विराटचोकः पूर्वाञ्चल विश्वविद्यालय गोठगाउँको केन्द्रीय कार्यालयमा गत मंसिर १ गतेदेखि प्राध्यापक संघले लगाएको तालाबन्दी यथावत् छ । त्यसको १ महिनापछि यही पुस ४ गते विद्यार्थी संगठनले ताला लगाए । तर, तालाबन्दीको जानकारी उनीहरुले माउ पार्टीलाई दिएनन् ।
पुस ३ गते २४ घण्टे अल्टिमेटम दिँदै नेपाल विद्यार्थी संघ, अनेरास्ववियु र अखिल क्रान्तिकारीले संयुक्त रुपमा विज्ञप्ति निकाले । ४ सूत्रीय माग राखेर २४ घण्टे अल्टिमेटम दिएका उनीहरुले आफ्ना माग पूरा नभएको भन्दै भोलिपल्ट पुस ४ गतेदेखि तालाबन्दी गरे । आफ्ना माग राखिएको र तालाबन्दी गरिएको बारेमा भने उनीहरुले आफ्ना आस्थावान दलमा यसबारेमा जानकारी नै गरेनन् ।
तालाबन्दीको बारेमा आफूले ४ दिनअघि थाहा पाएको नेपाली कांग्रेस सुन्दरहरैंचाका सभापति भक्तिप्रसाद सिटौलाले बताए । सिटौला पूर्वाञ्चल विश्वविद्यालय रहेको सुन्दरहरैंचाको वडा नम्बर ७ का बासिन्दा हुन् । आफन्तमार्फत् तालाबन्दीको बारेमा ४ दिन अघि थाहा पाएको सिटौलाले बताए ।
नेकपा माओवादी केन्द्र सुन्दरहरैंचाका अध्यक्ष दुष्यान्त भट्टराईले पनि तालाबन्दीको बारेमा आफूले ४ दिनअघि मात्रै थाहा पाएको बताए । विद्यार्थी नेतृत्वले आवश्यक नठानेर जानकारी नदिएको हुन सक्ने बताउँदै उनले अब वार्ताको माध्यमबाट समस्याको समाधान हुने बताए ।
नेकपा एमाले सुन्दरहरैंचाका अध्यक्ष मातृकाप्रसाद ढकालले तालाबन्दीको जानकारी आफूले आज बिहान मात्रै पाएको बताए । पूर्वाञ्चल विश्वविद्यालयमा विद्यार्थीको संगठन निर्माण भर्खरै हुँदै गरेको र मातृ पार्टीलाई जानकारी दिनुपर्छ भन्ने अज्ञानताले आफूकहाँ जानकारी नआएको हुन सक्ने उनको भनाइ थियो ।
विद्यार्थीले ताला लगाउनुअघि प्राध्यापक संघले ताला लगाएको थियो । सो विषय पनि कसैलाई जानकारी नभएको पाइयो ।
सुन्दरहरैंचा नगरपालिकाका प्रमुख केदारप्रसाद गुरागाईँ पनि तालाबन्दीको विषयमा आफूलाई कसैले जानकारी नै नदिएको बताउँछन् । केही दिनअघि यो विषय आफूले थाहा पाएको र अप्रत्यक्ष रुपमा घटनाको बारेमा जानकारी लिने काम भइरहेको उनले बताए ।
विश्वविद्यालय रहेको वडा सुन्दरहरैंचा–७ का वडाध्यक्ष भुवनसिंह मगर मात्रै होइन अधिकांश समाजका अगुवा व्यक्ति विश्वविद्यालयमा भएको तालाबन्दीको बारेमा अनभिज्ञ रहेको पाइयो ।
नेकपा एकीकृत समाजवादीका नगर अध्यक्ष महेश आचार्य आफूले तालाबन्दीको विषयमा कुनै जानकारी नपाएको बताए । वार्ताको माध्यमबाट समाधान खोजिनुपर्ने मान्यतामा एकीकृत समाजवादी रहेको उनले प्रष्ट्याए ।
पूर्वाञ्चल विश्वविद्यालयमा तालाबन्दीः महिना दिनसम्म सबै बेखबर
पूर्वाञ्चल विश्वविद्यालयमा माघ १ देखि ९ बजेदेखि ५ बजेसम्म सेवा सञ्चालन हुने
You must be logged in to post a comment Login