विराटचोकः कोरोना भाइरस (कोभिड १९ नेपालका ७२ जिल्लामा फैलिएको छ । भारतसंग सिमाना जोडिएको मोरङको सुन्दरहरैंचामा विदेशबाट आएकालाई होल्डिङ एरियामा राखिएको छ ।

विशेष गरी भारतमा काम गर्न गएका व्यक्ति लकडाउनका कारण समस्यामा पर्न थालेपछि आफ्नो देश फर्किएकालाई होल्डिङ एरियामा राखिएको हो । सुन्दरहरैंचा नगरपालिकाको वडा नम्बर ८ मा रहेको दुर्गादेवी दुलाल सुन्दरहरैंचा स्पोर्टस ग्रामको भवनमा हाल भारत र दुबईबाट आएका व्यक्तिहरुलाई राखिएको नगरपालिकाको होल्डिङ एरिया व्यवस्थापन समितिका संयोजक रोशनप्रसाद ढकालले बताए ।

अहिले सो भवनमा ३१ जनालाई राखिएको छ भने २ जना महिलालाई सुन्दरहरैंचा उद्योग वाणिज्य संघमा राखिएको छ । उनीहरुलाई दिनमा २ पटक ज्वरो नापिने गरेको छ । होल्डिङ एरियमा रहेकाहरु सबैको रेखदेख गर्ने जिम्मा १ जनालाई दिइएको छ । उनका अनुसार हाल बिहान बेलुका ज्वरो परीक्षण गरिँदै आइएको छ भने अन्य कुनै परीक्षण गरिएको छैन ।

होल्डिङ एरियामा बस्ने सबैको एउटै माग सरकारले क्वारेन्टाइन अवधि पुगेकाहरुको पीसीआर परीक्षण गरेर घर जाने वातावरण मिलाइदिनुपर्छ भन्ने छ । खाना, खाजा र बस्न राम्रो व्यवस्था मिलाइएको र त्यसमा कुनै खोट लगाउने ठाउँ नभएको होल्डिङ एरियामा बस्नेहरु बताउँछन् ।

हाल यस क्वारेन्टाइनमा १८ दिन अघि भारतबाट आएका र पूर्वाञ्चल विश्वविद्यालयमा क्वारेन्टाइनमा राखिएका व्यक्तिलाई समेत राखिएको छ । उनीहरुको पीसीआर परीक्षण रिपोर्ट नेगेटिभ आए पनि संगै आएका साथीको पोजेटिभ देखिएकाले उनीहरुलाई घर जान नदिई राखिएको बताइएको छ ।

उनीहरुको भित्री निगरानी सीसी क्यामेराबाट गरिँदै आइएको छ । स्वास्थ्य परीक्षणका लागि भने नगरपालिकाले डेस्क स्थापना गरी बिहान ८ बजेदेखि साँझसम्म स्वास्थ्यकर्मीको व्यवस्था गरेको छ । कसैलाई कुनै समस्या आए तत्काल व्यवस्थापनका लागि स्वास्थ्यकर्मी राखिएको स्वास्थ्य शाखा प्रमुख मचिन्द्र बस्नेतले बताए ।

सुन्दरहरैंचाका संक्रमित व्यक्ति पूर्वाञ्चल विश्वविद्यालयमा रहेको कोरोना अस्पतालमा रहेका छन् भने उनको स्वास्थ्य अवस्था सामान्य रहेको बताइएको छ । स्वास्थ्य परीक्षण चाँडै गरिने र होल्डिङ एरियामा भएका सबैको एकपटक परीक्षण गरी थप आउनेलाई अर्को स्थानमा व्यवस्थापन गर्ने तयारी गरिएको संयोजक ढकालले बताए ।

परीक्षण गरिएका र नगरिएकालाई एकै स्थानमा राख्दा समस्या हुने भएकाले यसको व्यवस्थापन भइरहेको उनले जानकारी दिए ।