विराटचोकः हिजो हालसम्मकै उच्च बिन्दुमा पुगेको सुन र चाँदी दुवैको मूल्य आज भने घटेको छ । आज सुनको भाउ तोलामा १ हजार ४ सय रुपैयाँ र चाँदीको भाउ तोलामा ३० रुपैयाँ घटेको हो ।

नेपाल सुनचाँदी व्यवसायी महासंघका अनुसार आज छापावाल सुनको भाउ प्रति तोला १ लाख ६ हजार १ सय रुपैयाँ निर्धारण भएको छ । तेजाबी सुनको भाउ प्रति तोला १ लाख ५ हजार ६ सय र चाँदीको भाउ प्रति तोला १ हजार ३ सय ६५ रुपैयाँमा किनबेच भइरहेको महासंघले जनाएको छ ।

हिजो सुनको भाउ तोलामा १ हजार २ सय रुपैयाँ बढेर हालसम्मकै उच्च मूल्यमा पुगेको थियो ।

विराटचोकः बिहीबार सुनको मूल्य बढेर हालसम्मकै उच्च बिन्दुमा पुगेको छ । आज छापावाल सुनको मूल्य प्रतितोला १ हजार २ सय रुपैयाँले बढेर १ लाख ७ हजार ५ सय रुपैयाँ पुगेको छ ।

नेपाल सुनचाँदी व्यवसायी महासंघका अनुासर तेजाबी सुनको मूल्य प्रति तोला १ लाख ७ हजार रुपैयाँ पुगेको छ ।

चाँदीको मूल्य पनि प्रतितोला २५ रुपैयाँ बढेको छ । आज चाँदीको मूल्य १ हजार ३ सय ९५ रुपैयाँ निर्धारण भएको छ ।

हिजो सुनको भाउ तोलामा ५ सय रुपैयाँ र चाँदीको भाउ तोलामा ५ रुपैयाँ बढेको थियो ।

विराटचोकः मोरङको सुन्दरहरैंचामा रहेको पूर्वाञ्चल ल्युब आयल लिमिटेडले आईपीओ जारी गर्ने भएको छ । आगामी आर्थिक वर्षमा आईपीओ जारी गर्ने गरी पीएलओले प्रभु क्यापिटललाई बिक्री प्रबन्धकमा नियुक्त गरेको छ । शेयर निस्कासनका लागि भएको सम्झौता पत्रमा पीएलओका तर्फबाट प्रबन्ध निर्देशक भोलेश्वर दुलाल र क्यापिटलका तर्फबाट प्रबन्ध निर्देशक दिनेश थकालीले बुधबार हस्ताक्षर गरेका छन् ।

पीएलओको ४ लाख कित्ता शेयर अल्फा प्लस भेन्चर्स लिमिटेडले खरीद गरेसँगै प्रालिका रुपमा रहेको पीएलओ पब्लिक कम्पनीमा रुपान्तरित भएको र सर्वसाधारणमा शेयर जारी गर्न लागिएको दुलालले बताए । बुधबार नै अल्फा प्लस भेन्चर्सका तर्फबाट प्रबन्ध निर्देशक अंगिश घिमिरे र पीएलओका तर्फबाट प्रबन्ध निर्देशक दुलालबीच शेयर खरीदबिक्री सम्झौतामा पनि हस्ताक्षर भएको छ ।

अब आगामी आर्थिक वर्षमा कम्पनीले ५ लाख कित्ता शेयर सर्वसाधारणमा प्रिमियम मूल्यमा बिक्री गर्ने दुलालले जानकारी दिए । सो शेयरमध्ये १० प्रतिशत अर्थात् ५० हजार कित्ता शेयर स्थानीयवासीलाई र ५० हजार कित्ता शेयर कर्मचारीलाई बिक्री गरी बाँकी रहेको ४ लाख कित्ता शेयर सर्वसाधारणमा बिक्री गरिने भएको हो ।

कार्यक्रमलाई सम्बोधन गर्दै दुलालले पब्लिक कम्पनीमा जाने पहिलो लुब्रिकेन्ट कम्पनी पीएलओ भएको जानकारी दिए ।

अल्फा भेन्चर्सका प्रबन्ध निर्देशक घिमिरेले प्राइभेट कम्पनी पब्लिक कम्पनीमा जाँदा धेरैको अपनत्व भई व्यवसायमा थप सुधार हुने बताए ।

प्रभु क्यापिटलका प्रबन्ध निर्देशक दिनेश थकालीले सर्वसाधारणमा शेयर जारी गरेसँगै संस्थाको सुशासनमा सहयोग पुग्ने बताए ।

हस्ताक्षर कार्यक्रमका प्रमुख अतिथि सुन्दरहरैंचा नगरपालिकाका पूर्व नगरप्रमुख शिवप्रसाद ढकालले मोफसलमा रहेर राम्रो प्रगति गरिरहेको लुब्रिकेन्ट कम्पनीले सर्वसाधारणमा शेयर जारी गर्नुले अन्य कम्पनीलाई पनि सर्वसाधारणमा शेयर जारी गर्न सन्देश दिएको बताए ।