विराटचोकः सुन्दरहरैंचा नगरपालिकाले शुरु गरेको जनश्रमदानलाई नगरवासीले निरन्तरता दिएका छन् । नगरप्रमुख केदारप्रसाद गुरागाईको सक्रियतामा शुरु भएको अभियानमा अहिले नगरवासीको उल्लेख्य सहभागिता रहने गरेको छ ।

नगरपालिकाले श्रमको विकास गर्दै थोरै रकमबाट धेरै काम गर्ने मनशायले यो अभियानको थालनी गरेको नगरप्रमुख गुरागाईले बताए । वडा नम्बर ७ मा रहेको गछिया खोला पूर्वपश्चिम लोकमार्ग पुल उत्तर तर्फको बस्तीलाई बाढी र कटानबाट रोक्न यो ठाउँमा जनश्रमदान मार्फत काम भइरहेको उनले बताए ।

सो बस्तीका मानिसहरु खासगरी खोला क्षेत्रमा काम गरेर जीविका चलाउने र यस ठाउँका नागरिकलाई लागत साझेदारी गर्न असहज भएकाले पनि जनश्रमदान अभियानले सहयोग पुग्ने नगरप्रमुख गुरागाईँ बताउँछन् ।

स्थानीय चन्द्रमाया राई धरानमा समेत गएर जनश्रमदान गरेको अनुभव सुनाउँदै भन्छिन्, ‘अब हाम्रै नगरका मेयर पनि ढुङ्गा बोक्न लाइनमा लाग्दा धेरै खुसी लागेको छ । जोखिम हुने क्षेत्रको पहिचान गर्दै यस्तो काममा लाग्ने भन्नुभएको छ मेयरले राम्रो कुरा हो । अब भने बाढी आउँदा पनि निदाइने भइयो ।’

यो खोलाले बिकराल अवस्था ल्याउने भएकाले बाढीको समयमा पूर्वपश्चिम लोकमार्गमा रहेको पुल समेत जोखिममा पर्ने गरेको छ । यसको संरक्षण र खोला कटानलाई रोक्न बेलैमा तारजाली गरेर समुदाय तथा निर्मित संरचनाको सुरक्षा गर्न स्थानीय सरकार लागि परेको वडा नम्बर ७ का वडाअध्यक्ष भुवनसिंह मगरले बताए ।

गछिया खोला तारजाली तटबन्धन उपभोक्ता समितिकी अध्यक्ष मीरादेवी खत्रीले २० लाखमा ढुङ्गा र तारजाली नगरपालिकाले व्यवस्था गरेपछि निर्माण कार्य भने श्रमदानबाटै भइरहेको उनले बताइन् । दैनिक २ सयको सङ्ख्यामा सहभागिता भइरहेको उनले बताइन् ।

अरु क्षेत्रमा काम गरेको देखेर आफ्नो गाउँको विकास गर्न आफैँ लाग्नुपर्ने भएकाले यो काम गरिएको उनको भनाइ छ । यो ठाउँ जोगाउनु नगर र मेयरको मात्रै नभएर नगरवासीको पनि उत्तिकै दायित्व भएकाले पनि यो काम गर्न लागि परिएको खत्रीको भनाइ छ ।

‘हामी नै पीडित हो नि त यो खोलाबाट’, उनले भनिन्, ‘ठेक्काबाट गरिने काम भन्दा श्रमदानबाट गरिने काममा स्थानीय लाग्दा धेरै राम्रो हुन्छ भनेर यो काम गरिएको हो ।’

सुन्दरहरैंचाका मेयर गछिया खोलामा श्रमदानमा सहभागी, १०० मिटर तटबन्ध जनश्रमदानबाट पूरा गरिने