२५ वैशाख, काठमाडौं । थाइल्याण्डमा शुक्रबारदेखि आईसीसी महिला टी-२० विश्वकप एसिया छनोट सुरु हुँदैछ । यस छनोटमा सहभागी हुन नेपाली टोली पनि मलेसिया पुगिसकेको छ ।

९ टोलीबीच हुने यस प्रतियोगिताबाट शीर्ष २ टोली ग्लोबल छनोट चरणमा पुग्ने छन् । ९ टोलीलाई तीन समूहमा विभाजित गरिनेछ र हरेक समूहमा रहने ३ टोलीबीचमा डबल राउण्ड रोबिन लिग हुनेछ ।

प्रतियोगितामा आयोजक थाइल्याण्डसहित नेपाल, हङकङ, यूएई, मलेसिया, बहराइन, कतार, भुटान र कुवेत छन् । नेपाल समूह सी मा हङकङ र बहराइनसँग छ ।

सजिलो छैन यात्रा

नेपाली महिला क्रिकेट टोलीले हालसम्म एसिया छनोट पार गर्न सकेको छैन । यसअघि सन् २०१९, २०२१ र २०२३ मा भएको विश्वकप छनोटमा नेपालले एसिया छनोट पार गर्न सकेको थिएन ।

सन् २०१९ मा लिग चरणमा खेलाइएको एसिया छनोटबाट थाइल्याण्ड अपराजित रहँदै ग्लोबल चरणमा अघि बढेको थियो । नेपाल त्यस प्रतियोगितामा थाइल्याण्डसँग मात्र पराजित भयो ।

त्यस्तै सन् २०२१ को छनोटमा हङकङ र यूएईसँग पराजित हुँदा यूएई अपराजित रहँदै अगाडि बढेको थियो भने सन् २०२३ मा भएको छनोटको सेमिफाइनलमा थाइल्याण्डसँग पराजित हुँदै नेपाल ग्लोबल छनोटबाट वञ्चित भएको थियो ।

यसपटक पनि नेपाललाई एसिया छनोट पार गर्न त्यति सजिलो भने हुनेछैन । नेपालको समूहमा रहेको बहराइन र हङकङमध्ये हङकङ मुख्य चुनौती हुन सक्छ । नेपाल र हङकङबीचको दुई खेलले यस समूहको विजेता टुंगो लगाउने निश्चित छ ।

समूहविजेता हुँदै सुपर ३ मा पुगेमा नेपालको सामना अन्य समूहबाट आउन सक्ने यूएई वा मलेसिया र थाइल्याण्डसँग नै हुने पक्कापक्की छ । त्यहाँ पनि नेपालले कम्तीमा एक खेल जितेमा बल्ल ग्लोबल छनोटमा पुग्ने सम्भावना रहन्छ ।

यस्ता छन् प्रतिद्वन्द्वी

नेपालको समूहमा रहेका हङकङ र बहराइन दुवैसँग नेपालले यसअघि पनि खेलिसकेको छ । बहराइन केही कमजोर प्रतिद्वन्द्वी हो भने हङकङ नेपालसरहकै टिम भन्न सकिन्छ ।

बहराइनसँग नेपालले हालसम्म २ पटक खेल्दा दुवैपटक सहज जित निकालेको छ । नेपालले बहराइनलाई एकपटक १४ रनमा अलआउट गरेर ८ विकेटको जित निकालेको छ भने अर्कोपटक ३१ रनमा अलआउट गर्दै १० विकेटको जित निकालेको छ ।

त्यस्तै हङकङसँग महिला टी-२०आईमा नेपाल ११ पटक भेट हुँदा ५ जित निकालेको छ भने ४ पटक पराजित भएको छ । २ खेल रद्द भएका थिए ।

पछिल्लोपटक नेपालले गत मार्चमा युगाण्डामा भएको चारदेशीय शृंखलामा हङकङसँग खेलेको थियो । त्यहाँ १ जित र १ हारको नतिजा निस्कँदा प्लेअफको एक खेल वर्षाले रद्द भएको थियो ।

आईसीसीको महिला टी-२०आई वरियतामा नेपाल २१औं स्थानमा छ भने हङकङ २२औं तथा बहराइन ७३औं स्थानमा छ ।

भारतमा भएको अभ्यासले सजिलो

कप्तान इन्दु बर्माले भारतमा भएको तयारीले सहयोग पुग्ने बताएकी छन् । ‘भारतमा अभ्यास एकदम सकरात्मक भयो । टिमले केही म्याचहरु पनि खेलेको थियो । राम्रो प्रदर्शनहरू भयो’ उनले भनिन्, ‘थाइल्याण्डमा हुने क्वालिफायरको लागि टिमले जुन तरिकाले क्लियर भिजन तयार गरेको छौं आफूलाई मानसिक रूपले बलियो बनाएका छौं ।’

