विराटचोकः संखुवासभाको मादी नगरपालिका वडा नम्बर १ मा भदौ गते भएको एकै परिवारका ६ जनाको सामुहिक हत्यामा संग्लग्न स्थानीय २५ वर्षीय लोकबहादुर कार्की पक्राउ परेका छन् । उनले छिमेकी ५५ वर्षीय तेजबहादुर कार्की, ५४ वर्षीया कमला भन्ने मनमाया कार्की, ३२ वर्षीया रञ्जना कार्की, ८ वर्षीय बिपिन भनिने दिपेन कार्की, ५ वर्षीया गोमा कार्की र ८४ वर्षीया पार्वती भन्ने पार्वता कार्कीको हत्या गरेका थिए ।

प्रहरीका अनुसार सो दिन बिहान साढे ६ बजेको समयमा कार्की परिवरको हत्या भएको भन्ने खबर प्राप्त भएसँगै तत्काल जिल्ला प्रहरी कार्यालय संखुवासभाबाट प्रहरी टोली खटिई गई घटनास्थल सुरक्षित राखेको थियो । थप अनुसन्धानको लागि संघीय प्रहरी इकाई कार्यालय धरानबाट तालीम प्राप्त कुकुरसहितको प्रहरी टोली, १ नम्बर प्रदेश प्रहरी कार्यालयको अनुसन्धान टोली तथा केन्द्रीय अनुसन्धान ब्युरोको प्रहरी टोलीसमेत परिचानल भएको थियो ।

घटनाको सुक्ष्म तथा गहन अनुसन्धान गरिरहेको प्रहरी टोलीलाई थप सहजताको लागि १ नम्बर प्रदेश प्रहरी कार्यालय विराटनगरबाट प्रदेश प्रहरी प्रमुख प्रहरी नायब महानिरीक्षक अरुणकुमार बिसीसहितको अनुसन्धान टोलीले सामुहिक हत्यामा संग्लग्न कार्कीलाई पक्राउ गरेको हो । घटना भएको छैटाँै दिनमा कार्कीलाई पक्राउ गरी प्रदेश प्रहरी प्रमुखसहितको उपस्थितिमा आइतबार इलाका प्रहरी कार्यालय चैनपुरमा पत्रकार सम्मेलन गरी सार्वजनिक गरिएको हो । पक्राउ परेका कार्की वैदेशिक रोजगारीको सिलसिलामा पटकपटक गए पनि स्वास्थ्यमा समस्या आई घरमा बसिरहेको र आफू विदेशमा रहँदा केही कमाउन नसकेकोप्रति हीनताबोध भई समय समयमा विक्षिप्त हुने गरेको र आफैँ आवेश तथा आक्रोशमा आई परिवारकै हत्या गरेको प्रारम्भिक अनुसन्धानबाट खुलेको प्रहरीले जनाएको छ ।

मृतक तेजबहादुर कार्कीले समयसमयमा सम्झाइबुझाई गर्दै आइरहेकोमा घटना भएको दिन बिहान मृतक तेजबहादुर कार्की अभियुक्तको घरमा खेताला भन्न गई फर्कने क्रममा आफूलाई पहिले सम्झाइबुझाई गरेका शब्दहरुलाई गालीको रुपमा लिई तत्काल आवेशमा आई नजिकै रहेको दाउराको चिर्पटले हानेको बयान दिएको प्रहरीले जनाएको छ । उनलाई चिर्पटले हान्ने क्रममा गुहार माग्दा मृतककी श्रीमती र बुहारीसमेत घटनास्थलमा पुगेकाले उनीहरुलाई पनि सोही चिर्पटले प्रहार गरेको र २ जना नाबालकहरुलाई पनि चिर्पट प्रहार गरेको बयान दिएको प्रहरीले जनाएको छ ।

त्यसपछि घरमा रहेकी पार्वता कार्कीलाई कपालमा समातेर भित्तामा टाउको ठोकाई हत्या गरी घटनामा प्रयोग भएको चिर्पट आफ्नो घरमा लगेर आगो बालेको अनुसन्धानको क्रममा खुलेको प्रहरीले जनाएको छ । तेजबहादुरको हत्या गर्दा उनको परिवारका अन्य सदस्यले समेत देखेको हुँदा घटनालाई ढाकछोप गर्न परिवारकै हत्या गरेको अनुसन्धानको क्रममा खुल्न आएको प्रहरीले जनाएको छ ।

पक्राउ परेका कार्कीको सम्बन्धमा जिल्ला प्रहरी कार्यालय संखुवासभाबाट थप अनुसन्धान तथा कानुनी कारवाही भइरहेको बताइएको छ ।

यस्तो छ प्रहरीले  पत्रकार सम्मेलनमा जारी गरेको प्रेस विज्ञप्तिः