विराटचोकः मोरङको क्षेत्र नम्बर ३ लाई कम्युनिष्टको मुखबाट भन्ने हो भने लालकिल्ला मानिएको क्षेत्र हो । यस ठाउँबाट राष्ट्रिय निर्वाचनमा कम्युनिष्ट पार्टीका उम्मेद्वारले जित्दै आएका छन् । यस अघि भएको निर्वाचनमा पनि एमाललेका भानुभक्त ढकाल विजयी भएका थिए । यस पटकको निर्वाचनमा माहोल फेरिएको छ । नेकपा एमालेबाट निवर्तमान सांसद ढकाल र काग्रेसबाट यसअघि ढकालसँग नै पराजित भएका डा. सुनिल शर्मा नै प्रतिष्पर्धामा रहेका छन् ।

यस पटकको प्रतिष्पर्धाको निर्णायक भूमिका राप्रपा नेतृ नायिका रेखा थापाको उम्मेद्वारीलाई लिइएको छ । खासगरी काङ्ग्रेसको मत काट्न रेखाको उम्मेदवारीले सहयोग हुने एमालेको बुझाई रहेको छ भने १५ हजार मत रेखालाई दिए पनि आफूले चुनाव जित्नेमा शर्मा ढुक्क देखिएका छन् । रेखा भने पुराना अनुहारलाई बिदा गर्ने दाउमा रहेकी छिन् । उनको चुनावी माहोल लोभलाग्दो रहेको छ । तर उनलाई नायिकाको रुपमा हेर्नमात्रै जाने गरेको चर्चा पनि हुने गरेको छ ।

गत स्थानीय तहको निर्वाचनलाई हेर्दा यस क्षेत्रमा एमाले र काङ्ग्रेसकै प्रतिष्पर्धा हुने देखिन्छ । राप्रपा भने यस ठाउँमा कमजोर रहेको छ । तर धरमरिएका मत केही संख्यामा रेखालाई गए पनि आफ्नो पकड क्षेत्र भएकाले एमाले लालकिल्लालाई बचाइराख्न कोशिसरत देखिन्छ ।

चियागफः आशालाग्दा उम्मेद्वार पाइएन
विहान बेलुका हुने चिया गफले गाउँमा निर्वाचनको माहोल तताएको छ । युवादेखि ज्येष्ठसम्म विभिन्न पार्टीका व्यक्ति भेला हुने र राजनीतिक गफ छाँट्ने क्रम बढ्दो छ । यसरी उम्मेद्वारको पक्ष र विपक्षमा हुने गफले पनि निर्वाचनमा कसको माहोल कस्तो हुने छ भन्ने आँकलन गर्न सकिन्छ ।

एमाले उम्मेद्वार ढकालको पक्षमा विरोध र आलोचना बढी हुने गरेको छ । खास गरी कोभिडकालमा स्वास्थ्य सामग्री खरीद प्रकरणमा अनियमितता भएको भनी उनीमाथि आरोपहरु लाग्ने गरेका छन् । यस बाहेक निर्वाचित भएपछि गाउँ नआएको भन्दै उनी आलोचित भएका छन् ।

डा. शर्मालाई विराटनगरस्थित नोबेल मेडिकल र काठमाडौं सिनामंगलस्थित काठमाडौं मेडिकल कलेजकामा विद्यार्थीलाई आर्थिक शोषण गरेको, पार्टीको १४ औँ महाधिवेशनदेखि स्थानीय तहको निर्वाचन सम्म आउँदा आफ्नै नेता कार्यकर्तालाई मिलाउन नसकेको, अन्तरघात गरेको भन्दै आलोचना हुने गरेको छ ।

यसैगरी रेखा थापा च्याँखे दाउ थाप्न मात्रै यस क्षेत्रमा आएको, यस अघि कहिल्यै नआएको, गत स्थानीय निर्वाचनमा पनि नदेखिएको, सिने क्षेत्रमा यत्रा वर्ष काम गर्दा आफ्नो गाउँ बिर्सिएको र फेरि पनि बिर्सिने भन्दै उनको समेत आलोचना हुने गरेको छ । कतिपयले आशा लाग्दा उम्मेद्वार नपाएको गुनासो गर्ने गरेका छन् ।

