विराटचोकः मोरङको सुन्दरहरैंचामा ड्रागन फ्रुट खेतीको परीक्षण सफल भएको देखिएको छ । सुन्दरहरैंचा ११ तीनपैनीस्थित राजाटोलका किसान रेणुप्रसाद श्रेष्ठ र हरिमाया श्रेष्ठले परीक्षणका लागि लगाएको ड्रागन फ्रुटको खेती सफल भएको हो ।

श्रेष्ठले हरिमाया कृषि फार्म दर्ता गरी ड्रागन फ्रुटको खेती शुरु गरेका हुन् । उनको फार्ममा सिजनअनुसारका अरु तरकारी पनि पाइन्छ । ड्रागन फ्रुट उत्पादन हुन नथालेसम्म घुसुवा बालीको रुपमा भिन्डी, खुर्सानी, कोपी आदि लगाउन सकिने भएकाले आफूले पनि त्यस्तो बाली पनि लगाएर दोहोरो फाइदा लिएको श्रेष्ठले बताए । अहिले उनले ड्रागन फ्रुट लगाएको क्षेत्रमा भिन्डी पनि लगाएका छन् । तर भिन्डीजस्तो अग्लो बोट होइन खुर्सानी, काउलीजस्ता सानो बोट हुने तरकारी रोप्न विज्ञले सुझाएकाले भिन्डीपछि सानो बोट हुने बाली मात्रै लगाउने उनले सुनाए ।

एक पटक बिरुवा लगाएपछि समयसमयमा सामान्य गोडमेल र सिँचाइबाहेक अन्य गोडमेल गर्नु नपर्ने र रोपेको २ वर्षदेखि लगातार १५ वर्षसम्म फल दिने हुनाले यसको खेतीबाट राम्रो आम्दानी हुने देखिन्छ । श्रेष्ठले प्रति केजी ५ सय रुपैयाँका दरले फल बेचेको सुनाए । गर्मी समयको जेठदेखि असोजसम्म फल्ने यो फल मिठो हुने भएकाले र नयाँ फल भएकाले पनि उपभोक्ताले बढी रुचाएको उनको अनुमान छ । उनले सो फलको बिरुवा पनि प्रति गोटा २ सय ५० रुपैयाँका दरले बेच्ने गरेका छन् ।

सुन्दरहरैंचाका अगुवा किसान रेणुप्रसाद श्रेष्ठलाई नगरपालिकाले परीक्षणका लागि ९० बोट ड्रागन फु्रटको बिरुवा उपलब्ध गराएको थियो । श्रेष्ठका अनुसार माटो परीक्षण गर्दा उनको खेतको माटो ड्रागन फु्रटको लागि उपयुक्त ठहरिएको थियो । त्यसपछि नगरपालिकाले उनलाई ड्रागन फ्रुटको बिरुवा उपलब्ध गराएको थियो । त्यस्तै, सो खेतीको लागि आवश्यक पर्ने सिमेन्टको पिल्लर पनि नगरपालिकाले नै उपलब्ध गराएको थियो ।

उत्पादन नहुँदासम्म भने फाइदा हुँदैन जस्तो लागेको हरिमाया श्रेष्ठले बताइन् । बजारको समस्या नभएको र घरमै आएर ग्राहकले किनेको देख्दा भने खुशी लागेको उनले बताइन् । यसपटक पहिलो लटमा लगभग ८० हजार रुपैयाँको फल बेचेको उनले बताइन् । दोस्रो लटको फल फल्दैछन् भने तेस्रो लटका फलको फूल फुलिसकेको छ । चौथो लटको उत्पादनको लागि पनि कोपिला बसिसकेको छ । श्रेष्ठका अनुसार फूल फुलेको २८ औँ दिनमा फल पाकेर खानको लागि योग्य हुन्छ ।

सुन्दरहरैंचा ११ का श्रेष्ठ मात्रै होइन सुन्दरहरैंचाको वडा नम्बर ४ का नवीन दाहालले पनि यसको व्यावसायिक खेती गरेका छन् । त्यस्तै, वडा नम्बर ३ का रामप्रसाद राईले पनि यसको व्यावसायिक खेती गरेका छन् । केही व्यक्तिले भने २÷४ बोट मात्रै रोपेका छन् ।

नयाँ फल भएको हुनाले धेरैले फलको बारेमा जान्ने इच्छा राख्न थालेकाले अब भने यसको खेती बिस्तार हुन सक्ने देखिएको व्यावसायिक रुपमा खेती गरिरहेका किसान बताउँछन् ।