खाँदबारीः भदौ २१ गते बिहान सङ्खुवासभाको मादी नगरपालिका १ उमलिङको खोलागाउँमा भएको सामुहिक हत्याकाण्ड योजनाबद्ध रुपमा भएको खुलेको छ । प्रहरीले सो घटनाका योजनाकारलगायत थप ४ जनालाई पक्राउ गरेको छ । उनीहरुले हत्या गर्नुको कारणसहित आफ्नो संलग्नता स्वीकारेको प्रहरीले जनाएको छ ।

एउटा समूहले योजनाबद्धरुपमा गरेको प्रहरी अनुसन्धानबाट खुलेको छ ।

सङ्घीय प्रहरी कार्यालयका प्रहरी उपरीक्षक भीम दाहालको कमाण्डमा जिल्ला प्रहरी कार्यालय सङ्खुवासभाका डीएसपी लालध्वज सुवेदी, इलाका प्रहरी कार्यालय चैनपुरका प्रहरी निरीक्षक योगराज खतिवडा र प्रदेश प्रहरी कार्यालय (रिट) का प्रहरी निरीक्षक बबिन्द्र नेम्बाङसहितको संयुक्त अनुसन्धान टोलीले घटनाको अनुसन्धान गरेको थियो ।

प्रहरीका अनुसार थप पक्राउ पर्नेहरूमा ४७ वर्षीय खड्गबहादुर कार्की (मुख्य योजनाकार) उनकै छोरा २८ वर्षीय हस्तबहादुर कार्की, यसअघि पक्राउ परेका लोकबहादुर कार्कीका बुबा ४९ वर्षीय रणबहादुर कार्की र लोकबहादुरका भाइ १७ वर्षीय नरेश कार्की रहेका छन् ।

जिल्ला प्रहरी कार्यालय खाँदबारीमा आज पत्रकार सम्मेलन गरी घटनाको बारेमा प्रहरीले जानकारी दिएअनुसार अनुसन्धानबाट खुलेका थप तथ्यहरू यसप्रकार छन्ः

यसअघि पक्राउ परेका लोकबहादुर कार्कीको घरमा घटनाको अघिल्लो रात ८ बजे मुख्य योजनाकार खड्गबहादुर कार्की सहित हस्तबहादुर कार्की, लोकबहादुर कार्की र नरेश कार्की बसेर हत्या योजना बनाएको पाइएको प्रहरीले जनाएको छ ।
घटनाको दिन बिहान मृतक तेजकुमार कार्की खेताला वोलाउन लोकबहादुरको घरमा आउने र सोही अवसरमा मौका छोपी तेजकुमार र उनकी श्रीमतीको हत्या गर्ने योजना बनाएको पाइएको छ । घटनाको बारेमा अरुले थाहा पाए भने उनीहरूको पनि हत्या गर्ने साथै अनुकूल मिलेमा तेजकुमारको घरमा भएको धनमाल समेत लुट्ने योजना रहेको पाइएको प्रहरीको भनाइ छ ।

घटनाको दिन मृतकको पिप्लेस्थित खेतमा खड्गबहादुर कार्की, हस्तबहादुर कार्की, लोकबहादुर कार्की र नरेश नरेश कार्की समेत खेताला जाने कुरा पहिला नै निश्चित भएको थियो ।

मृतक तेजकुमार कार्की बिहान आउने निश्चित गर्न खड्गबहादुर कार्की बिहान ५ बजे तेजकुमार कार्कीको घरमा गएर ‘लोकबहादुर अल्छी छ, घरमै गएर खेताला निश्चित गर्नू’ भनी तेजकुमार कार्कीलाई लोक बहादुर कार्कीको घरतर्फ जान अभिप्रेरित गरी खड्गबहादुर आफ्नो घरतर्फ फर्केको र तेजकुमार लोकबहादुर कार्कीको घरतिर जाँदै गरेको देखेपछि खड्गबहादुर र हस्तबहादुर घर पछाडि चिर्पट बोकेर तयारी हालतमा बसेको पाइएको प्रहरीले जनाएको छ ।

मृतक तेजकुमार कार्की बिहान ५ बजे उठी लोकबहादुरको घरमा गई सुतिरहेको लोकबहादुरलाई ‘अल्छी, अझैसम्म उठेको छैनस्’ भन्दै कराएपछि लोकबहादुर उठेको र सो समयमा लोक बहादुरका भाइ नरेश कार्की र बाबु रणबहादुर कार्की समेत घरमै रहेको पनि अनुसन्धानबाट पत्ता लागेको छ ।

आफ्नो घरबाट तेजबहादुर फर्किएपछि लोकबहादुरले भाइ नरेशलाई इशारा गरी आफूले दाउराको चिर्पट र अलैँची काट्ने चक्कु बोकी पछिपछि गई घर पछाडिको गोगनेको रूख नजिक मृतक तेजकुमारको टाउकोमा प्रहार गरी लडाएको पाइएको प्रहरीले जनाएको छ । खड्गबहादुर र हस्तबहादुरले दाउराको चिर्पट लिई आई तेजकुमारमाथि प्रहार गरेको र हस्तबहादुरले चक्कुले पेटमा प्रहार गरी डिलबाट लडाई बाटोमा झारी हत्या गरी घोप्टो पारेको पाइएको प्रहरीले प्रेस विज्ञप्तिमार्फत् जनाएको छ ।