के छन् एजेन्डा ?
एमालेले राष्ट्रियताको सवालमा चर्काे आवाज उठाउँदै आएको छ । यसलाई नै ढकालले एजेन्डा बनाएका छन् । यसअघि मन्त्री हँुदा विभिन्न कानुन निर्माण गरेको, आफ्नो क्षेत्रमा विकास गरेको भन्दै पुनः निर्वाचनमा होमिएका छन् । काङ्ग्रेस नेता शर्माको भने मुख्य एजेन्डा बिरामीको सेवा, स्वास्थ्य सुविधा, आफ्नो अस्पतालबाट सो क्षेत्रका नागरिकको छुटमा उपचार गरेको र फेरि गर्ने लगायतका मुख्य एजेन्डा रहेका छन् । यिनै एजेण्डारुपी चुनावी अस्त्र बनाएर उनी मैदानमा उत्रिएका छन् ।

थापा भने भ्रष्ट नेतालाई फालाँै भन्दै निर्वाचन क्षेत्रको प्रचारमा लागेकी छिन् । राप्रपाले प्रदेश खारेज, हिन्दू राष्ट्र, राजसंस्था स्थापना लगायत फरक एजेन्डा बोकेर आएको छ ।

अन्योलमा मतदाता 
राजनीतिक दलका पछिल्ला गतिविधि देखेर आमनागरिक अन्योलमा देखिएका छन् । फरक अस्तित्व बोकेका पार्टीले चुनाव जित्ने र सत्ता स्वार्थको राजनीतिमा लिप्त हुने गरेकाले कसलाई मतदान गर्ने भन्नेमा अन्योल सिर्जना भएको देखिन्छ । काङ्ग्रेस, नेकपा माओवादी, एकीकृत समाजवादी र जनमोर्चा लगायतको गठबन्धन र एमाले राप्रपाको तालमेलले नागरिकमा निराशा छाएको छ । पार्टीकै कतिपय नेता कार्यकर्तालाई यो विषय टाउको दुखाइको विषय बनेको छ ।

पार्टीका केही कार्यकर्ता बाहेक सामान्य नागरिक पार्टीको प्रचारमा मन लगाएर खुल्ने गरेको देखिँदैन । यसको मुख्य कारण राजनीतिक दलका नेताका कारण भएको चिया गफमा चर्चा हुने गरेको छ । देशको हितमा लाग्ने र बहुमत ल्याएर सरकार चलाउन कुनै दलले नसक्ने र फेरी पनि अस्थिर सरकार बनाउने र भत्काउने खेल शुरु हुने सम्भावना भएकाले मतदातामा निराशा पैदा भएको हो ।

गत स्थानीय निर्वाचनमा वडाध्यक्षले ल्याएको मत हेर्दाको परिणाम
गत वैशाख ३० गते भएको स्थानीय निर्वाचनमा वडाध्यक्षले ल्याएको मत संख्या हेर्दा एमाले थोरै मतले अगाडि छ । सो निर्वाचनमा एमालेको ३७ हजार ४ सय १०, कांग्रेसको ३६ हजार ९ सय १६, माओवादीको ७ हजार तीन सय ७३, एकीकृत समाजवादीको १ हजार ८ सय ५५ मत, जनता समाजावादी पार्टीको ४ सय ६३ तथा राष्ट्रिय प्रजातन्त्र पार्टीको २ हजार १ सय २१ मत रहेको छ ।

कति छन् मतदाता ?
बेलबारी, सुन्दरहरैँचाका ६ वटा वडा, पथरी शनिश्चरे नगरपालिका र कानेपोखरी गाँउपालिका गरी २६ वडा मिलेर बनेको यस निर्वाचन क्षेत्रमा १ लाख ३९ हजार आठ सय ३३ मतदाता रहेको जिल्ला निर्वाचन कार्यालयले जनाएको छ ।

यस क्षेत्रको प्रदेश निर्वाचन क्षेत्र (क) मा ७५ हजार तीन सय ९३ र प्रदेश सभा निर्वाचन क्षेत्र (ख) मा ७४ हजार दुई सय ४० मतदाता रहेको निर्वाचन अधिकृतको कार्यालयले जनाएको छ । यो क्षेत्रमा ४८ मतदान केन्द्र रहनेछन् ।

भावी प्रधानमन्त्री हेरेर भोट गर्ने अवस्था कत्तिको रहेको छ ?
कतिपय ठाउँमा भावी प्रधानमन्त्री हेरेर भोट दिनुपर्ने र व्यक्तिभन्दा माथि पार्टी रहेको अभिव्यक्ति दिने गरेको पाइन्छ । स्वतन्त्र नागरिक र एमाले पक्षधरले यो बहसलाई प्राथमिकताका साथ उठाउने गरेका छन् । सचेत युवा जगतले समेत संघीय र प्रादेशिक चुनाव भएकाले अंक गणितको हिसाबमा कुनै एक पार्टीलाई मत दिएर जिताउनुपर्ने बताउने गरेका छन् । यो अवस्था भने आगामी मंसिर ४ पछि थाहा हुने नै छ ।