विराटचोकः मंसिर ४ गते हुने प्रतिनिधि सभा र प्रदेश सभाको चुनाव नजिकिँदै गर्दा दलहरुले धमाधम उम्मेद्वार सिफारिश गर्न थालेका छन् । दशैंलगत्तै सबै पार्टीले उम्मेद्वार सिफारिश गरिसक्ने भएका छन् । केही पाटीले उम्मेद्वार सिफारिश गरिसके पनि त्यसलाई सार्वजनिक भने गरेका छैनन् ।

यसैबीच प्रतिनिधि सभा र प्रदेश सभाको चुनावका लागि लामो समयदेखि नेपालको आर्थिक क्षेत्रमा लामो समयदेखि सक्रिय व्यक्तिहरु पनि सिफारिश भएका छन् । तीमध्ये केही नामहरु यसप्रकार रहेका छन्ः

पूर्व गर्भनर डा. चिरञ्जीवी नेपाल (नेपाली कांग्रेस)
वित्तीय संस्थाको नियामक निकाय नेपाल राष्ट्र बैंकका पूर्व गभर्नर डा. चिरञ्जीवी नेपाल पाल्पाको क्षेत्र नम्बर २ बाट चुनाव लड्ने भएका छन् । उनी नेपाली कांग्रेसबाट चुनाव लड्न लागेका हुन् ।

राष्ट्र बैंकको गभर्नर हुँदा उनले वित्तीय क्षेत्रमा महत्वपूर्ण भूमिका निर्वाह गरेका थिए । पाल्पाको कृषि क्षेत्रको उद्यमशीलताको विकासका लागि पनि उनको महत्वपूर्ण योगदान रहेको बताइन्छ । केही समय पाल्पाको तानसेनमा प्राध्यापन पेशामा समेत उनी संलग्न थिए ।

वि.सं. २०१९ सालमा पाल्पामा जन्मिएका उनले औपचारिक शिक्षा काठमाडौंमा लिएका थिए । सन् १९९४ मा बनारस हिन्दू विश्वविद्यालयबाट श्रम र अर्थतन्त्रको सम्बन्धमा विद्यावारिधी गरेका उनी २८ वर्ष प्राध्यापनमा संलग्न रहेका थिए । काठमाडौं विश्वविद्यालयको भिजिटिङ प्रोफेसर भएर ६ वर्ष बिताएका उनी नेपाली कांग्रेसका सुशील कोइराला प्रधानमन्त्री हुँदा आर्थिक सल्लाहकार रहेका थिए । पछि उनी नेपाल राष्ट्र बैंकको १६ औँ गभर्नर नियुक्त भएका थिए ।

गभर्नर भएपछि उनले बैंक तथा वित्तीय संस्थाको पूँजी वृद्धिका लागि ‘बिग मर्जर’को आरम्भ गरेका थिए । सोही नीतिअनुरुप अहिले पनि बैंक तथा वित्तीय संस्थाहरुमा मर्जको अभियान चलिरहेको छ ।

अर्थ मन्त्रालयका प्रमुख आर्थिक सल्लाहकार, अर्थ शास्त्रीहरूको सङ्गठन नेपाल आर्थिक संघका उपाध्यक्ष, नेपाल उद्योग वाणिज्य महासंघ र नेपाल चेम्बर अफ कमर्सका प्रमुख सल्लाहकार, आइटी पार्कको पहिलो प्रमुख, औद्योगिक व्यवसाय विकास प्रतिष्ठानका कार्यकारी निर्देशक, नेपाल धितोपत्र बोर्डका कार्यकारी अध्यक्ष र विश्व बैंकको स्कुल सपोर्ट कार्यक्रमको संयोजकका रुपमा पनि उनले काम गरेका छन् ।

मिलेनियम च्यालेन्ज कोअपरेसनका प्रमुख अर्थशास्त्रीको रुपमा रहेका उनी २०३६ सालमा पाल्पा जिल्लामा नेविसंघको संस्थापक अध्यक्षका रुपमा रहेका थिए ।

नेपालका एकमात्र अर्बपति विनोद चौधरी (नेपाली कांग्रेस)
नवलपरासीको क्षेत्र नं. १ बाट प्रतिनिधि सभामा अर्बपति विनोद चौधरीको नाम सिफारिश भएको छ । नेपालका एक मात्र अर्बपति चौधरी विश्वकै १९२९ औं धनी व्यक्ति हुन् । प्रख्यात पत्रिका फोब्र्सले सार्वजनिक गरेको वल्र्ड ¥याङ्किङ अनुसार चौधरीको सम्पत्ति १.५ अर्ब अमेरिकी डलर रहेको छ । १ अर्ब अमेरिकी डलरभन्दा बढी सम्पत्ति हुने नेपालको एक्लो व्यक्ति चौधरी हुन् । अर्थात् उनी नेपालकै सबैभन्दा धनी व्यक्ति हुन् ।

