विराटचोकः जिल्ला युवा समिति मोरङ र सुन्दरहरैँचा नगरपालिकाको संयुक्त आयोजनामा नमुना युवा नगरसभा शुरु भएको छ । ४ दिन चल्ने नगरसभा असार १ गते सम्पन्न हुनेछ ।

सुन्दरहरैँचा – ४ स्थित त्रिवेणी रिसोर्टमा आज एक समारोहका बीच कोशी प्रदेशसभाकी उप सभामुख सृजना दनुवारले कार्यक्रमको उद्घाटन गरिन् । कार्यक्रमको उद्घाटनमा बोल्दै उप सभमुख दनुवारले युवाहरुलाई कानुन निर्माणको नीतिगत ज्ञान प्रदान गर्ने बताइन् । कार्यक्रममा बोल्दै युवाहरुलाई राजनीतिमा आकर्षण गर्न यस्तो कार्यक्रमले सहयोग हुने बताइन् ।

नमुना युवा नगर सभा जिल्ला युवा समितिको समन्वयमा गत बर्षबाट सुन्दरहरैचामा वार्षिक रुपमा कार्यक्रम आयोजना हुँदै आएको छ । युवालाई देशको संविधान नियम कानुन, संसदीय व्यवस्था र अनुशासन सिकाई भविष्यमा असल नेतृत्व गर्न सक्षम जनशक्ति उत्पादन गर्नका लागि हरेक वर्ष नमूना युवा संसद गठन गर्ने गरेको जिल्ला युवा समिति मोरङका अध्यक्ष सन्तोष घिमिरेले बताए ।

युवालाई नगरसभाको निर्णय प्रक्रिया र कार्यको ज्ञान दिई असल संस्कार र सुझबुझपूर्ण व्यवहार सिकाउन नमुना नगर युवा सभा कार्यक्रम हुने गरेको र यसबाट युवालाई नेतृत्व विकास गर्न सहयोग पुग्ने घिमिरेले जानकारी दिए ।

स्थानीय तहका वडामा वडास्तरीय युवा क्लब गठन गरिएको छ । नमुना नगरसभामा पालिकाका १२ वटा वडाबाट ४५ जना सहभागी भएका छन् । सहभागीहरुलाई चार दिन सम्म नगरसभाबाट कानुन निर्माण, नगरसभाको संसदीय अभ्यास र यसका प्रक्रियाहरु, स्थानीय तहमा बजेट निर्माणका प्रक्रियाहरु र स्थानीय सरकारमा युवाहरुको अर्थपूर्ण सहभागिताका बारेमा प्रशिक्षण दिइने प्रशिक्षक सरोज ढकालले बताए ।