विराटचोकः नवनियुक्त प्रधानमन्त्रीलगायतका केही मन्त्रीले शपथ ग्रहण गर्ने दिन शेयर बजार झण्डै ५७ अंकले बढेको छ । नेकपा एकालेका विष्णु पौडेल अर्थमन्त्री बन्ने खबरले शेयर लगानीकर्ता झन् उत्साहित भएको अनुमान गरिएको छ । लगानीकर्ताले रुचाएका अर्थमन्त्रीमा पर्छन् पौडेल ।

बजार खुलेदेखि नै उकालो लागेको शेयर बजार ५६ दशमलव ८८ अंकले बढेर नेप्से परिसूचक १९२४ दशमलव ०९ को बिन्दुमा रोकिएको छ । समग्रमा बजार ३ दशमलव ०५ प्रतिशतले बढेको हो । राम्रा र बलिया कम्पनीको सूचक सेन्सेटिभ इन्डेक्स पनि ८ दशमलव ३८ अंकले बढेर ३७५ दशमलव ४४ को बिन्दुमा पुगेको छ । सो इन्डेक्स २ दशमलव २८ प्रतिशतले उकालो लागेको हो ।

लामो समयपछि २ अर्बभन्दा बढीको शेयर किनबेच भएको छ । नेप्से उपसमूहमा रहेका १३ वटामध्ये १२ वटा उपसमूहमा हरियाली छाएको छ । नेपाल टेलिकम समेटिएको अन्य समूहमा भने गिरावट आएको छ । सो समूह २ दशमलव २९ प्रतिशतले ओरालो लागेको हो ।

आज वित्त समूह सर्वाधिक ६ दशमलव ५२ प्रतिशतले उकालो लागेको छ । जलविद्युत समूह ५ दशमलव १६ प्रतिशतले बढ्दा विकास बैंक समूह ४ दशमलव ६६ प्रतिशत र लगानी समूह ४ दशमलव १६ प्रतिशतले उकालो लागेको छ ।

निर्जीवन बीमा समूह ३ दशमलव ४८ प्रतिशत, बैंकिङ समूह ३ दशमलव ३५ प्रतिशत, व्यापार समूह ३ दशमलव १३ प्रतिशत र उत्पादन तथा प्रशोधन समूह २ दशमलव ८६ प्रतिशतले बढेका छन् ।

लघुवित्त समूह २ दशमलव ८० प्रतिशत, जीवन बीमा समूह २ दशमलव ७८ प्रतिशत, होटल तथा पर्यटन समूह २ दशमलव २८ प्रतिशत र सामुहिक लगानी कोष समूह १ दशमलव ८२ प्रतिशतले बढेका छन् ।

आज अन्य समूहमात्रै २.२९ प्रतिशतले ओरालो लागेको छ ।

नेप्सेमा सूचीकृतमध्ये २ सय ५० कम्पनीका ५६ लाख ५३ हजार ५३ कित्ता शेयर ३८ हजार ५ सय ५३ पटक किनबेच हुँदा २ अर्ब ९ करोड ७० लाख ४९ हजार ९ सय ४१ रुपैयाँको कारोबार भएको छ ।

सबैभन्दा धेरै मूल्य घटेको नेपाल टेलिकमको सर्वाधिक २० करोड ८८ लाख ७ हजार २ सय ४४ रुपैयाँको कारोबार भएको छ । हिमालय डिस्टिलरी, नबिल बैंक, रिडी पावर र एनआईसी एशिया बैंक उच्च कारोबार गर्ने ५ कम्पनीमा परेका छन् ।

आज १२ वटा कम्पनीको सेयरमूल्य १० प्रतिशतले बढेको छ । गोर्खाज फाइनान्स, धौलागिरी लघुवित्त, खप्तड लघुवित्त, सिर्जनशील लघुवित्त, रिलायन्स फाइनान्स, हिमालयन पावर पार्टनर, घलेम्दी हाइड्रो, शिवश्री हाइड्रोपावर, विन्ध्यवासिनी हाइड्रोपावर, युनियन हाइड्रोपावर, हिमालयन एभरेस्ट इन्स्योरेन्स र समृद्धि फाइनान्सको शेयरमूल्य १० प्रतिशतले बढेको हो ।

नेपाल टेलिकमको शेयरमूल्य ५ दशमलव ५६ प्रतिशतले ओरालो लागेको छ । मूल्य घट्ने अन्य कम्पनीमा सिवाईसी लघुवित्त, उन्नति सहकार्य लघुवित्त, सपोर्ट माइक्रोफाइनान्स र केही सामुहिक लगानी कोषहरु छन् ।

बजार बढेसँगै समग्र बजार पूँजीकरण २७ खर्ब ८२ अर्ब २७ करोड १ लाख ४१ हजार १ सय ३७ रुपैयाँ कायम भएको छ ।