घटनाको बेला मृतकले ‘लोकेले मार्याे, मलाई नमार’ भन्दै गरेको हारगुहार सुनेपछि ‘मेरो श्रीमान्लाई नमार’ भन्दै तेजबहादुरकी श्रीमती कमला र बुहारी रञ्जना आएपछि लोकबहादुरले कमला कार्कीलाई प्रहार गरेका थिए । कमलाको घाँटीमा हस्तबहादुरले छुरा प्रहार गरेको र बुहारी रञ्जनालाई नरेशले ठेली खोल्सामा झारेको र खड्गबहादुर, लोकबहादुर र हस्तबहादुर मिली हत्या गरेको पाइएको तथा मृतक रञ्जनाको शव रणबहादुर र नरेशले बोकेर कमलाको शव भएको स्थानसम्म लगेको पाइएको प्रहरीले जनाएको छ ।

सो घटनाको बेला नाबालकहरू दिपेन र गोमासमेत घर नजिकको बाटोमा आएको देखी हस्तबहादुर र लोकबहादुरले बाटो छेकी मुख थुनेपछि लोकबहादुरले चिर्पटले हिर्काई घाँटी बटारी हत्या गरेको पाइएको पत्रकार सम्मेलनमा प्रहरीले जानकारी दिएको छ ।

त्यसपछि पाँचै जना मिलेर मृतकको घरतर्फ गएका र घरमा ८४ वर्षीया पार्वती कार्की मकै नङ्ग्याइरहेको अवस्थामा भेटेपछि हस्तबहादुरले समातेर घर पछाडिको गोठ नजिक लगेको र लोकबहादुरले टाउको भित्तामा ठोक्काई घाँटी बटारी हत्या गरेको पाइएको छ । त्यसपछि घटनामा संलग्न सबै जना घटनामा प्रयोग गरेको चिर्पट र छुरी बोकी लोकबहादुरको घरमा गई छुरीमा लागेको रगत पखालेर छुरी बुइँकलमा लुकाएको, चिर्पटहरू अँगेनामा डढाएको र रगत लागेको कपडाहरू लुकाएका थिए । खड्गबहादुर र उनका छोरा हस्तबहादुर घरतर्फ गएका र घर फर्कने क्रममा रञ्जनाको ओप्पो मोबाइल नरेशले लिएर आई स्वीच अफ गरी घरमुनिको ओढारमा लगेर लुकाएको अनुसन्धानको क्रममा खुलेको थियो ।

त्यसपछि खड्गबहादुर र उनका छोरा हस्तबहादुर लोकबहादुरको घरमा गई कसैले सोधेमा घटनाको बारेमा कुनै पनि कुरा नसुनेको र थाहा नपाएको भनी र प्रहरी आई पत्ता लगाएमा लोकबहादुरले मानसिक औषधी पनि खाने गरेका कारण घटनको सबै जिम्मेवारी एक्लै लिने भन्ने सल्लाह गरी फर्केको पाइएको अनुसन्धानका क्रममा खुलेको प्रहरीले जनाएको छ ।

घटनामा संलग्न चारै जनालाई नियन्त्रणमा लिई अनुसन्धान भई रहेको र अनुसन्धानको क्रममा सबैले घटना स्वीकार गरेको र घटनामा प्रयोग भएको छुरी, कपडा र हराएको मोबाइल समेत बरामद गरी थप अनुसन्धान भइरहेको जानकारी प्रहरीले दिएको छ ।

प्रहरीका अनुसार घटना हुनुका कारणहरू यस्ता छन्ः
खड्गबहादुर नियमित रूपमा रक्सी खाने र घरमा श्रीमती र परिवारका सदस्यहरूलाई कुटपिट तथा गालीगलौज गर्ने हुनाले मृतक तेजकुमारले ‘तँ जँड्याहा किन यसो गर्छस्’ भनी गाली गर्दा खड्गबहादुरले ‘तँलाई के मतलब, तँलाई मार्छु’ भन्दै झगडा गर्ने गरेको पाइएको छ ।

त्यस्तै, मृतक तेजकुमारले लोकबहादुरलाई ‘तँ पागल, अल्छी, केही काम गर्न सक्दैनस्’ भन्ने तथा नरेशलाई ‘तँ डुँडे काम नलाग्ने भइस्’ भन्ने गरेका थिए । रणबहादुरलाई ‘तँ लठेब्रो, केही गर्ने सक्दैनस्’ भन्ने गरेको र जहिले पनि अरुलाई हेप्ने र आफू सम्पन्न भएको फुर्ति दिने गरेको भनी मनमा ईख पालेको पाइएको छ । सोही इख बढ्दै जाँदा घटनाको दिन सबै जना मृतकको खेतमा खेताला जानुपर्ने भएकाले सोही दिन मौका छोपी योजना बनाई हत्या गरेको पक्राउ परेकाहरुले स्वीकारेको प्रहरीले जनाएको छ ।

सम्बन्धित अघिल्ला समाचारहरुः

६ जनाको हत्या गर्ने आरोपीले यसरी दिए प्रहरीलाई बयान, प्रहरीको प्रेस रिलिजसहित

६ जनाको हत्या गर्ने आरोपी सार्वजनिक

सामूहिक हत्या प्रकरणमा संलग्न छिमेकी पक्राउ, आइतबार सार्वजनिक गरिने

कुकुरसहितको प्रहरीको अनुसन्धान टोली संखुवासभा पुग्यो, धन लुट्न हत्या भएको हुन सक्ने अनुमान

एकै परिवारका ६ जनाको वीभत्स हत्या