मंसिर ४ गते हुने प्रतिनिधि सभा तथा प्रदेश सभा निर्वाचनमा केही रोचक र रमाइला परिदृश्यहरू देखिएका छन् । ती परिदृश्यहरू यस्ता छन्ः

श्रीमान् श्रीमती नै उम्मेद्वार
राजनीतिक दलहरूभित्र निर्वाचनमा उम्मेदवार हुन नपाएकोमा थुप्रै नेताहरू असन्तुष्ट छन् । तर केही उम्मेद्वारका दम्पत्ति नै यसपटक चुनाव लडिरहेका छन् ।
प्रधानमन्त्री शेरबहादुर देउवा डडेल्धुराबाट चुनाव लड्दैछन् भने उनकी श्रीमती आरजु राणा नेपाली कांग्रेसबाट समानुपातिकतर्फ उम्मेद्वार छिन् ।
त्यस्तै, गृहमन्त्री बालकृष्ण खाण रूपन्देही ३ बाट निर्वाचन लड्दैछन् भने उनकी श्रीमती मञ्जु खाण नेपाली कांग्रेसको समानुपातिकतर्फ उम्मेदवार छिन् ।

नेकपा माओवादी केन्द्रका वर्षमान पुन रोल्पाबाट र उनकी श्रीमती पूर्वसभामुख ओनसरी घर्ती काठमाडौं–२ बाट चुनाव लड्दैछन् ।
शिक्षामन्त्री समेत रहेका माओवादी केन्द्रका सचिव देवेन्द्र पौडेल बाग्लुङ २ बाट प्रत्यक्षतर्फ उम्मेदवार छन् भने उनकी पत्नी बलावती शर्मा प्रतिनिधि सभाकै लागि समानुपातिक तर्फको सूचीमा छिन् ।

नेकपा एमालेका नेता रघुवीर महासेठ र जुलीकुमारी महतो पनि दम्पत्ति हुन् । दुवै यसपटक प्रत्यक्ष निर्वाचन लड्दैछन् । रघुवीर धनुषा क्षेत्र नम्बर ३ र जुली धनुषाकै क्षेत्र नं ४ बाट उम्मेदवार छन् ।

त्यस्तै, जनता समाजवादी पार्टीका अशोक राई सुनसरी–१ बाट चुनाव उठेका छन् भने उनकी श्रीमती सुशीला श्रेष्ठ समानुपातिक तर्फको सूचीमा छिन् ।

सय वर्षका उम्मेदवार

गोरखा क्षेत्र नम्बर २ मा प्रतिनिधि सभातर्फ सय वर्षका टीकादत्त पोखरेल उम्मेदवार छन् ।
उनी नेपाली कांग्रेस बिपीबाट उम्मेदवार बनेका हुन् । पोखरेलको प्रतिस्पर्धा नेकपा माओवादी केन्द्रका पुष्पकमल दाहाल ‘प्रचण्ड’ र नेकपा एमालेका अब्दुस मियाँसँग हुँदैछ । २००७ सालदेखि जनताका लागि लड्दै आएको बताउने टीकादत्तले चुनाव प्रचारमा आफूले प्रचण्डलाई सजिलै पराजित गर्ने दाबी गर्ने गरेका छन् ।

रिटायर्ड प्रहरीको राजनीतिक कदम

नेपाल प्रहरीको महानिरीक्षक भइसकेका सर्वेन्द्र खनाल यसपटक नेकपा एमालेबाट काठमाडौंं–६ मा चुनाव लड्दैछन् ।
त्यस्तै, पूर्व डिआइजी रमेश खरेल काठमाडौं–१ बाट चुनावमा होमिएका छन् ।

त्यस्तै, २०७४ को निर्वाचनमा नै नेकपा एमालेबाट टिकट पाएर चुनाव जितेका पूर्व डिआइजी नवराज सिलवाल यसपटक पनि ललितपुर–३ बाट चुनावी प्रतिस्पर्धामा छन् ।

