विराटचोकः मोरङको सुन्दरहरैंचा नरपालिका वडा नम्बर ११ स्थित बेलेपुरमा रहेको सुवर्ण फर्मास्युटिकल सञ्चालन गर्नुपर्ने भन्दै प्रदेश सांसद राजकुमार ओझाको नेतृत्वमा नेकपाको टोलीले धरान स्थीत बीपी कोइराला स्वास्थ्य विज्ञान प्रतिष्ठानका उपकुलपतिको ध्यानाकर्षण गराएको छ ।

ती संरचनाको हेरचाह नहुँदा जीर्ण बन्दै गएकाले केही ठाउँमा भत्कन समेत शुरु गरेकाले यसलाई सञ्चालन गर्नुपर्ने भन्दै नेकपाको टोलीले शुक्रबार बीपी कोइराला स्वास्थ्य विज्ञान प्रतिष्ठानका उपकुलपति डा. ज्ञानेन्द्र गिरीको ध्यानाकर्षण गराएको हो । सो भवन चाँडो सञ्चालनमा ल्याउनुपर्ने माग गरिएको हो ।

नेकपा मोरङ सचिवालय सदस्य एवम् सुन्दरहरैंचा नगरपालिकाका इन्चार्ज नवराज चापागाईं, सुन्दरहरैचा नगर अध्यक्ष केदार गुरागाई, सचिव दुश्यन्त भट्टराई, कार्यालय सदस्य मातृका ढकाल, जिल्ला सदस्य सन्तोष वान्तबा लगायतको टोलीले भेटेको हो ।

सो क्रममा उपकुलपति गिरीले ९ महिनादेखि एक वर्षभित्र उत्पादन शुरु हुने गरी सञ्चालन गर्ने तयारीमा रहेको बताए ।

त्यसको निम्ति प्रस्ताव योजना निर्माण गरी स्वास्थ्य मन्त्रालयमा पेश गर्ने तयारी भएको सांसद ओझाका स्वकीय सचिव एवम् सुकुना क्याम्पस स्ववियु उपसभापति मिलन घिमिरेले बताए ।

यसरी स्थापना गरिएको थियोः

२०५७ सालमा बीपी कोइराला स्वास्थ्य विज्ञान प्रतिष्ठानका तत्कालीन प्रमुख शेखर कोइरालाले उद्घाटन गरेको २ सय ४० कोठाको भवन अहिले अलपत्र अवस्थामा छ ।

प्रतिष्ठानका तत्कालीन डाक्टर भोगेन्द्र आचार्यका अनुसार, गाउँगाउँमा स्वास्थ्य सेवा पु¥याउने उद्देश्यले सो भवन निर्माण गरिएको थियो । यस अघि कमलमणि दीक्षितले भक्तपुरको आर्मी क्याम्प छेउमा यस्तै प्रकारको भवन बनाएका थिए तर त्यहाँ चलाउन नसकेपछि तत्कालीन इन्द्रपुर गाविस वडा नम्बर ७ बेलेपुरमा बनाउने निर्णय भएको आचार्यले बताए ।

तुन्दी कन्ट्रक्सनले निर्माण शुरु गरेको २ सय ४० कोठा भएको ४ ओटा भवन ५ बिघा क्षेत्रफलमा फैलिएको बीपी कोइराला स्वास्थ्य विज्ञान प्रतिष्ठानको स्वामित्वमा रहेको छ । आन्तरिक खिचातानीले भवन प्रयोगविहीन भएको हाल भवनको रेखदेख गर्ने गरेका प्रतिष्ठानका कर्मचारी कृष्णप्रसाद न्यौपानेले बताए ।

सुवर्ण फर्मास्युटिकलले पेनसिलिन र ट्याब्लेट औषधी बनाउन भनेर अत्याधुनिक भवन बनाएको थियो । अहिले कुनै प्रयोजनबिना वर्षाैंदेखि अलपत्र अवस्थामा रहँदा कसैको यसप्रति ध्यान गएको देखिँदैन ।

हाल यो भवन भताभुङ्ग, लथालिङ्ग अवस्थामा रहेको छ । बीपी कोइराला स्वास्थ्य विज्ञान प्रतिष्ठानको सो भवनमा हाल वन्यजन्तुको बास हुन थालेको स्थानीय बताउँछन् । सो भवनको अवस्था देखेर स्थानीय जनता निराश छन् ।

सम्बन्धित समाचार

सुन्दरहरैंचामा २४० कोठाको भवन अलपत्र, अरबौँको सम्पती प्रयोग बिहिन