वि.सं. २०१२ वैशाखमा काठमाडौंमा जन्मिएका उनका हजुरबुबा भुरामल दास चौधरी र उनका बुबा लुनकरणदास चौधरी पनि उद्योगी र व्यवसायी थिए । नेपाली उद्योगी, अर्बपति, राजनीतिज्ञ तथा समाजसेवीका रुपमा परिचित उनी चौधरी ग्रुपको अध्यक्ष तथा कार्यकारी प्रमुख हुन् ।

वि. सं. २०६४ सालमा उनी नेकपा एमालेबाट प्रतिनिधित्व गर्दै पहिलो संविधानसभाको समानुपातिक सभासद भएका थिए । अघिल्लो स्थानीय तहको निर्वाचन अघि २०७४ मा उनी एमाले छाडेर नेपाली कांग्रेसमा प्रवेश गरेका थिए । पार्टी प्रवेश गरेपछि वि.सं. २०७४ सालको निर्वाचनमा नेपाली कांग्रेसले उनलाई समानुपातिक उम्मेद्वार सिफारिश गरेको थियो । यसपटक भने उनी प्रत्यक्षतर्फबाट चुनाव लड्ने भएका छन् ।

नेपालको आर्थिक विकासमा उनको महत्वपूर्ण योगदान रहेको छ । बहुराष्ट्रिय कम्पनी चौधरी ग्रुपका उत्पादनमध्येको एक वाइवाइ चाउचाउ विश्वप्रख्यात छ ।

नयाँनयाँ व्यवसायमा हात हाल्ने चौधरी कतिमा सफल भए भने कतिमा असफल भए । केही समय अघि उनले नेपालमै सिजी ब्राण्डको मोबाइल टेलिभिजनलगायतका इलेक्ट्रिक सामान बनाए । भान्सामा प्रयोग हुने सिजी ब्राण्डका धेरै सामग्री अहिले पनि उनले उत्पादन गरिरहेका छन् । चलचित्र वासुदेव बनाएर उनले नेपाली चलचित्र क्षेत्रमा पनि लगानी गरेका थिए ।

देशले आर्थिक उदारीकरणको नीति लिएपछि उनले बैंक, होटल, फाइनान्स कम्पनी, हाउजिङ, जलविद्युत, स्वास्थ्य, उत्पादनलगायत उद्योगमा लगानी गरेका थिए ।

प्रभु ग्रुपका अध्यक्ष देवीप्रकाश भट्टचन (नेपाली कांग्रेस)
प्रभु ग्रुपका अध्यक्ष देवीप्रकाश भट्टचनलाई नेपाली कांग्रेसले बाग्लुङ क्षेत्र नं २ बाट प्रतिनिधि सभाको लागि उम्मेद्वार सिफारिश गरेको छ । २०७४ सालको निर्वाचनमा पनि उनी समानुपातिक कोटामा जनजातितर्फको सूचीमा समावेश थिए । २०७७ सालमा नेपाली कांग्रेसको संगठन विभागको उपसंयोजकको जिम्मेवारी पाएका उनी व्यवसायिक समूह प्रभु ग्रुपका अध्यक्ष हुन् ।

प्रभु ग्रुपले प्रभु बैंक, प्रभु लाइफ इन्स्योरेन्स, प्रभु मनि ट्रान्सफर, प्रभु हेलिकप्टरलगायतका व्यवसायमा हात हालेको छ । प्रभु कोअपरेटिभ नामक सहकारी पनि सो समूहले सञ्चालन गरेको छ । पछिल्लो समय प्रभु पे नामक डिजिटल वालेट पनि सो समूहले सञ्चालन गरेको छ ।

लघुवित्त सञ्चालक भगवती चौधरी (नेकपा एमाले)

वित्तीय क्षेत्रमा ख्यातिप्राप्त अर्काे नाम हो भगवती चौधरी । नेकपा एमालेले सुनसरी क्षेत्र नं. ३ बाट प्रतिनिधि सभामा चौधरीको एकल नाम सिफारिश गरेको छ । उनी यसअघि २ पटकसम्म सोही क्षेत्रमा नेपाली कांग्रेसका विजयकुमार गच्छदारसँग पराजित भएकी थिइन् । ओली निकट मानिने चौधरी २०६४ सालको संविधान सभा निर्वाचनमा भने विजयी भएकी थिइन् । त्यसबेला उनी वन तथा भू–संरक्षण राज्यमन्त्री भएकी थिइन् ।

