विराटचोकः शुक्रबारको साँझ सुन्दरहरैंचावासीका लागि मन्त्रमुग्ध बनाउने साँझको रुपमा रहन पुग्यो । सुन्दरहरैँचा साइकल राइडर्स गु्रपका निम्ति ‘नझरेका फूल’ हरूले शुक्रबार गजल महफिल आयोजना गरेको थियो । विराटचोक स्थित डेभिड क्याफेमा भएको कार्यक्रममा तीन जना गजलकारले आफ्ना गजल वाचन गरेका थिए ।

प्रेमभावका गजलका साथै सामाजिक, राजनीतिक र सांस्कृतिक विकृतिप्रति व्यङ्ग्य गरिएका हरेक गजल सुनेपछि स्रोताहरुले ‘वान्स मोर, वान्स मोर’ भन्दै हुटिङ गरेर स्रष्टालाई हौसला दिएका थिए ।

‘आगो देखेर नआत्तिनुहोस्, दाउरा थप्दै ताप्न काम लाग्छ
धोकेबाजको पत्र जतन गर्नुहोस्, पिउँदै पढ्दा मात्न काम लाग्छ…’
गजल महफिलमा यसरी आफ्नो गजलको शेर वाचन गर्न मोरङका छवि वैरागी घिमिरेले शुरु गर्नासाथ उपस्थित साहित्यानुरागीले तालीको पर्रासँगै वान्स मोरको हुटिङ गरेका थिए ।

‘गुमायो निद आँखाले रात त्यो ढल्किएपछि …’ र
‘मैले खानकै निम्ति साँझ बिहान चट्टान बेच्नुपर्छ …’ बोलका थप २ वटा गजल पहिलो चरणमा घिमिरेले वाचन गरेका थिए ।

‘युद्ध झेलेर आएको छ, प्रकोप भोगेर आएको छ
एकछिन सुस्ताओस् समय खुब थाकेर आएको छ…’
सिन्धुलीकी साहित्यकार अमला अधिकारीले यसरी गजल वाचन गरेर स्रोताको मन आफूतिर तानेकी थिइन् ।

‘निकै आतङ्क मच्चाउँदै तिम्रो याद आयो…’ र ‘डालोमा सामल, गाग्रीमा पानी सकिन आँट्यो ..’ बोलका थप २ वटा गजल अधिकारीले पहिलो चरणमा सुनाएकी थिइन् ।

‘चुहिने छानो टाल्ने समस्या थियो जदौ मालिक
घर नै जफत गर्नुभयो चिन्ता सकियो जदौ मालिक’
बोलको गजल वाचन गरेर आफ्ना गजल सुनाउन थालेका काठमाडौंका साहित्यकार आँचलकुमार शर्माले पहिलो चरणमा ३ वटा गजल सुनाएका थिए । ‘कस्ता भयौ झारजस्ता बाली डस्यौ डस्नुसम्म…’ र ‘रहर थुन्न मनको ठूलै पिँजडा छ …’ बोलका थप २ वटा गजल उनले सुनाएका थिए ।

प्रत्येक स्रष्टाले ३ चरणमा ३ वटाका दरले गजल वाचन गर्ने कार्यक्रम भए पनि अन्तिम चरणमा भने रात निकै बितिसकेको भन्दै कम गजल वाचन भएका थिए ।

सुन्दरहरैंचा राइडर्स क्लबको आयोजनामा भएको कार्यक्रममा कलाकारलाई सम्मान पनि गरिएको थियो । साहित्यकार मेदिनीप्रसाद बराल, मोहनप्रसाद काफ्ले र गायक श्रीकृष्ण लुइँटेललाई प्रमुख अतिथि प्रदेश सांसद लोकप्रसाद संग्रैलाले सम्मान गरेका थिए ।

सम्मानित हुने बरालले भिन्न साहित्यभन्दा भिन्न क्षेत्रत्रबाट यति ठूलो कार्यक्रम हुने देशमै उदाहरणीय भएको बताए । खेल र कला साहित्य फरकफरक भए पनि यो सम्मान गर्न अघि बढ्नु साहित्यिक व्यक्तिका लागि गौरवको विषय भएको बरालको भनाइ थियो । सम्मानित हुने गायक लुइँटेलले आफ्ना गीत सुनाएका थिए ।

कार्यक्रमको शुरुमा भरत गुरागाईं ‘बर्बरिक’ ले अनुत्तरित प्रश्नहरु शीर्षकको कविता सुनाएका थिए । त्यस्तै, गायक दुर्गा पराजुलीले भर्खरै रेकर्ड भएको आफ्नो गीत ‘रातो सिँदुर सुहाउने सिउँदैमा, खाली सिउँदो भरिदिउँला हिउँदैमा ….’ सुनाएका थिए ।

सो महफिलमा धरान, इटहरी, केराबारी, विराटनगर, इलाम, दमक, बिर्तामोडलगायतका साहित्यानुरागी गजल सुन्नका लागि आएका थिए ।

क्लबका अध्यक्ष केशव बजगाईको अध्यक्षतामा भएको कार्यक्रमको औचित्यका बारेमा साइकल राइडर्स खेमराज दाहालले प्रकाश पारेका थिए । समाजसेवी सुरेन्द्रबहादुर थापा विशेष अतिथि रहेको कार्यक्रममा उमेश घिमिरेले स्वागत मन्तव्य राखेका थिए । कार्यक्रम सञ्चालन नझरेका फूलहरुका प्रस्तोता केपी घिमिरेले गरेका थिए ।