कानेपोखरीको श्री जनता माविबाट २०५६ सालमा एसएलसी उत्तीर्ण हुँदासम्म व्यवसायी मनिता दंगाल व्यवसायमा जोडिनुभएको थिएन । जनता बहुमुखी क्याम्पस इटहरीबाट १२ कक्षा पास गरेपछि उहाँको विवाह भयो । त्यसपछि बीबीएस अध्ययन गर्दागर्दै उहाँ व्यवसायमा लाग्नुभयो । त्यसअघि कुनै व्यवसाय नगरेकी उहाँले २० वर्षको उमेरमा व्यवसायमा हात हालेपछि पढाइलाई निरन्तरता दिन सक्नुभएन ।

शुरुमा उहाँले मोटर पार्टसको व्यवसाय ८ वर्ष गर्नुभयो । त्यसपछि टाटा सिप्रदीको डिस्ट्रिब्युटर भएर काम गर्नुभयो । मोटर पार्टस्को काम गर्दा गाडी बिग्रिँदा त्यहाँ मर्मतको लागि आउने गाडी पहाडतिर ढुवानी गर्ने ट्रक धेरै हुन्थे । ढुवानीको बारेमा कुरा बुझ्दा त्यसमा नाफा देखेर शुरुमा २ वटा गाडी किनेर उहाँले ढुवानी व्यवसाय शुरु गर्नुभयो । पछि ४ वटा गाडी किनेर ढुवानी गर्न थाल्नुभयो । हाल आफ्ना र अन्य गरेर सयौँ गाडीमार्फत् पहाडी क्षेत्रमा निर्र्र्र्र्र्र्माण सामग्रीको ढुवानीको व्यवस्था उहाँ मिलाउनुहुन्छ ।

उहाँ व्यवसायमा सफल हुँदै हुनुहुन्थ्यो । निर्माण सामग्रीको ढुवानी गर्दागर्दै रड, सिमेन्टको डिलर किन नलिने भन्ने उहाँलाई लाग्यो । त्यसपछि जगदम्बा सिमेन्टको डिलर लिएर काम शुरु गर्नुभयो । हाल उहाँ होङ्सी सिमेन्टको आपूर्तिकर्ता हुनुहुन्छ ।

नेपालकै ठूलो जलविद्युत आयोजना अरुण तेस्रोको एउटा पाटोको ७५ प्रतिशत निर्माण सामग्री उहाँ पठाउनुहुन्छ । पछिल्लो समय जलविद्युत कम्पनीले ट्रेडर्स र सप्लायर्स छान्दा एनपीलाई छान्ने गरेका छन् । विभिन्न व्यवसायमार्फत् उहाँ वार्षिक १ अर्बभन्दा बढीको कारोबार गर्नुहुन्छ ।

महिलाले व्यवसाय शुरु गर्दा ठूलो चुनौती बेहोर्नुपर्ने उहाँको अनुभव छ । ‘मैले पनि व्यवसाय गर्दा शुरुमा आफन्त र छिमेकले मन पराउनुभएन ।

धेरै परिवारमा महिलाले काम गरेको मन पराए पनि महिलाका लागि लगानी गर्न डराउने गरेको उहाँको अनुभव छ । जुनसुकै काममा पनि ध्यान दिएर गर्नुपर्छ र सफल भइन्छ भन्ने उहाँले पाएको मन्त्र हो । उहाँ काममा राति १२ बजेसम्म यति एकाग्र हुनुहुन्थ्यो कि पसलबाहिर निस्किँदा बिरामी पर्ने अवस्थासम्म आयो ।

पछिल्लो समय उहाँले एपोलो टायरको डिलर लिनुभएको छ । विवाह अघिसम्म व्यवसाय नगर्नुभएकी मनिता दंगाल विवाहपछि आधा दर्जन व्यवसाय सञ्चालन गरिरहनुभएको छ । एनपी ट्रेडर्सकी सञ्चालक दंगालले एकसाथ एनपी सप्लायर्स, एनपी कंक्रिट, एनपी इन्टरप्राइजेज, एनपी ढुवानी र एनपी निर्माण सेवा सञ्चालन गरिरहनुभएको छ । कसैको कुरा नसुनी कामबाहेक अन्यत्र ध्यान नदिने बानीले नै आफू सफल भएको रहस्य उहाँ सुनाउनुहुन्छ ।