विराटचोकः मोरङका एक युवाले कालिज फार्म सञ्चालन गरेर मनग्ये आम्दानी गरिरहेका छन् । मोरङको केराबारी गाउँपालिका वडा नम्बर ६ सानो रान्चामा रहेको हरि एग्रिकल्चर एण्ड लाइभ स्टक सेन्टर प्रालि पुग्नेका लागि केही नौलो महसुस हुने गरेको छ । यहाँ जंगली पंक्षीको चिरबिरसँगै घरपालुवा पंक्षी देख्न सकिन्छ ।

स्टक सेन्टरका सञ्चालक हरि भट्टराईको दैनिकी कालिजको हेरचाहमै बित्ने गरेको छ । २ वर्ष अघि सानो कुखुराको खोरमा केही कालिज पाल्न शुरु गरेका उनी अध्ययनलाई पूरा गर्न काठमाडौं गएपछि दक्षिणकालीमा उनले कालिजको फार्म अवलोकन गर्न पाए । कालिजको मासुको स्वादमा उनी पनि लोभिए ।

कोरोना भाइरसको संक्रमणको जोखिमका कारण देश लकडाउनमा गएपछि कलेज बन्द भयो उनी घर आए । अब उनको ध्यान कालिज फार्मलाई थप बिस्तार गर्नतर्फ लाग्यो । हेटौंडाबाट १ हजार कालिजका चल्ला ल्याए । उनले फार्मका लागि २ बिघा जग्गालाई घेराबारा लगाए र यसमा बाख्रा, कडकनाथ कुखुरा, बट्टाई, टर्की पाल्न सुरु गरे । यसको हेरचाह गर्ने ५ जना कामदार समेत राखेका छन् । सानो लगानीबाट व्यवसाय थालेका उनको अहिले ५० लाख भन्दा धेरै लगानी भइसकेको छ ।

फर्मलाई विकसित गर्दै अहिले त्यहीँ बस्ने र खाने राम्रो व्यवस्था गरिएको सञ्चालक भट्टराई बताउँछन् । यहाँ दैनिक कालिज चाख्नकै लागि भए पनि विराटनगर, इटहरी र धरानबाट मानिसहरु आउने गरेका छन् । यसलाई रेष्टुरेन्टको रुपमा विकास गर्दै लाने योजना रहेको उनी बताउँछन् । उनले कालिज प्रतिगोटा ४ हजारका दरले बेच्ने गरेका छन् । एउटा कालिज करीब २ केजीसम्मको हुने उनी बताउँछन् ।

यसका साथै कालिजका चल्ला समेत उत्पादन गर्न थालेका छन् । यसको बजार भोजपुर, संखुवासभा र तेह्रथुम रहेको र यस क्षेत्रबाट माग भइरहेको उनले बताए । अहिले भट्टराईको फार्ममा कालिज, लोकल कुखुरा, कडकनाथ कुखुरा, टर्की, बटाइ, खसी, बाख्रा रहेका छन् ।

कृषिप्रधान देश भएका कारण यसमै लगानी गर्न सके युवाको भविष्य राम्रो हुने उनले बताए । विदेशमा जाने र त्यहाँबाट ल्याएको पैसालाई कृषिमै सदुपयोग गर्नुपर्ने उनले बताए । उनको फार्मको कालिजले इटहरी र धरानको बजारलाई समेत धान्न नसकेको बताए । यसको माग धेरै भएकाले कालिजको संख्या थप गर्ने बताए । फार्मसम्म मोटरबाटो जान नसक्ने भएपछि वडा कार्यालयको सहयोग र आफ्नो ३० प्रतिशत लागतमा बाटो निर्माण गरेको उनले बताए ।