विराटचोकः सुन्दरहरैँचा नगरपालिका वडा नम्बर २ को सार्वजनिक सुनुवाई कार्यक्रम सम्पन्न भएको छ । मंगलबार  मृगौलियाको जेष्ठ नागरिक समाजको भवनमा वडा अध्यक्ष बिवस प्रधानको अध्यक्षतामा सार्वजनिक सुनुवाई सम्पन्न भएको हो ।

सेवाग्राहीका रुपमा आएका सर्वसाधारणहरुप्रति सेवाप्रदायक निकायबाट भए गरेका क्रियाकलाप, वडामा भएका विकास निर्माण, आव २०८०/०८१ मा सञ्चालन भएका याेजनाका बारेमा आम नागरिकलाई जानकारी गराउने उदेश्यले कार्यक्रमकाे आयाेजना गरिएको अध्यक्ष प्रधानले बताउनुभयाे । यस्तै सञ्चालन भएका याेजनाका विषयमा उपस्थित नागरिकले चासाे राखेका थिए ।

कार्यक्रममा राजनीतिक दलका प्रतिनिधि, टोल विकास संस्थाका प्रतिनिधि, उपभोक्ता समितिका प्रतिनिधि विभिन्न संघ संस्थाका प्रतिनिधि, जनप्रतिनिधि, कर्मचारी, सञ्चारकर्मीलगायतको सहभागिता रहेको थियो । कार्यक्रमकाे सहजीकरण विराट मिडिया एण्ड एडभर्टाइजिङ प्रालिले गरेको थियो ।

विराटचोकः सुन्दरहरैंचा नगरपालिकाले आगामी आर्थिक वर्षका लागि १ अर्ब ८२ करोड ६१ लाख ७९ हजार २ सय ४८ रुपैयाँको बजेट सार्वजनिक गरेको छ । आज भएको नगरको चौधौँ नगरसभामा उपप्रमुख अकली चौधरीले आगामी आर्थिक वर्षका लागि बजेट प्रस्तुत गर्नुभएको हो ।

नगरले २५ करोड ९२ लाख ६२ हजार १ सय ६७ रुपैयाँको घाटा बजेट प्रस्तुत गरेको हो । विनियोजित रकममा अपुग आय २५ करोड ९२ लाख ६२ हजार १ सय ६७ रुपैयाँ आन्तरिक आय वृद्धि गरी परिपूर्ति गरिने नगरले जनाएको छ ।

विनियोजित रकममध्ये चालु खर्चमा ७५ करोड २९ लाख ४३ हजार ५ सय रुपैयाँ छ । पूँजीगत खर्चमा १ अर्ब ६ करोड ६७ लाख ३५ हजार ७ सय ४८ रुपैयाँ र वित्तीय व्यवस्था अन्तर्गत साँवा तथा ब्याज भुक्तानी गर्न ६५ लाख रुपैयाँ विनियोजन गरिएको छ ।

नगरसभामा नगरप्रमुख केदारप्रसाद गुरागाईँले नगरको आगामी आर्थिक वर्षको वार्षिक नीति तथा कार्यक्रम प्रस्तुत गर्नुभएको थियो । नगरप्रमुख गुरागाईँले आगामी आर्थिक वर्षको नीति तथा कार्यक्रम र बजेट तर्जुमा गर्दा आर्थिक विकास, सामाजिक विकास, पूर्वाधार विकास, वातावरण तथा विपद् व्यवस्थापन र सुशासन तथा संस्थागत विकासलाई प्राथमिकता क्रममा राखिएको बताउनुभयो ।

नगरले आर्थिक विकाससम्बन्धी नीतिअन्तर्गत कृषि, पशुपंक्षी विकास र साना सिँचाइसम्बन्धी २१ वटा, पर्यटसम्बन्धी ८ वटा, उद्योग, सहकारी तथा रोजगारसम्बन्धी १४ वटा नीति लिएको छ ।

सामाजिक विकास नीतिअन्तर्गत शिक्षासम्बन्धी ३० वटा, स्वास्थ्यसम्बन्धी १२ वटा, खानेपानी तथा सरसफाइसम्बन्धी ४ वटा, लैङ्गिक समानता तथा सामाजिक समावेशीकरणसम्बन्धी १४ वटा, भाषा, कला, संस्कृतिसम्बन्धी ३ वटा, युवा तथा खेलकुदसम्बन्धी १३ वटा नीति लिएको छ ।

सुन्दरहरैंचाले पूर्वाधार विकाससम्बन्धी नीतिअन्तर्गत भौतिक पूर्वाधारसम्बन्धी ३० वटा, सञ्चार, विद्युत तथा ऊर्जासम्बन्धी १२ वटा नीति लिएको छ ।