विराटचोकः नझरेका फूलहरु पलेँटी साँझले हरेक वर्ष स्वरसम्राट नारायणगोपालको स्मृति दिवसका दिन आयोजना गर्ने नारायणगोपाल स्मृति साँझ आइतबार साङ्गीतिक कार्यक्रम गरी सुन्दरहरैंचा नगरपालिकाको विराटचोकमा मनाइएको छ ।
नेपाली सांगीतिक क्षेत्रका थुप्रै कालजयी रोमान्टिक, प्रेम, वियोग र विरह लगायतका गीतमा संगीत दिएका स्वर सम्राट नारायण गोपालले धेरै आधुनिक नेपाली गीतहरु गाएका छन् । वि.सं. १९९६ जन्मिएर वि.सं २०४७ साल मंसिर १९ गते निधन भएका नारायण गोपालको सम्झनामा मंसिर १९ मा उनको स्मृति दिवस मनाउने गरिन्छ । सोही क्रममा आइतबार ३१ औँ स्मृति दिवस मनाइएको हो ।

उनका चर्चित गीतहरुमा एउटा मान्छेको मायाले यहाँ कति फरक पार्दछ जिन्दगीमा…, पर्खि बसँे आउला भनी, मेरो उठ्ने पालो…, झरेको पात झैँ भयो उजाड मेरो जिन्दगी…, यति धेरै माया दिई मनभरि दुःख नदेऊ…., केही मीठो बात गर, रात त्यसै ढल्दैछ…, आजै र राती के देखेँ सपना, मै मरि गएको …, माया गर्नेको चोखो माया पनि देखियो, वाचा गर्नेको वाचा बन्धन पनि देखियो…, तिम्रो जस्तो मुटु मेरो पनि…, यो सम्झने मन छ, म बिर्सु कसरी तिमी नै भनिदेउ, ए जाने निठुरी… लगायत रहेका छन् ।

मोरङको सुन्दरहरैंचा नगरपालिका स्थित हरैँचामोडमा आयोजित कार्यक्रममा प्रमुख अतिथि प्रदेश सभा सदस्य लोकप्रसाद संग्रौला रहेका थिए । जिउँदो हुँदै कलाकारलाई सम्मान गर्नुपर्छ भन्ने मूल ध्येयका साथ हरेक वर्ष थुप्रै कलाकारलाई सम्मान गर्दै आएको पलेँटी साझले वरिष्ठ लोक गायक तुलसी पराजुली र गायिका रेखा शाहलाई सम्मान गरेको छ ।

यसैगरी गायिका काव्या आचार्यले नारायण गोपालका गीतमा आफ्नो स्वर दिएर कार्यक्रमको माहोल तताएकी थिइन् ।

सम्मानित कलाकारमध्ये गायिका शाहले ‘सिमसिमे पानीमा, ज्यानले बेइमान गर्छौ कि जिन्दगानीमा…’ बोलको गीत गाएकी थिइन् । वि. सं. २०४९ सालमा रेडियो नेपालले आयोजना गरेको अधिराज्यव्यापी लोकगीत प्रतियोगितामा शाहले गाउँले लोक भाकामा आफ्नै लय र शब्द संकलनमा सो गीत गाएकी थिइन् । सो प्रतियोगितामा उनी पहिलो भइन् । धादिङमा जन्मेकी रेखाले सिमसिमे पानीमा…, नजिक छौ तिमी…, साइँली माइली…, तिमीलाई केही…, तस्बिरमात्र लगायतका थुप्रै गीत गाइसकेकी छिन् ।

सम्मानित गायक पराजुलीको पहिलो गीत ‘नरोई बस है मेरी आमा, म गएँ मुग्लान, नमरी बाँचे फर्केर आउला, दशैंको टीकामा…’ २०५१ सालमा रेकर्ड भएको थियो । यही गीत नै उनको पहिलो गीत थियो । २०५७ सालमा बजारमा आएको ‘खोटाङ जिल्ला दिक्तेल बजार…’ बोलको गीतबाट नेपाली लोक गीतको क्षेत्रमा स्थापित भएका पराजुलीको ‘कान्छीको छाता ढल्काइदेऊ यता…, सालैज्यू, सालैज्यू…, पाटनैको पातलो चिउरा…, आकाशैको कालो बादल…, लेकैमा चौंरी, चौंरीको छुर्पी… लगायतका गीतहरु निकै चर्चित छन् ।

नझरेका फूलहरु कला केन्द्रले दर्जनौ कलाकारलाई विराटचोकमा ल्याएर सम्मान गर्दै आएको केन्द्रका अध्यक्ष केपी घिमिरेले बताए । कार्यक्रममा साहित्कार छवि वैरागी घिमिरे, गीतकार जेबी थुलुङ, गायिका भूमा अधिकारी, यमुजना पराजुलीलगायतको उपस्थिति रहेको थियो । पराजुली र अधिकारीले पनि नारायण गोपालका गीतहरु गाएका थिए । गायक दुर्गा पराजुलीले नारायण गोपालको ‘पोखिएर घामको झुल्का भरी सँघारमा…’ बोलको गीत गाएर कार्यक्रमको शुुरुवात गरेका थिए ।