वि.सं. २०२८ वैशाख २ गते जन्मिएकी उनले महेन्द्र मोरङ क्याम्पसमा अध्ययनरत हुँदा ०४६ सालको जनआन्दोलनमा भाग लिएकी थिइन् भने ०४८ सालमा पार्टीको सदस्यता लिएकी थिइन् ।

चौधरी ग्रामीण महिला उत्सुकता विकास मञ्च (फरवार्ड) सुनसरीकी अध्यक्ष हुन् । सोही संस्थामार्फत् सञ्चालित फरवार्ड कम्युनिटी माइक्रोफाइनान्स वित्तीय संस्थाकी अध्यक्ष उनी फरवार्ड बचत तथा ऋण सहकारी संस्थाकी संस्थापक अध्यक्ष र फरवार्ड इन्टरप्राइजेजकी प्रबन्ध निर्देशक हुन् ।

संविधानसभा सदस्य पदक, २०६५ पाएकी उनले लघुवित्त क्षेत्रबाट हजारौं महिलालाई उद्यमशील बनाएकी छिन् । फरवार्ड माइक्रोफाइनान्समार्फत् ग्रामीण अर्थतन्त्रलाई परिचालन गर्न उनी सफल भएकी छिन् ।

जोगी सर अर्थात् योगेन्द्र मण्डल (नेकपा एमाले)

जीवन विकास समाज लघुवित्तका संस्थापक अध्यक्ष योगेन्द्र मण्डल पनि राजनीतिमा आएका छन् । २५ वर्ष लघुवित्त क्षेत्रमा काम गरेका मण्डल नेकपा एमालेसँग जोडिएर मंसिर ४ गते हुने निर्वाचनमा मोरङको क्षेत्र नम्बर ५ बाट उम्मेद्वार बन्ने भएका छन् ।

मण्डलले २०५४ सालमा जीवन विकास समाज शुरु गरेका थिए । संस्था शुरु गर्नुअघि उनले दुई वर्ष गाउँमा निःशुल्क ट्युसन पढाएका थिए । ग्रामीण नागरिकको जीवनस्तर उकास्नका लागि सहयोग गरौं भन्ने उद्देश्यले शुरु भएको जीवन विकास समाजले लघुवित्तसँगै स्वास्थ्य र शिक्षा क्षेत्रमा काम गरिरहेको छ ।

२ वर्षभित्र तीन सय बेडको सर्वसुलभ अस्पताल सञ्चालनको तयारी गरेको समाजले हाल भने जीवन विकास समाजको कार्यालयमा चार वर्षयता विराटनगरको कोशी अस्पतालको भन्दा सुलभ शुल्कमा पोलिक्लिनिक सञ्चालन गरिरहेको छ ।

गुणस्तरीय शिक्षाका लागि राम्रो काम गरेबापत जीवन विकास समाज द अरब गल्फ प्रोग्राम फर डेभलपमेन्ट ले ‘क्वालिटी एजुकेशन फर अल’ पुरस्कारबाट सम्मानित भएको छ । पुरस्कारको राशी ३ लाख अमेरिकी डलर रहेको थियो ।

जीवन विकास समाजले करीब दुई लाख विपन्न परिवारलाई लघुवित्तका साथै शिक्षा, स्वास्थ्य, कृषि, आवास, ऊर्जालगायतका सामाजिक सेवा प्रदान गरिरहेको छ ।

चार्टर्ड एकाउन्टेन्ट निल सारु मगर (नेकपा एमाले)

नेकपा एमाले पाल्पाले वरिष्ठ चार्टर्ड एकाउन्टेन्ट निल सारु मगरलाई पाल्पा जिल्लाको क्षेत्र नं १ बाट प्रतिनिधि सभाको लागि सिफारिश गरेको छ ।

विद्यार्थी कालदेखि अनेरास्ववियुको विभिन्न तहमा रही राजनीतिमा सक्रिय उनी हाल नेपाल उद्योग व्यवसायी महासंघका केन्द्रीय सदस्य र नेकपा एमाले, पाल्पा काठमाण्डौं सम्पर्क मञ्चको अध्यक्ष छन् । नेपाल धितोपत्र बोर्डको विज्ञ सञ्चालकको रुपमा ३ वर्ष काम गरेको अनुभव भएका उनी आर्थिक नीतिमा पिएचडी गरिरहेका छन् ।