विराटचोकः गणेश मन्दिर सेवा समितिको आयोजनामा सलकपुरमा आजदेखि गणेश पुराण शुरु भएको छ ।

गणेश पुराण मूल आयोजक समितिका संयोजक मित्रप्रसाद रिजालका अनुसार पुराणमा ४० लाख रुपैयाँ उठाउने लक्ष्य लिइएको र त्यसमध्ये १० लाख रुपैयाँ खर्च हुने अनुमान गरिएको छ । १५ वर्ष अघिदेखि मन्दिर निर्माणको चर्चा चले पनि अघिल्लो वर्षदेखि भने समिति बनाएर व्यवस्थित तरिकाले शुरु गरिएको उनले बताए ।

सो पुराणमा सङ्कलित रकममध्ये १० लाख रुपैयाँको अक्षयकोष स्थापना गरिने बताइएको छ । १६ धुर जग्गामा बनेको सो मन्दिर निर्माणमा ३० लाख रुपैयाँ खर्च भएको बताइएको छ । जसमा नगरपालिकाले ८ लाख रुपैयाँ सहयोग गरेको र बाँकी रकम चन्दा सङ्कलन गरिएको मन्दिर सेवा समितिले जनाएको छ ।

गणेश मन्दिर सेवा समितिका अध्यक्ष इन्द्रबहादुर चापागाईंका अनुसार जङ्गली हात्तीको आक्रमणमा परी १ जनाको मृत्यु भएपछि गणेश मन्दिर निर्माणको अवधारणा अघि बढेको हो । स्थानीय प्रेमप्रसाद खनाल र राजन दाहालले जग्गा उपलब्ध गराएपछि मन्दिर निर्माण गरिएको उनको भनाइ छ । मन्दिरको गजुर र मूर्ति सुन्दरहरैंचाको हरैँचामोड निवासी देवीप्रसाद पाण्डेले उपलब्ध गराएको उनले बताए ।

आज कलशयात्रा शुरु हुनुपूर्व गरिएको पत्रकार सम्मेलनमा बोल्दै अध्यक्ष चापागाईंले पुराणमा तुलादानको पनि व्यवस्था गरिएको बताए । पुराणमा आएर मन्दिरलाई सहयोग गर्ने दाताहरुलाई सदस्य रकमको आधारमा सम्मान गर्नुको साथै १ लाख १ रुपैयाँभन्दा बढी सहयोग गर्ने दातालाई बाजागाजासहित सलकपुर बजार परिक्रमा गराइनुका साथै दाताका पतिपत्नी र आमाबाबुको नाम पनि शिलालेखमा राखिने निर्णय गरिएको उनले बताए ।

पुराणमा पण्डित लोमसशरण घिमिरे प्रमुख कथावाचक रहेका छन् भने पण्डित पीताम्बर दाहाल उपवाचक रहेका छन् । प्रमुख कथावाचक घिमिरेले गणेश पुराण पनि ब्रह्मपुराण अन्तर्गतकै पुराण भएको बताए ।

सोमबार कलशयात्रा र मण्डप पूजा हुने तथा मङ्गलबार बिहान ७ बजेदेखि ९ बजेसम्म दैनिक पूजा, आरती र पुष्पाञ्जली हुने बताइएको छ । त्यस्तै, १० बजेदेखि ११ बजेसम्म पाठपारायण र ११ बजेदेखि ३ बजेसम्म सङ्गीतमय कथा, झाँकी, आरती र पुष्पाञ्जली तथा साँझ साढे ६ बजेदेखि ९ बजेसम्म महात्म्य वाचन हुने आयोजकले जनाएको छ ।