विराटचोकः धान उत्पादनमा बृद्धि, आत्मनिर्भर र संमृद्धि भन्ने मुल नाराका साथ यस वर्षको धान दिवस साेमबार  देशभरी मनाइएको छ । यसै क्रममा मोरङको सुन्दरहरैंचा नगरपालिकाले पनि  १७ औँ राष्ट्रिय  धान दिवस मनाएको छ । वडा नम्बर ११ को नयाँ बेलेपुरमा रहेको विराट मल्टिपर्पोज एग्रो फार्म प्रा.लि. द्वारा आयोजित  कार्यक्रमको सुन्दरहरैंचा नगरपालिका कृषि शाखाले प्रायोजन गरेको थियो । नगरस्तरिय धान दिवस कार्यक्रममा बोल्दै नगरप्रमुख शिवप्रसाद ढकालले युवाहरुलाई कृषिमा आर्कर्शित गर्ने खालका कार्यक्रमहरु ल्याइएको बताए । यस्तै किसानलाई धानको विउ वितरण गरेको  बताउदै आगामी दिनमा धान, गहु, मकै, तोरी लगायतको बिउ वितरण गर्ने याेजना रहेकाे समेत उद्धाेष गरेका छन् ।

मल वितरणगर्न मोरङका सबै पालिका मध्ये सुन्दरहरैंचाले धेरै ल्याएर वितरण गरेको बताउदै अब प्राङ्गारीक मल तर्फ जानुपर्ने बताएउदै यसका लागि कार्यक्रम ल्याइने बताए । किसानले उत्पादन गरेका फलफूल, तरकारी कुहिने समस्यालाई अन्त्य गर्न गछियामा कोलस्टोर बनाउन लागिएको बताए । यसैगरी स्थानीय बजारलाई व्यवस्थीत गरिने उनको भनाइ थियो ।  यस्तै अहिले घाँसको विउ, सब्जीको किट, निशुल्क वितरण गरिएको र धानको बिउ, गहुँको विउ ५० प्रतिशत अनुदानमा वितरण गरिएको बताए ।

यसैगरी कार्यक्रममा बोल्दै उपप्रमुख धनमाया तामाङले कृषि पेसालाई मध्यनजर गर्दै जताततै हरियाली फाटहरु बनाउने तर्फ ध्यान दिने बताइन् । लकडाउनले कृषि पेसालाई थप उर्जा दिएकाले युवालाई कृषितर्फ आर्कषर्ण गर्ने बेला आएकाले यो अवसरलाई स्थानीय सरकारले विभिन्न कार्यक्रम ल्याउने बताइन् । कृषि पेसा बाट आत्मनिर्भर हुने खालका कार्यक्रम ल्याइने बताइन् ।

धान दिवसको अवसरमा विभिन्न खेलहरु समेतको आयोजना गरिएको थियो । बाँसमा बाँधेर झुण्डाइएको बिउको मुठा ल्याउने खेलमा किशोर भट्टराई प्रथम हुदै ५ सय पुरस्कार प्राप्त गरेका छन् । यसैगरी महिला हिले दौडमा मनु तामाङ, पुरुष तर्फको डोरीतान प्रतियोगितामा राजन बस्नेतलाई कोदालो उपहार दिइएको थियो ।  अन्जु भट्टराई बजगाईको सभापतित्वमा भएको कार्यक्रमा स्वागत मन्तव्य विकास बजगाइले गरेका थिए भने कार्यक्रमको संचालन निरु बजगाईले गरेकि थिइन् ।