विराटनगरः सामाजिक विकास मन्त्रालयले विशेष कार्यक्रम सञ्चालन गरी प्रदेश नम्बर १ लाई अपाङ्गतामुक्त बनाउने भएको छ । जसअन्तर्गत पहिलो चरणमा प्रदेशमा २८ स्थानीय तहमा काम भइसकेको मन्त्रालयले जनाएको छ ।

दोस्रो चरणको कार्यक्रमअन्तर्गत सुनसरी, मोरङ, भोजपुर र सङ्खुवासभाका ३१ स्थानीय तहमा कार्यक्रम शुरु भएको मन्त्रालयले जनाएको छ । यो कार्यक्रमले प्रत्येक स्थानीय तहमा रहेका अपाङ्गता भएका व्यक्तिको सूची तयार गर्ने र उनीहरुलाई समाजमा पुनःस्थापना गर्नाका साथै अपाङ्गता भएका बालबालिका जन्मन नदिन पनि सचेतना जागृत गराउने गर्दछ ।

अभियानमा करुणा फाउन्डेशन नेपाल र सामाजिक विकास मन्त्रालयको आर्थिक सहयोग स्थानीय तहको खातामा जाने र अभियानलाई सफल बनाउन स्थानीय तहको भूमिकालाई जवाफदेहिता बनाउने मन्त्रालयको कार्ययोजना रहेको मन्त्रालयले जनाएको छ । कार्यक्रमका लागि प्रदेश सरकारले ६१ लाख ८० हजार, करुणा फाउन्डेशन नेपालले ६२ लाख ४४ हजार र स्थानीय तहहरूले ६१ लाख ८० हजार त्रिपक्षीय रुपमा खर्च गर्न सम्झौता गरिएको छ ।

सामाजिक विकास मन्त्रालयले विराटनगरमा आयोजना गरेको ‘अपाङ्गता रोकथाम तथा पुनःस्थापना’ कार्यक्रमसम्बन्धी अभिमुखीकरण कार्यक्रममा सामाजिक विकास महाशाखा प्रमुख दुर्गा भण्डारी (बराल)ले अपाङ्गताका विविध पक्षमा आफ्ना कार्यपत्र प्रस्तुत गरेकी थिइन् ।

सामाजिक विकासमन्त्री जीवन घिमिरेले प्रदेशमा ४ वर्षभित्रमा अपाङ्गता निर्मूल पार्ने बताएका छन् । उनले समाजमा देखिएका अपाङ्गता भएका व्यक्तिलाई पुनः स्थापना गरी विद्यालयको शिक्षाको गुणस्तरमा पनि वृद्धि गर्ने धारणा राख्दै अपाङ्गता उन्मूलन गर्ने कार्यक्रम महत्वाकाङ्क्षी भएको बताए ।