विराटचोकः पछिल्लो समय नेपालमा कोरोना संक्रमणको दर बढिरहेको छ । संक्रमणको दर बढ्दै जाँदा अस्पतालमा बेड, आईसीयु र भेन्टिलेटरको अभाव हुन थालेको छ । स्वाब परीक्षण गर्ने रिएजेन्ट कीटको अभाव भएका खबर पनि सार्वजनिक भएका छन् ।

यसै क्रममा पछिल्लो समय कोरोना संक्रमितलाई बोक्ने एम्बुलेन्सले आफूखुशी मनपरी भाडा उठाउने गरेका छन् । कतिपय अस्पताल र एम्बुलेन्स चालकको मिलेमतोमा पनि बिरामीलाई ठग्ने गरेको पाइएको छ । बिरामीका आफन्तका अनुसार कतिपय अस्पतालले कोरोनाको बहानामा संक्रमित तथा अन्य बिरामीका परिवारलाई ठग्ने मौका पाउन थालेका छन् ।

आज साँझ सुन्दरहरैंचा नगरपालिका वडा नम्बर ५ को तीनपैनीकी ३९ वर्षीया कोरोना संक्रमित महिलाको विराट नर्सिङ होममा निधन भयो । उनको मृत्यु पुष्टि हुनुअघि अस्पतालले उनलाई विराट टिचिङ अस्पताल रेफर गरेको थियो । तर उनको मृत्यु भइसकेपछि अर्काे अस्पताल रेफर गरिएको हो कि भन्ने शंका गर्ने ठाउँ रहेको संक्रमितका आफन्त र छिमेकी बताउँछन् ।

मृतक महिलाका छिमेकी लक्ष्मी सिग्देलका अनुसार ४ दिनअघि विराट नर्सिङ होममा सिटी स्क्यानिङलगायतका अन्य परीक्षण गरेपछि उनलाई अस्पतालले डिस्चार्ज गरेको थियो । हिजो मंगलबार पुनः जीउ दुख्ने, ज्वरो आउने आदि समस्या आएपछि अस्पतालले स्वाब संकलन गरी पीसीआर परीक्षण गराएको थियो । हिजो ३ बजे उनलाई कोरोना संक्रमण पुष्टि भएको थियो ।

तत्कालै उनलाई आईसीयुमा राख्नुपर्ने भनेर अस्पतालले भने पनि आईसीयु, भेन्टिलेटर केही खालि नभएपछि संक्रमितका परिवार र आफन्त समस्यामा परेका थिए । सिग्देलका अनुसार संक्रमित महिलालाई आज दिउँसो १२–१ बजेतिर आईसीयु खालि भएको भन्दै आईसीयुमा सारिएको थियो । तर, आईसीयुमा पनि उनको उपचार सम्भव नभएपछि भेन्टिलेटरमा राख्नुपर्ने र विराट टिचिङ हस्पिटलमा भेन्टिलेटर रहेको भन्दै उनलाई नर्सिङ होमले विराट टिचिङमा ३ बजेतिर रेफर गरेको थियो ।

एम्बुलेन्स भाडा २० हजार रुपैयाँ
रेफर गरिएको अस्पतालमा लान एम्बुलेन्स खोज्दा नपाइएपछि अस्पतालले नै एम्बुलेन्स मगाएको थियो । अस्पतालले मगाएको एम्बुलेन्सको भाडा सुनेर संक्रमितका परिवार र छिमेकी छक्क परेको सिग्देल बताउँछन् । लगभग ५ किलोमिटर टाढाको दूरीमा रहेको अस्पतालमा संक्रमितलाई लैजानको लागि भाडा २० हजार बताइएको थियो । संक्रमितका परिवार र आफन्तले आपत्ति जनाएपछि २ हजार छुट दिएर १८ हजार रुपैयाँ भाडा तिर्नुपर्ने भनेपछि संक्रमितका परिवारले १८ हजार रुपैयाँ भाडा तिरको सिग्देलले बताए ।

‘हामीलाई त पूरै नाटकजस्तो लाग्यो । अस्पतालले बोलाएको एम्बुलेन्सको भाडा बापतको रकम पनि अस्पतालमा नै जम्मा गर्न लगाइयो । हामीलाई त्यसको बिल पनि दिइएन’ फोन सम्पर्कमा उनले भने, ‘५ किलोमिटरको दूरीमा रहेको ठाउँमा लान २० हजार माग्नु, पछि धेरै बिन्ती गरेपछि २ हजार घटाउनु अनि १८ हजार रुपैयाँ तिरेको बिल अस्पतालले दिन्नँ भन्नु भनेको संक्रमितका आफन्तलाई पीडामाथि पीडा दिएको हो । त्यही पनि घरी एम्बुलेन्स हटाउनु भन्छ, घरी एम्बुलेन्स उता राख्नु भन्छ । प्रशासनको कुरा सुनेर हामी त छक्कै प¥यौँ ।’

रेफर गरेको २ घण्टासम्म साँझ ५ बजेसम्ममा पनि अस्पतालले डिस्चार्ज नगरेपछि आफूहरुले आपत्ति जनाएपछि डाक्टरले भेट्न बोलाएको सिग्देलले बताए । डाक्टरलाई भेटेर ‘हाम्रो बिरामी कि मरिसकेको छ भनेर घोषणा गर्नुपर्याे, कि रेफर गरिएको अस्पतालमा लान एम्बुलेन्सलाई भाडा पनि तिरिसकेको हुनाले डिस्चार्ज गर्नुप¥यो’ भनेपछि बल्ल डाक्टरले मुख खोलेको उनले सुनाए ।

त्यसपछि डाक्टरले बिरामीको बाँच्ने सम्भावना ज्यादै कम रहेको हुनाले अब अन्तिम पटक चेक गर्ने भनी पल्स (धड्कन) जाँचेर संक्रमितलाई मृत घोषित गरेको सिग्देल बताउँछन् । यी सबै घटना हेर्दा अस्पतालको कार्यशैली शंकास्पद देखिएको उनले बताए ।

सुरक्षाकर्मीको राम्रो समन्वय
संक्रमितको मृत्युपछि सुरक्षाकर्मीले राम्रो समन्वय गरेको सिग्देलले बताए । जिल्ला प्रहरी कार्यालय मोरङका एसपी सन्तोष खड्काले आफूहरुलाई संक्रमितको अन्त्येष्टी आफन्तले गर्ने कि सेनालाई गर्न दिने भनेर सोध्नुका साथै आफ्नो संस्कारअनुसार अन्त्येष्टी गर्ने भए दाहसंस्कारस्थल सम्म शव लान समन्वय गर्ने जानकारी दिएको सिग्देलको भनाइ छ । सिग्देलका अनुसार संक्रमितको अन्त्येष्टी भोलि जातीय परम्पराअनुसार हुने भएको छ ।

सुन्दरहरैंचाको तीनपैनीकी कोरोना संक्रमित महिलाको मृत्यु, सुन्दरहरैंचामा मृत्यु हुनेको संख्या ५

मृत्युपछि कोरोना संक्रमण पुष्टि, आफन्त भन्छन्, ‘कोभिड अस्पतालअगाडि अलपत्र अवस्थामा छौँ’