विराटचोकः असार १ र २ गते आएको बाढीका कारण पूर्वी नेपालमा ३० जलविद्युत आयोजनाको साढे ८ अर्ब रुपैयाँभन्दा बढीको क्षति भएको प्रारम्भिक तथ्याङ्क सार्वजनिक भएको छ ।

ताप्लेजुङ, पाँचथर, संखुवासभा र भोजपुर जिल्लामा आएको बाढीले ४ सय ६३ मेगावाट क्षमताका ३० ओटा जलविद्युत आयोजनामा क्षति भएको स्वतन्त्र उर्जा उत्पादकहरुको संस्था (इप्पान) को प्रारम्भिक अध्ययनले देखाएको हो ।

बाढीका कारण १ सय ३२ मेगावाट विद्युत उत्पादन गरिरहेका १२ ओटा आयोजनामा करिब ६ अर्ब रुपैयाँ बराबरको क्षति भएको इप्पानले जनाएको छ । विद्युत उत्पादन गरिरहेको सबैभन्दा ठूलो आयोजना २५ मेगावाटको काबेली बी–१ मा ५० करोड रुपैयाँ बराबरको क्षति भएको छ । १३ आयोजनामा करिब ६ अर्बको क्षति भएको छ ।

उत्पादनमा रहेका आयोजनामध्ये सबैभन्दा धेरै क्षति २२ दशमलव १ मेगावाट क्षमताको तल्लो हेंवा खोला जलविद्युत आयोजनामा १ अर्ब रुपैयाँ बराबरको क्षति भएको आयोजनाका अध्यक्ष सीताराम तिमल्सिनाले जानकारी दिए । भौतिक हिसाबले सबैभन्दा धेरै क्षति भएको ४ दशमलव ७ मेगावाटको अपर पिलुवा–२ जलविद्युत आयोजनामा ९० करोड बराबरको क्षति भएको मेन्छियाम हाइड्रोपवारका अध्यक्ष एवं संखुवासभाका सांसद दीपक खड्काले बताए ।

१४ दशमलव ९ मेगावाट क्षमताको हेंवा खोला ए जलविद्युत आयोजनामा ९५ करोड रुपैयाँ बराबरको क्षति भएको आयोजनाका प्रवर्द्धक पुष्पज्योति ढुङ्गानाले जनाएका छन् ।

निर्माणाधीन ३ सय २७ मेगावाटका १७ आयोजनामा साढे २ अर्ब बढीको क्षति भएको छ । जसमध्ये सबैभन्दा धेरै क्षति सुपर हेंवा खोला जलविद्युत आयोजनामा ८० करोड रुपैयाँ बराबरको क्षति भएको छ । उक्त आयोजना निर्माणका खटिएका १८ जना मजदूरलाई बाढीले बगाएर बेपत्ता बनाएको थियो । त्यसमध्ये अहिलेसम्म ४ जनाको मात्र शव भेटिएको छ ।

९० प्रतिशत निर्माण पूरा भइसकेको आयोजनामा बाढीले क्षति पु¥याउँदा आयोजनाको पुनर्निर्माणमा डेढदेखि दुई वर्षसम्म थप समय लाग्ने आयोजनाका अध्यक्ष हर्कबहादुर तामाङले बताए ।

त्यस्तै ९७ दशमलव ५ मेगावाटको इसुवाखोला जलविद्युत आयोजनामा ५० करोड रुपैयाँ बराबरको क्षति भएको आयोजनाका अध्यक्ष वीरेन्द्रबहादुर न्यौपानेले जानकारी दिए । ९ दशमलव ७ मेगावाटको इङ्ग्वा खोलामा पनि ५० करोड बराबरको क्षति भएको बताइएको छ ।