताको हितलाई मध्यनजर गरी पेट्रोलमा दुई र डिजेलमा तीन रुपैयाँ मात्रै वृद्धि गरिएको निगमले निकालेको विज्ञप्तिमा उल्लेख छ ।

भाउ बढेसँगै अब पहिलो वर्ग चारआली, विराटनगर, जनकपुर, अमलेखगञ्ज, भलवारी, नेपालगन्ज, धनगढी र वीरगन्जमा पेट्रोल प्रतिलिटर एक सय ५८ रुपैयाँ ५० पैसा तथा डिजेल/मट्टीतेल प्रतिलिटर एक सय ४४ रुपैयाँ ५० पैसा, दोस्रो वर्ग सुर्खेत र दाङमा पेट्रोल प्रतिलिटर एक सय ६० रुपैयाँ तथा डिजेल/मट्टीतेल प्रतिलिटर एक सय ४६ रुपैयाँ तथा तेस्रो वर्ग अन्तर्गत काठमाण्डौ, पोखरा र दिपायलमा पेट्रोल प्रतिलिटर एक सय ६१ रुपैयाँ तथा डिजेल/मट्टीतेल प्रतिलिटर एक सय ४७ रुपैयाँ पर्नेछ । खाना पकाउने ग्यासको भाउ यथावत् रहेको छ ।

किरात धर्मावलम्बीका महागुरु फाल्गुनन्दको १४१औँ जन्मजयन्ती आज विविध कार्यक्रम आयोजना गरी मनाइँदैछ।

विसं १९४२ कात्तिक २५ गते इलाममा सामान्य परिवारमा जन्मिएका फाल्गुनन्द किरात धर्म, भाषा, लिपि, संस्कार, संस्कृति र समाज सुधारका महान् अभियन्ता मानिन्छन्।

समाज सुधारका लागि उनले नीति निर्माणसमेत गरेका थिए, जसलाई ‘सत्य धर्म मुचुल्का’ भनिन्छ। यो नीति वि.सं. १९८८ साल वैशाख २४ गते जारी गरिएको थियो।

फाल्गुनन्दको वि.सं. २००५ सालमा निधन भएको हो। किरात समाज सुधारमा पुर्‍याएको उल्लेखनीय योगदानको कदर गर्दै सरकारले वि.सं. २०६६ मङ्सिर १६ गते उनलाई राष्ट्रिय विभूति घोषणा गरेको थियो।

उनको स्मृतिमा किराँती समुदायको बसोबास रहेको ताप्लेजुङ, तेह्रथुम, पाँचथर, इलाम, झापा लगायतका पूर्वी पहाडी जिल्लामा विशेष कार्यक्रम गरी जयन्ती मनाइँदैछ।

त्यस्तै, राजधानी काठमाडौंमा पनि किरात समुदायले विभिन्न सांस्कृतिक तथा धार्मिक कार्यक्रम आयोजना गरी फाल्गुनन्दको सम्झना गरिरहेको किरात ज्योतिष सङ्घका अध्यक्ष चन्द्रकुमार शेर्माले जानकारी दिएका छन्।