विराटचोकः खाद्य प्रविधि तथा गुण नियन्त्रण कार्यालय विराटनगरको आयोजनामा मोरङको सुन्दरहरैंचाका २१ वटा होटल तथा खाजाघरको अनुगमन भएको छ । अनुगमनका क्रममा १० वटा होटलले २ तारा अंकित उत्तम वर्गको खाद्य स्वच्छता मापक स्टीकर पाएका छन् ।

अनुगमनका क्रममा अधिकांश होटलका कुक, वेटर तथा अन्य कर्मचारीले मास्क, पञ्जा, एप्रोन आदि नलगाएको पाइएको कार्यालय प्रमुख राजकुमार रिजालले बताए । केही होटलमा त्यस्ता सामग्री नै नभएको वा काम नलाग्ने अवस्थामा भएको तथा कतिपय होटलमा भएका सामग्री प्रयोग नगरिएको पाइएको उनले बताए ।

केही होटलमा पुरानो चपिङ बोर्डको प्रयोग, मैलो एप्रोन वा टाबेलको प्रयोग भएको तथा सरसफाइमा ध्यान दिएको नपाइएको पनि उनले बताए ।

भान्सा व्यवस्थापनमा ध्यान नदिएको, फ्रिजमा शाकाहारी र मासुजन्य खाद्यपदार्थ पनि एकै ठाउँमा राखिएको पाइएको, पकाएको र काँचो खाद्य पदार्थ पनि एकै ठाउँमा राखिएको पाइएको तथा ढकनबिनाको डस्बिन प्रयोग गरिएको पाइएको खाद्य अधिकृत काशीनाथ घिमिरेले बताए । कतिपय होटललाई स्तर सुधार्न ७ दिनको समयसीमा दिइएको उनले जानकारी दिए ।

अनुगमन टोलीले केही होटलमा मिति सकिएका खाद्य पदार्थ फेला पारी नष्ट गरेको थियो । त्यसरी फेला पारेको म्याद गुज्रिएको माउण्टेन ड्यु, स्प्राइट, कोक, आँटा तथा मैदालगायतका खाद्य सामग्री अनुगमन टोलीले नष्ट गरेको थियो ।

अनुगमनका क्रममा नयाँ होटल तथा रेष्टुरेन्टको स्तरीकरण गरी स्तरीकरण प्रमाणपत्र दिइनुका साथै पुराना होटल तथा रेष्टुरेन्टको स्तरीकरण नवीकरण गरिएको थियो । त्यस क्रममा ८ वटा नयाँ होटलको स्तरीकरण गरिएको तथा अन्य १३ वटाको स्तरीकरण नवीकरण गरिएको कार्यालयका शङ्कर न्यौपानेले बताए ।

लकडाउन र कोरोना संक्रमणको जोखिमको त्रासका कारण लामो समय अनुगमन नभएकाले लकडाउनपछि पहिलो पटक सुन्दरहरैंचाबाट अनुगमन शुरु गरिएको कार्यालयले जनाएको छ । अनुगमनलाई निरन्तरता दिइने कार्यालय प्रमुख रिजालले बताए ।

लकडाउनका कारण होटल बन्द रहेकाले र खर्च धान्न समस्या भएकाले होटल व्यवसायी मारमा परेको अनुगमन गरिएका होटलका सञ्चालकले बताए । कतिपय खाद्य तथा पेय पदार्थ आफूहरु नभएको बेलामा डिलरले ल्याइदिने र त्यस्तो अवस्थामा म्याद गुज्रिएका वा उपभोग्य मिति सकिन लागेका सामान पनि ल्याइदिने गरेको पाइएको व्यवसायीको गुनासो थियो ।

अनुगमन टोलीमा कार्यालयका तर्फबाट राजकुमार रिजाल, काशीनाथ घिमिरे तथा शङ्कर न्यौपाने सहभागी थिए । स्थानीय खाद्य स्वच्छता समूहका संयोजक सुमन बानियाँ र सदस्यद्वय गणेश खड्का तथा बाबुराम भट्टराई र सञ्चारकर्मी सम्मिलित टोलीले अनुगमन गरेको थियो ।

सोमबार विराटचोक र खोर्सानेका मोनालिसा, सन्ध्या, सिजलिङ फायर, सिर्जना, चौतारी, स्वाद, कफी क्लब, गोर्खा किचन, सेभेन क्याफे, डाक्ट डेभिड क्याफे र प्लानेट लाउन्जको अनुगमन भएको थियो ।

मंगलबार गोकुलम रिसोर्ट, गोकर्ण रिसोर्ट, भरोसा बीबी क्यु, आँगन फास्टफुड, श्रेष्ठ होटल एण्ड लज, होटल योजना, जिङ्को रेष्टुरेन्ट, दौँतरी रेष्ट्रो, रातो भाले टु रेस्टुरेन्ट र सिसा लाउन्जको अनुगमन भएको थियो ।

अनुगमन टोलीले खाद्य स्वच्छताको आधारमा अनुगमन गरी १० वटालाई उत्तम, ६ वटालाई सन्तोषजनक, एउटालाई सामान्य स्तरको स्टिकर दिएको थियो । ४ वटा होटलले भने न्यूनतम मापदण्ड नपुगेका कारण स्टीकर पाएनन् । ९० भन्दा बढी अङ्क आउँदा पाउने क वर्गको अर्थात् अत्युत्तम स्टीकर भने कुनै पनि होटलले पाएनन् ।