टिमले फिटनेसमा पनि ध्यान दिएको उनले बताइन् । ‘मुख्य केन्द्रित फिटनेस र टिम समन्वयमा काम गरिरहेका छौं । हाम्रो मुख्य लक्ष्य एसिया छनोट पार गर्ने र अन्तिम लक्ष्य विश्वकप पुग्ने हो’ इन्दुले भनिन् ।

नेपालले डीडीसीएको टिमसँग चार अभ्यास खेल खेल्ने तालिका भएपनि तीन खेल मात्र खेल्यो । एक खेल वर्षाको कारण हुन सकेन । तीनवटै खेलमा नेपाल पराजित भएको थियो । यस्तै आरसीपीएसँग पनि एक अभ्यास खेल खेलेको नेपाल पराजित भएको थियो ।

‘यसपटकको छनोटमा समूह विजेता मात्र सुपर राउण्डमा पुग्ने भएकोले हरेक खेल जित्नुपर्छ, इन्दुले भनिन्, ‘सुरुबाटै मानसिक रुपमा फोकस भएर राम्रो प्रदर्शन दिनुपर्छ । क्वालिफायर पुग्नका लागि हरेक खेल महत्वपूर्ण हुन्छ।’

केही समस्या अझै उस्तै

नेपालले यस छनोटमा सहभागी हुनुअघि धेरै खेलहरू खेलेको छ । नेपालले फेब्रुअरीमा घरेलु मैदानमै थाइल्याण्ड र नेदरल्याण्ड्ससँग ६ खेलको शृंखला खेलेको थियो जहाँ एक जित पनि निकाल्न सकेन ।

त्यस्तै युगाण्डामा भएको नेपाल, युगाण्डा, हङकङ र नामिबिया सम्मिलित वुमन्स डे कपमा नेपाल चौथो भएको थियो । उक्त शृंखलामा नेपालले युगाण्डा र हङकङसँग १-१ जित/हारको नतिजा निकाल्दा नामिबियासँग दुवै खेलमा पराजित भएको थियो ।

त्यस्तै त्यसपछि नेपाल फर्किएर प्रशिक्षण गरेपश्चा्त भारतमा अन्तिम तयारीका लागि गएको थियो जहाँ खेलिएका ५ वटा अभ्यास खेलमध्ये १ जित निकाल्दा ४ हार बेहोरेको थियो ।

खेलको नतिजा हेर्दा नेपाली टोली लयमा देखिँदैन । खेलको नतिजाका बाबजुद नेपालको अन्य पक्षमा देखिएका कमजोरी अझै पनि सुधार हुन सकेको छैन ।

सबैभन्दा मुख्य समस्याको रूपमा रहेको फिल्डिङ र फिटनेसमा अझै पनि नेपाल पछाडि नै रहेको देखिएको छ । भारतमा भएको अभ्यास खेलमा पनि नेपालले क्याच ड्रप, मिसफिल्डजस्ता गल्ती बारम्बार गरिरहेको देख्न सकिन्थ्यो ।

अब थाइल्यायाण्डमा हुने छनोटका लागि नेपालले कमजोर पक्षलाई सिरियस रूपमा सुधार गर्नुपर्ने हुन्छ । अन्यथा नेपालको एसिया छनोट पार गर्ने सपना अझै पनि सपनामै सीमित हुने देखिन्छ ।

***

नेपालले आफ्नो पहिलो खेल शुक्रबार वैशाख २६ मा हङकङसँग खेल्ने छ । त्यसपछि शनिबार बहराइनसँग खेल्नेछ । मंगलबार फेरि हङकङसँग र बुधबार बहराइनसँग खेल्ने तालिका छ ।

प्रतियोगिताका लागि इन्दु बर्माको कप्तानीमा टोली घोषणा भएको छ जस्को उपकप्तानमा पुजा महतो छिन् । टोलीमा अन्य सदस्यहरूमा बिन्दु रावल, सम्झना खड्का, रुबिना क्षेत्री, रोमा थापा, कविता जोशी, रुबी पोदार, राजमती ऐरी कविता कुँवर, सबनम राई, इश्वरी विष्ट, मनिषा उपाध्यया र रिया शर्मा छन् ।

नेपाली टोलीको मुख्य प्रशिक्षकमा मनोज कटुवाल छन् । उनले भर्खरै भुटानमा लेभेल ३ कोचिङ कोर्स सकाएका थिए । अर्का प्रशिक्षकमा रिजन प्रजू छन् भने भारतका मनिष झा कन्सल्ट्यान्ट कोच छन् ।