काठमाडौंः काठमाडौं ७, ललितपुर २ र ३, भक्तपुर २ र कास्की २ मा मतगणना भइरहेको छ ।.

ललितपुर २ को मतगणना सातदोबाटोको नेपाल तेक्वान्दो संघको कार्यालयमा भइरहेको छ । ललितपुरमा ५८ प्रतिशत मत खसेको निर्वाचन अधिकृतको कार्यालयले जनाएको छ ।

निर्वाचन अधिकृत दीपशिखा मुनाकर्मीका अनुसार एउटै हलमा चार वटा गणनास्थल बनाएर मतगणना सुरु गरिएको छ । सर्वदलीय सहमतिपछि बिहान ४ बजेदेखि मतगणना शुरु भएको हो ।

सो क्षेत्रबाट प्रतिनिधिसभामा नेकपा (एमाले)का उम्मेदवार प्रेमबहादुर महर्जन र गठबन्धनका तर्फबाट नेकपा (एकीकृत समाजवादी)का उम्मेदवार कृष्णलाल महर्जन बीच मुख्य प्रतिष्पर्धा हुने अनुमान गरिएको छ ।

ललितपुर ३ मा निर्वाचन अधिकृतको कार्यालय रहेको जावलाखेलस्थित स्थानीय विकास प्रशिक्षण प्रतिष्ठानमा मतगणना शुरु भएको छ ।

ललितपुर महानगरपालिका वडा नं २०, २१ र २२ को प्रतिनिधिसभाको प्रत्यक्षतर्फको मतगणना शरु गरिएको निर्वाचन अधिकृत धर्मराज पौडेलले जानकारी दिए ।

सो क्षेत्रमा गठबन्धनबाट नेकपा (माओवादी केन्द्र) की पम्फा भुसाल, नेकपा (एमाले)का अमृत खड्का, राष्ट्रिय स्वतन्त्र पार्टीको डा तोसिमा कार्कीलगायत प्रतिस्पर्धामा छन् ।

यस्तै भक्तपुर क्षेत्र नम्बर २ को मतगणना बोडेमा रहेको कृषि विकास तालिम केन्द्रमा भइरहेको छ .। भक्तपुरमा करिब ७२ प्रतिशत मत खसेको जिल्ला निर्वाचन कार्यालय जानकारी दिएको छ ।

सो क्षेत्रमा सत्ता गठबन्धनको तर्फबाट नेपाली कांग्रेसका सभापति दुर्लभ थापा र नेकपा (एमाले)का तर्फबाट एमाले पोलिटब्युरो सदस्य महेश बस्नेतबीच कडा प्रतिस्पर्धा रहेको अनुमान गरिएको छ ।

भक्तपुर क्षेत्र नं १ को आज बिहान ७ बजेदेखि मतगणना सुरू गर्ने सर्वदलीय बैठकमा सहमति भएको छ ।

काठमाडौं निर्वाचन क्षेत्र नं ७ को मतगणना काठमाडौं महानगरपालिका वडा नं १६ नयाँबजारस्थित जुडो हलमा शुरु भएको छ । सर्वदलीय सहमतिका आधारमा मतगणना थालनी गरिएको निर्वाचन अधिकृत उषा श्रेष्ठले जानकारी दिइन् ।

करिब ६० प्रतिशत मत खसेको सो क्षेत्रमा गठबन्धनका तर्फबाट नेकपा (माओवादी केन्द्र) की अस्मिता सिंह (मानुषी यमी) भट्टराई, नेकपा (एमाले)का श्यामकुमार घिमिरे, जनता समाजवादी पार्टीका राजेन्द्र श्रेष्ठ, स्वतन्त्र उम्मेदवार रामवीर मानन्धरलगायत प्रतिस्पर्धामा छन् ।

कास्की निर्वाचन क्षेत्र नं २ को मतगणना सुरु भएको छ । पोखरा–१५ कोलपाटको मतपेटिकाबाट गणना सुरु भएको हो ।