नेपाल प्रहरीमा महानिरीक्षक भइसकेका ध्रुवबहादुर प्रधान पनि यसपटकको चुनावमा राप्रपाबाट उम्मेदवार छन् । उनी नवलपरासी–२ बाट उठेका छन् ।
त्यसैगरी सशस्त्र प्रहरीका पूर्व एआइजी ठाकुरमोहन श्रेष्ठ पनि राप्रपाबाट काठमाडौं–४ मा उम्मेदवार छन् ।

जो जित्दा पनि संसद छिर्न पाउने छैनन्
नेपाली कांग्रेसबाट सुनसरी–३ बाट उम्मेद्वार बनेका विजय गच्छदार चुनाव जिते पनि संसद छिर्न पाउने छैनन् । उनी विरूद्धको भ्रष्टाचार मुद्दा हाल विशेष अदालतमा विचाराधीन छ ।

अहिले १० लाख धरौटीमा छुटेका गच्छदार सांसद बनेको अवस्थामा पनि निलम्बनमै रहनेछन् । मुद्दाको किनारा नलागेसम्म न त उनले प्रधानमन्त्रीलाई विश्वासको मत माग्दा मतदान गर्न पाउने छन् न त कुनै कानुन बनाउँदा अथवा बजेट पास गर्दा भोट नै दिन पाउनेछन् ।

गच्छदारजस्तै भ्रष्टाचारको आरोप खेपिरहेका नेपाली कांग्रेसका नेता, पूर्वमन्त्री टेकबहादुर गुरूङले मनाङमा जीत हात पारेको अवस्थामा संंसद छिर्न पाउने छैनन् । उनीविरूद्ध पनि भ्रष्टाचारको मुद्दा विशेष अदालतमा विचाराधीन अवस्थामा रहेको छ ।

जसको नाम समानुपातिकको सूचीबाट हट्यो

प्रतिनिधिसभा निर्वाचनका लागि समानुपतिकतर्फ दलहरूले बुझाएको सूचीबाट निर्वाचन आयोगले २ सय ३ जनाको नाम हटाएको छ ।

नेपाली कांग्रेसबाट समानुपातिकतर्फ उम्मेदवार रहेका प्रधानमन्त्रीका प्रेस विज्ञ गोविन्द परियारको नाम समेत हटेको छ । उनी लाभको पदमा भएका कारण नाम काटिएको हो ।

त्यस्तै, माओवादी केन्द्रका ३ जनाको नाम काटिएको छ । जसमध्ये उर्मिलादेवी कोइरनले दोहोरो उम्मेद्वारी दिएकी थिइन् । जनता समाजवादी पार्टीका दश जनाको नाम काटिँदा सर्पराज शाहीको उमेर २४ वर्ष भएका कारण नाम हटेको छ । प्रतिनिधि सभाको चुनाव लड्ने व्यक्ति २५ वर्ष पुगेको हुनुपर्छ ।

त्यस्तै, एकीकृत समाजवादीका ६ जनाको नाम हटेको छ । जसमध्ये एक उम्मेदवारले मतदाता नामावली र उम्मेदवारी दिँदा लैंगिक पहिचान फरक उल्लेख गरेकै कारण सूचीबाट हट्नुपरेको छ ।

बाबुको टिकट, छोरा उम्मेदवार

मुस्ताङमा नेपाली कांग्रेसले सभापति रोमी गौचन थकालीलाई प्रतिनिधि सभाको टिकट पठाएको थियो । सबैले गौचन चुनाव लड्ने आँकलन गरेका थिए । तर उनले उम्मेद्वारी दर्ता गर्ने बेला छोरा योगेश गौचनको नाम लेखेर उम्मेद्वारी दर्ता गर्न लगाए । २८ वर्षीय योगेश प्रतिनिधि सभातर्फ कांग्रेसबाट उठेका उम्मेदवारमध्ये कान्छा उम्मेद्वार बनेका छन्। – सेतो पाटीबाट